24 Oct 2024, 12:49
ޔުއޭފާ ޗެމްޕިއަންސް ލީގުގެ ލީގު ފޭސްގައި އިންގްލިޝް ޕްރިމިއާ ލީގުގެ މެންޗެސްޓާ ސިޓީ އާއި ޗެކް ފަސްޓް ލީގުގެ ސްޕާޓާ ޕްރާހާ ބައްދަލުކުރި މެޗު ސިޓީއިން ކާމިޔާބު ކޮށްފިއެވެ.
ސިޓީގެ ދަނޑުގައި ކުޅުނު މިމެޗު އެޓީމުން ކާމިޔާބު ކޮށްފައިވަނީ ފަސް ލަނޑު ސުން ލަނޑުންނެވެ. ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ސިޓީންނެވެ. އަދި މިމެޗު ސިޓީން ފަށާފައިވަނީ ވަރަށް ފޯރީގައެވެ. ނަތީޖާ އަކަށް ވެގެންދިޔައީ މެޗުގެ ތިންވަނަ މިނެޓުގައި ފިލް ފޮޑެން ލަނޑެއް ޖަހާ މެޗުގެ ލީޑު ސިޓީން ނެގުމެވެ.
މިލަނޑާއެކު ގިނަ ލަނޑު ތަކެއް މިމެޗުގައި ފެންނާނެކަމަށް ބެލެވުނު ނަމަވެސް ސްޕާޓާއިން ހިތްވަރާއެކު މަސައްކަތް ކުރުމުގެ ނަތީޖާ އަކަށް ވެގެންދިޔައީ އެޓީމުގެ ޑިފެންސް ފުރަތަމަ ހާފުގައި އިތުރަށް ހުޅުވާލުމުގައި ސިޓީއަށް ކާމިޔާބީ ހާސިލް ނުވުމެވެ. ނަމަވެސް ސިޓީން ވަނީ ލަނޑު ޖަހާނެ ރަނގަޅު ފުރުސަތު ތަކެއް ތަނަވަސްކޮށްފައެވެ. މިގޮތުން ސްޕާޓާގެ ކީޕާ ޕީޓާ ވެންޑާލްވަނީ އާލިން ހާލަންޑް ފޮނުވާލި ދެ ހަމަލާއަކާއި ފޯޑެންގެ އިތުރު ހަމަލާއެއް ދިފާއު ކޮށްފައެވެ.
މިމެޗުގެ ދެވަނަ ހާފުގައި ވެސް ފެނިގެންދިޔައީ ސިޓީއިން ހަމަލާއަށް އިސްކަން ދީގެން ކުޅެމުންދިޔައިރު ސްޕާޓާއިން ޑިފެންސް ކުރުމާއެކު ލިބޭ މަދު ފުރުސަތެއްގައި ކުރިއަށް އެރޭތޯ މަސައްކަތް ކުރަމުންދިޔަ ތަނެވެ. މިމެޗުގައި ސިޓީގެ ދެވަނަ ލަނޑު މެޗުގެ 58ވަނަ މިނެޓުގައި އެޓީމަށް ކާމިޔާބު ކޮށްދިނީ ހާލަންޑްއެވެ. އަދި މިލަނޑު ޖެހިތާ ހަ މިނެޓު ފަހުން ޖޯން ސްޓޯންސް ވަނީ ސިޓީގެ ލީޑު އިތުރަށް ފުޅާކޮށްދީފައެވެ.
މިމެޗުގައި ސިޓީގެ ހަތަރު ވަނަ ލަނޑު މެޗުގެ 68ވަނަ މިނެޓުގައި އެޓީމަށް ކާމިޔާބު ކޮށްދި ހާލަންޑްވަނީ މިމެޗުގައި ދެލަނޑު ކާމިޔާބު ކޮށްފައެވެ. މިއީ ޗެމްޕިއަންސް ލީގުގައި ހާލަންޑް މިހާތަނަށް ކާމިޔާބުކުރި 44 ވަނަ ލަނޑެވެ. ސިޓީގެ ފަހު ލަނޑު މެޗުގެ 88ވަނަ މިނެޓުގައި ލިބުނު ޕެނަލްޓީއަކުން ކާމިޔާބު ކޮށްދިނީ މެތުއަސް ނޫނޭސްއެވެ. މެޗުގައި މޮޅު ކުޅުމެއް ދައްކާ އިތުރު ދެ ލަނޑު ޖެހުމަށް ފުރުސަތު ތަނަވަސްކޮށްދިން ނޫނޭސްގެ މިލަނޑަކީ އޭނާ ޗެމްޕިއަންސް ލީގުގައި މިހާތަނަށް ކާމިޔާބު ކުރި ފުރަތަމަ ލަނޑެވެ.
މިކާމިޔާބީއާއެކު ސިޓީން މިވަނީ ތިން މެޗުން ލިބިފައިވާ ހަތް ޕޮއިންޓާއެކު ތާވަލްގެ ތިންވަނައަށް ކުރިއަށް ޖެހިލާފައެވެ. އަދި ސްޕާޓާ ޕްރާހާ އުޅެނީ ހަތަރު ޕޮއިންޓާއެކު ތާވަލްގެ 21 ވަނައިގައެވެ.
މިމުބާރާތުގައި އެޗްއެންއެލްއަށް ނިސްބަތްވާ ޑީނަމޯ ޒަގްރެބް އާއި އޮސްޓްރިއަން ބުންޑެސްލީގާގެ އާރްބީ ސާލްޒްބާގް ބައްދަލުކުރި މެޗު ރަށުން ބޭރުގައި ދެ ލަނޑު ސުން ލަނޑުން ކާމިޔާބު ކޮށްފައިވަނީ ޑީނަމޯ ޒަގްރެބްއެވެ. މިމެޗުގައި އެޓީމުން ކާމިޔާބުކުރި ދެ ލަނޑު އެޓީމަށް ޖަހައިދިނީ ސަންޑްރޯ ކުލެނޮވިޗް އާއި ބްރޫނޯ ޕެތްކޮވިޗްއެވެ. މިކާމިޔާބީއާއެކު ޒަގްރެބް އުޅެނީ ހަތަރު ޕޮއިންޓާއެކު ތާވަލްގެ 22 ވަނައިގައެވެ. އަދި ސާލްޒްބާގް އުޅެނީ ޕޮއިންޓެއް ނުލިބި 34 ވަނައިގައެވެ.