25 Oct 2024, 11:09
ބޮލީވުޑްގެ ޒުވާން ބަތަލާ ރާދިކާ މަދަން އާއި އެކްޓަރު ވިހާން ސަމަތާ ދެމެދު ލޯބީގެ ގުޅުމެއް އޮތްކަމަށް ފިލްމީ ރިޕޯޓުތައް ބުނެފިއެވެ.
ޓެލެވިޒަން ދުނިޔެއިން ބެލުންތެރިންގެ މަގުބޫލުކަން ހޯދުމަށް ފަހު ބޮލީވުޑްގައި ފިޔަޖަހަމުން އަންނަ ރާދިކާއާއި ވިހާން އެކީގައި އިންޑަސްޓްރީގެ އެކިއެކި ހަފުލާތަކުން އެކުގައި ފެނުމުގެ އިތުރުން އިންޑިއާގައި ފާހަގަކުރާ ބައެއް ދުވަސްތައް ވެސް ދެ ތަރިން އެކީގައި ފާހަގަކުރާ ކަމަށް ރިޕޯޓުތައް ބުނެއެވެ.
މިފަދަ ދުވަސްތަކުގައި ދެތަރިން އެކީގައި ވަގުތު ހޭދަކުރުމަށް ލޯބިކުރާ ކަމަށާއި ދެ މީހުންގެ ލޯބީގެ ގުޅުން ސިއްރުކޮށްފައި އޮންނަތާ މިހާރު ދުވަސްކޮޅެއްވެއްޖެ ކަމަށް ޕިންކްވިލާގައި ވަނީ ބުނެފައެވެ.
ވިހާން ސަމަތަށް ބެލުންތެރިންގެ މެދުގައި މަގުބޫލުވީ ދާދިފަހުން އެމޭޒަން ޕްރައިމްގައި ރިލީޒްކުރި ބަތަލާ އަނަނިޔާގެ ވެބް ސީރީޒް "ކޯލް މީ ބޭ"އިންނެވެ. އޭގެ ދުވަސްކޮޅެއް ފަހުން އަނަނިޔާގެ ފިލްމު "ސީޓީއާރްއެލް"ގެ ރޯލަކުން ވެސް ވިހާން ވަނީ ފެނިފައެވެ.
ކަލަސްއިން ގެނެސްދިން މަޝްހޫރު ޑްރާމާ ސީރީޒް "މެރި އާޝިޤީ ތުމް ސެ ހީ"އިން ބޮޑު ތަރުހީބެއް ހޯދި ރާދިކާ ފިލްމު އިންޑަސްޓްރީއާ ގުޅުނީ 2018 ވަނަ އަހަރު ފިލްމު "ޕަޓާކާ"އިންނެވެ.
ރާދިކާ މަދަން ކުރީގެ އެކްޓަރު އިރުފާން ޚާންއާ އެކު ފިލްމު "އަންގްރޭޒީ މީޑިއަމް"ގެ މަންޒަރެއްގައި--ފޮޓޯ/ޕިންކްވިލާ
ރާދިކާ އެންމެ ފަހުން ބެލުންތެރިންނަށް ފެނިފައިވަނީ މި އަހަރުގެ ޖުލައި މަހު ރިލީޒްކުރި ފިލްމު "ސަރްފީރާ"އިންނެވެ.
ބޮލީވުޑްގައި އުޖާލާ ކުރިމަގެއް އޮތް 29 އަހަރުގެ ބަތަލާ ދެން އެންމެ އަވަހަށް ބެލުންތެރިންނަށް ފެންނާނީ "ސަނާ"ގެ ނަމުގައި އުފައްދާ ފިލްމަކުންނެވެ.
ޕޯސްޓްޕްރޮޑަކްޝަންގެ މަރުހަލާގައި އޮތް މި ފިލްމު މި އަހަރު ރިލީޒްކުރާނެ ކަމަށް އިއުލާނުކޮށްފައިވީ ނަމަވެސް ސިނަމާތަކަށް ގެންނާނެ ވަކި ތާރީޚެއް އަދި އިއުލާނު ނުކުރެއެވެ.