24 Oct 2024, 17:21
ޔުއޭފާ ޗެމްޕިއަންސް ލީގުގެ ލީގު ފޭސްގައި އިޓާލިއަން ސެރީއާގެ އިންޓާ މިލާން އާއި ސްވިސް ސުޕާ ލީގުގެ ޔަންގް ބޯއިސް ބައްްދަލުކުރި މެޗު އިންޓާއިން ކާމިޔާބު ކޮށްފިއެވެ.
ޔަންގް ބޯއިސްގެ ދަނޑުގައި ކުޅުނު މިމެޗު އިންޓާއިން ކާމިޔާބު ކޮށްފައިވަނީ އެއް ލަނޑު ސުން ލަނޑުންނެވެ. ދެޓީމުގެ ފަރާތުން ވާދަވެރި ކުޅުމެއް ފެނުނު މިމެޗުގައި ގިނައިރު އިންޓާއިން ބޯޅަ ގެންގުޅުނު ނަމަވެސް ގިނަ ހަމަލާ އުފައްދާފައިވަނީ ޔަންގް ބޯއިސްއިންނެވެ.
މިމެޗުގެ ފުރަތަމަ ހާފުގައި ޔަންގް ބޯއިސް އިން ވަނީ މޮޅު ކުޅުމެއް ދައްކާ އިންޓާގެ ގޯލަށް ނުރައްކާތެރި ހަމަލާތަކެއް ފޮނުވާލާފައެވެ. މީގެތެރެއިންވެސް ޔައޮއެން ހަޑްޔާމް އާއި ލޫކަޒް ލަކޯމީ ފޮނުވާލި ދެ ހަމަލާ ފާހަގަވިއެވެ.
މިމެޗުގެ ދެވަނަ ހާފުގައިވެސް ޔަންގް ބޯއިސްއިން އިންޓާގެ ގޯލަށް ނުރައްކާ ކުރިއިރު އިންޓާއިންވެސް ވަނީ މިހާފުގައި ރަނގަޅު ކުޅުމެއް ދައްކާފައެވެ. އަދި މެޗު ނިމެން ގާތްވެފައިވަނިކޮށް އިންޓާއަށް މެޗުގެ ލީޑު ނަގާނެ ރަނގަޅު ފުރުސަތެއް ލިިބުނެވެ. ނަމަވެސް މާކޯ އަނޯޓޮވިޗް ފޮނުވާލި ޕެނަލްޓީ ވަނީ ޔަންގް ބޯއިސްގެ ކީޕާ ޑޭވިޑް ވޮން ބޯލްމޫސް ދިފާއުކޮށްފައެވެ. އަދި ޑެންޒެލް ޑަމްފްރީސް ފޮނުވާލި ރީބައުންޑްވެސް އޭނާ ވަނީ ދިފާއު ކޮށްފައެވެ. މިއާއެކު މިމެޗު އެއްވަރު ވެގެންނިމިދާނެކަމަށް ހީވެފައިވަނިކޮށް އިންޓާ މޮޅުކޮށްދިން ލަނޑު މެޗުގެ އިތުރު ވަގުތުގެ ތިންވަނަ މިނެޓުގައި ކާމިޔާބު ކޮށްދިނީ ބަދަލު ކުޅުންތެރިޔާ މާކަސް ތުރާމްއެވެ.
މިކާމިޔާބީއާއެކު އިންޓާ މިހާރު އުޅެނީ ކުޅުނު ތިން މެޗުން ލިބިފައިވާ ހަތް ޕޮއިންޓާއެކު ތާވަލްގެ ހަތް ވަނައިގައެވެ. އަދި ޔަންގް ބޯއިސް އުޅެނީ ޕޮއިންޓެއް ނުލިބި 35 ވަނައިގައެވެ. މިމުބާރާތުގައި ފްރެންޗް ލީގް އާންގެ ލީލް އާއި ސްޕެނިޝް ލަލީގާގެ އެޓްލެޓިކޯ މެޑްރިޑް ބައްދަލުކުރި މެޗު ރަށުން ބޭރުގައި ކުޅެ ތިން ލަނޑު އެއް ލަނޑުން ކާމިޔާބު ކޮށްފައިވަނީ ލީލްއެވެ.
މިމެޗުގެ ލީޑު އެޓްލެޓިކޯއަށް މެޗުގެ އަށް ވަނަ މިނެޓުގައި ހޫލިއަން އަލްވަރޭޒް ނަގައިދިން ނަމަވެސް މިމެޗުގެ ދެވަނަ ހާފުގައި ލީލް އިން ވަނީ ތިންލަނޑު ކާމިޔާބު ކޮށް ޖެހިޖެހިގެން ދެވަނަ ފަހަރަަށް މިމުބާރާތުގައި ލަލީގާއަށް ނިސްބަތްވާ ދެވަނަ ޓީމު ބަލިކޮށްފައެވެ. މިމެޗުގައި އެޓިމުގެ ފުރަތަމަ ލަނޑު އެޑޮން ޒެގްރޯވާ ކާމިޔާބު ކޮށްދިން އިރު ފަހު ދެ ލަނޑު ޖަހައިދިނީ ޖޮނަތަން ޑޭވިޑްއެވެ. މިކާމިޔާބީއާއެކު ލީލް މިހާރު އުޅެނީ ހަ ޕޮއިންޓާއެކު ތާވަލްގެ 15 ވަނައިގައެވެ. އަދި އެޓްލެޓިކޯ އުޅެނީ ތިން ޕޮއިންޓާއެކު 27 ވަނައިގައެވެ.