24 Oct 2024, 08:51
އިންޑިއާއިން އަންނަ އަހަރުގެ އޮސްކާ އެވޯޑަށް ރަސްމީކޮށް ހުށަހަޅާފައިވާ ފިލްމު "ލާޕަތާ ލޭޑީސް"ގެ ބަތަލާ ނިތާންޝީ ގޮއެލް ފިލްމުގެ މަސައްކަތް ކުރިއިރު ދިޔައީ ގްރޭޑް ނުވައެއްގައި ތައުލީމު ހާސިލުކުރަމުން ކަމަށް ބަތަލާ ބުނެފިއެވެ.
ސްކޫލުގައި ތައުލީމު ހާސިލުކުރަމުން ފިލްމު ޝޫޓިންތަކަށް ދިއުންވީ ވަރަށް ބޮޑު ގޮންޖެހުމަކަށް ކަމަށާއި ނަމަވެސް ވަރަށް ހިތްވަރުން އެކަން ބެލެންސް ކުރެވުނު ކަމަށް ބަތަލާ ވަނީ ބުނެފައެވެ.
މަޝްހޫރު ޔޫޓިއުބަ ރަންވީރު އައްލާހްބާދިއާގެ ޝޯއަށް ދިން އިންޓަވިއުއެއްގައި ނިތާންޝީ ބުނީ، ނުވަވަނަ ގްރޭޑްގެ ފަހު އިމްތިހާނު ތާވަލު ކުރެވިފައި އޮތީ "ލާޕަތާ ލެޑީސް"ގެ ޝޫޓިންގް ފެށިތާ އެއް ދުވަސް ފަހުން ކަމަށާއި އިމްތިހާނަށް ތައްޔާރުވީ ޝޫޓިންތަކުގައި ލިބޭ ހުސް ވަގުތުތަކުގައި ކަމަށެވެ.
ފިލްމު "ލާޕަތާ ލޭޑީސް"ގެ ކާސްޓުން ޕްރޮޑިއުސަރު/އެކްޓަރު އާމިރު ޚާން އަދި ފިލްމުގެ ޑައިރެކްޓަރު ކިރަން ރާއޯއާ އެކު--ފޮޓޯ/ފިލްމުފެއަ
ޢުމުރުން 17 އަހަރުގެ ނިތާންޝީގެ މަންމައަކީ ސްކޫލް މުދައްރިސެއްކަމުން ލިބޭ ހުސްވަގުތުތަކުގައި މަންމައާ އެކު ސްކޫލު ފިލާވަޅުތައް މުތާލިއާކުރުމުގެ ސަބަބުން އިމްތިހާނު ހެދުމަށް ވަރަށް ބޮޑު އެހީތެރި ކަމެއް ލިބުނު ކަމަށް ބަތަލާ ވަނީ ބުނެފައެވެ.
ފިލްމު "ލާޕަތާ ލޭޑީސް"ގެ މަސައްކަތް ނިމި ފިލްމުގެ ޕްރޮމޯޝަންތަކާ ހަމައަށް އާދެވުނުއިރު ނިތާންޝީ ވަނީ އޭލެވެލްގެ ފުރަތަމަ އަހަރުގެ ކިޔެވުން ފަށާފައި ކަމަށާއި ނަމަވެސް، ޕްރޮމޯޝަން މަސައްކަތްތަކަށް ވަގުތު ހުސްކުރަން ޖެހުމުން 11 ވަނަ ގްރޭޑްގެ ފަހު އިމްތިހާނު ގެއްލުނު ކަމަށް ނިތާންޝީ ބުނެފައިވެއެވެ.
ނަމަވެސް، ފަހުން އެ އިމްތިހާނު ފުރިހަމަކޮށް މިހާރު ބަތަލާ އަންނަނީ އޭލެވެލްގެ ފަހު އަހަރު ފުރިހަމަކުރަމުންނެވެ. ވިޔަފާރީގެ ދާއިރާއިން މަތީ ތައުލީމު ހާސިލުކުރަމުން އަންނަ ބަތަލާ އަންނަ އަހަރު ބޯޑު އިމްތިހާނުގައި އިށީންނާނެ ކަމަށާއި ކުރިމަގުގައި ފިލްމީ ކެރިއަރާމެދު އަދި ވަކި އެއްޗެއް ބުނަން ނޭނގޭ ކަމަށް ނިތާންޝީ ވަނީ ބުނެފައެވެ.
އެކްޓަރު އާމިރު ޚާންގެ އަންހެނުން ކިރަން ރާއޯ ޑައިރެކްޓްކުރި "ލާޕަތާ ލޭޑީސް"އަކީ ވަރަށް ކުޑަ ބަޖެޓަކުން އުފެއްދި ފިލްމެކެވެ. ވަރަށް އާދައިގެ ވާހަކައެއްގެ މައްޗަށް ބިނާކޮށް އުފެއްދި މި ފިލްމަށް ބެލުންތެރިންގެ އިތުރުން ކްރިޓިކުން ވަނީ ވަރަށް ބޮޑަށް ތައުރީފުކޮށްފައެވެ.