25 Oct 2024, 11:05
މި އަހަރުގެ ޑިސެމްބަރު މަހުގެ ހަވަނަ ދުވަހު ރިލީޒްކުރާނެކަމަށް ކުރިން އިއުލާނުކޮށްފައިވާ ތެލުގޫ ފިލްމު "ޕުޝްޕާ 2: ދަ ރޫލް" ރިލީޒްކުރާ ތާރީޚު އަވަސްކޮށްފިއެވެ.
ފިލްމުގެ ލީޑް ރޯލް ކުޅޭ ތެލުގޫ އެކްޓަރު އައްލޫ އަރުޖުން ސޯޝަލް މީޑިއާއަށް ދޫކޮށްލި ޕޯސްޓެއްގައި ބުނެފައިވަނީ ބެލުންތެރިންނާ ހަމައަށް "ޕުޝްޕާ 2" އަންނާނީ ޑިސެމްބަރު މަހުގެ ފަސްވަނަ ދުވަހު ކަމަށެވެ.
ފިލްމު ގެނެސްދޭ ތާރީޚު ކުރިއަށް ޖައްސާލާފައިވާއިރު އެންމެ ފުރަތަމަ މި ފިލްމު ރިލީޒްކުރަން ނިންމީ މި އަހަރުގެ އޮގަސްޓް މަހުގެ 15ގައެވެ. އެހެންނަމަވެސް، ފިލްމަށް ދެން މާ ބޮޑު އިންތިޒާރެއް ކުރަން ނުޖެހޭނެ ކަމަށާއި ބެލުންތެރިންގެ ހިތުގައި ރަސްކަން ކުރުމަށް ފިލްމު އަންނަން މާ ގިނަ ދުވަހެއް ނެތް ކަމަށް އައްލޫ އަރުޖުން ވަނީ ބުނެފައެވެ.
ފިލްމު "ޕުޝްޕާ 2"ގެ ލަވައެއްގެ މަންޒަރެއްގައި އެކްޓަރު އައްލޫ އަރުޖުން އަދި ބަތަލާ ރަޝްމިކާ--ފޮޓޯ/ޕިންކްވިލާ
މި ފިލްމަކީ 2021 ވަނަ އަހަރު ރިލީޒްކޮށް ބެލުންތެރިންގެ ވަރަށް ބޮޑު ތަރުހީބެއް ހޯދި ފިލްމެކެވެ. އައްލޫ އަރުޖުންއާ އެކު ބަތަލާ ރަޝްމިކާ މަންދަންނާ މި ފަހަރު ވެސް ފެންނާނެ "ޕުޝްޕާ 2"ގެ އައިޓަމް ލަވަޔަކުން ބަތަލާ ތުރިޕްތީ ދިމްރީ ފެންނާނެ ކަމަށް ވެސް ރިޕޯޓުތައް ބުނެއެވެ. މި ފިލްމުގެ ފުރަތަމަ ބައިގައި ހިމެނުނު އައިޓަމް ލަވައިން ފެނުނީ ސައުތު ސިނަމާގެ ކާމިޔާބު ބަތަލާ ސަމަންތާ ރޫތު ޕްރަބޫއެވެ.
އައްލޫ އަރުޖުން މުޅިން ތަފާތު ގޮތަކަށް ފެންނާނެ "ޕުޝްޕާ 2"ގެ ވާހަކަ ފުރަތަމަ ބަޔަށްވުރެ މާ ޝައުގުވެރިވާނެ ކަމަށާއި ބެލުންތެރިން މާޔޫސް ނުވާނެ ކަމަށް ފިލްމު ގެނެސްދޭ ޓީމުން ވަނީ ބުނެފައެވެ. "ޕުޝްޕާ"ގައި އައްލޫ އަރުޖުން ދެއްކި މޮޅު އެކްޓިންގްއަށް އެންމެ މޮޅު އެކްޓަރުގެ ނެޝަނަލް އެވޯޑު ވެސް ވަނީ ލިބިފައެވެ.