24 Oct 2024, 12:17
މި އަހަރަށް ކަނޑައަޅާފައިވާ ދައުލަތުގެ ބަޖެޓު ހުސްވާތީ، ޚަރަދުތައް ހަމަޖެއްސުމަށް ޓަކައި ރައްޔިތުންގެ މަޖިލީހަށް މިއަދު ހުށަހެޅި ސަޕްލިމެންޓަރީ ބަޖެޓުގެ ބަހުސް ނިމެންދެން މިއަދުގެ ޖަލްސާ ކުރިޔަށް ގެންދަން ނިންމައިފިއެވެ.
މި ގޮތަށް ފާސްކުރީ ޖަލްސާ ކުރިޔަށް ގެންދިއުމާމެދު ނެގުނު ވޯޓުގައި ބައިވެރިވެ ވަޑައިގަތް 69 މެންބަރުންގެ ތާއީދާ އެކުގައެވެ.
ރައްޔިތުންގެ މަޖިލީހުގެ މިއަދުގެ ޖަލްސާއަށް ސަރުކާރުގެ ފަރާތުން ފިނޭންސް މިނިސްޓަރުވަނީ 5.1 ބިލިއަން ރުފިޔާގެ ސަޕްލިމެންޓަރީ ބެޖެޓެއް ހުށަހަޅުއްވައިފައެވެ. އެހެން ނަމަވެސް އެ ބަޖެޓު ހުށަހެޅުއްވީ، މި އަހަރަށް ކަނޑައެޅި 49.8 ބިލިއަން ރުފިޔާގެ ބަޖެޓު އެއްކޮށް ހުސްނުވަނީސް ކަމަށާއި، އެއިން ޚަރަދުކުރެވިފައި އޮތީ 76 އިންސައްތަ ކަމަށް ފިނޭންސް މިނިސްޓްރީން ވަނީ ބުނެފައެވެ.
މި ބަޖެޓުގައި ރިކަރަންޓު ޚަރަދުގެ ގޮތުގައި 1.5 ބިލިއަން ރުފިޔާ ހިމަނާފައިވެއެވެ. އެއީ:
މުސާރައަށް 24.4 މިލިއަން ރުފިޔާ
- މެޑިކަލް ސަޕްލައިއަށް 200 މިލިއަން ރުފިޔާ
- ސަބްސިޑީއަށް އެއް ބިލިއަން ރުފިޔާ
- ބޭސް ފަރުވާގެ އެހީއަށް 262.6 މިލިއަން ރުފިޔާ
ބަޖެޓުގައި ކެޕިޓަލް ޚަރަދުގެ ގޮތުގައި 3.6 ބިލިއަން ރުފިޔާ ހިމަނާފައިވެއެވެ. އެއީ:
ބިން ހިއްކުމާއި އިމާރާތްކުރުން އަދި އިންފްރާސްޓްރަކްޗާއަށް ދެ ބިލިއަން ރުފިޔާ
- ކެޕިޓަލް ކޮންޓްރިބިއުޝަންގެ ގޮތުގައި 441 މިލިއަން ރުފިޔާ
- ކޮންޓިންޖެންސީގެ ގޮތުގައި 650 މިލިއަން ރުފިޔާ
- ސްޓޫޑެންޓް ލޯނު ދޫކުރަން 458.4 މިލިއަން ރުފިޔާ
މާލީ ވުޒާރާއިން ބުނި ގޮތުގައި މަޖިލީހަށް ސަޕްލިމެންޓަރީ ބަޖެޓެއް ހުށަހަޅަން ޖެހުނީ މި އަހަރުގެ ބަޖެޓުގައި އަންދާޒާކޮށްފައިވާ ވަރަށް ވުރެ އިތުރަށް ބައެއް ދާއިރާތަކުން ޚަރަދުކުރަން ޖެހުމުންނެވެ.
މިދިޔަ އަހަރުގެ މާލީ ހިސާބުތައް ރިކޯޑުކުރުމުގައި ވެސް ބޮޑެތި ގޯސްތަކެއް ހަދާފައިވާ ކަމަށް މާލީ ވަޒީރު ތުހުމަތުކުރައްވައެވެ. އެ ކަމުގެ ސަބަބުން، މިދިޔަ އަހަރުގެ ޚަރަދުތަކަށް މި އަހަރުގެ ބަޖެޓުން ދެ ބިލިއަނެއްހައި ރުފިޔާގެ ޖާގައެއް ހަމަޖައްސަން ޖެހޭ ކަމަށް ވަޒީރު މީގެ ކުރިން ވިދާޅުވެފައިވެއެވެ.