24 Oct 2024, 09:00
ފިލްމު އިންޑަސްޓްރީގައި 32 އަހަރު ވަންދެން މަސައްކަތްކޮށް ފިލްމީ ކެރިއަރު ކާމިޔާބުކުރެވުނީ ވަކި އާއިލާއަކަށް ނިސްބަތްވީތީ ނޫން ކަމަށް ބަތަލާ ކާޖޮލް ބުނެފިއެވެ.
ކާޖޮލް އަކީ ފިލްމީ ދާއިރާގައި މަސައްކަތްކުރާ އާއިލާއަކުން އިންޑްސްޓްރީއަށް ތައާރަފުވި ބަތަލާއެއް ނަމަވެސް ފިލްމު އިންޑަސްޓްރީގައި ކާމިޔާބުކަމާ އެކު ދެމިހުރެވުނީ ބެލުންތެރިން ބަތަލާގެ ފިލްމުތައް ބަލައިގަތުމުން ކަމަށް ކާޖަލް ވަނީ ބުނެފައެވެ.
މިހާތަނަށް ފިލްމު އިންޑަސްޓްރީގައި ލެގަސީއެއް ގާއިމުކުރި ކުރީގެ ބަތަލާއިން ކަމަށްވާ ނަރުގިސް އަދި ޝަރުމިލާ ޓޭގޯރް ފަދަ ބަތަލާއިންނަކީ ވެސް އެއްވެސް ފިލްމީ ބެކްގްރައުންޑަކުން އިންޑަސްޓްރީއަށް ނުކުތް ތަރިން ނޫން ކަމަށް ކާޖޮލް މީޑިއާއަށް ދިން އިންޓަވިއުއެއްގައި ބުނެފައިވެއެވެ.
އެހެންވެ، ކާޖޮލްގެ ކެރިއަރުގެ ހަގީގީ ކާމިޔާބީއަކީ ބަތަލާގެ ބުރަ މަސައްކަތް ކަމަށާއި ބެލުންތެރިންގެ ފަރާތުން މެދުކެނޑުމެއް ނެތި ލިބެމުން އަންނަ ލޯތްބާއި ތަރުހީބު ކަމަށް ކާޖޮލް ބުނެފައިވެއެވެ. ފިލްމު "ބޭޚުދީ"އިން 1992 ވަނަ އަހަރު އިންޑަސްޓްރީއަށް ތައާރަފުވުމަށް ފަހު ކާޖޮލް ފިލްމުތަކުން ކުޑަ ބްރޭކެއް ނެގީ ކައިވެންޏަށް ފަހު ކުދިން ލިބުމާ ގުޅިގެންނެވެ.
ފިލްމީ ތަރި ކާޖޮލް އާއިލާއާ އެކު--ފޮޓޯ/ކޮއިމޮއި
މުޅި ދިރިއުޅުން ބިނާވެފައި އޮންނަނީ ފިލްމު އިންޑަސްޓްރީއަށް ނޫންކަމުން ދޭތެރެއަކުން ފިލްމުތަކުން ބްރޭކެއް ނެގުމަކީ މުހިއްމުކަމެއްގެ ގޮތުގައި ދެކޭ ކަމަށް ކާޖޮލް ވަނީ ބުނެފައެވެ.
ކާޖޮލްގެ ދެ ކުދިންގެ ތެރެއިން ދޮށީ ދަރިފުޅު ނިސާ ދޭވްގަންއަށް މިހާރު 21 އަހަރު ވެފައިވާއިރު ފިލްމުތަކުގައި އަލުން މަސައްކަތް ކުރުމަށް އެންމެ ބޮޑަށް ބާރުއެޅީ ވެސް ދަރިފުޅު ނިސާ ކަމަށް ބަތަލާ ވަނީ ބުނެފައެވެ.
ފިލްމުތަކުގެ އިތުރުން ވެބް ސީރީޒްގެ ދުނިޔެއަށް ވެސް ތައާރަފުވެފައިވާ ބަތަލާ އެންމެ އަވަހަށް ބެލުންތެރިންނަށް ފެންނާނީ މާދަމާ ނެޓްފްލިކްސްގައި ޕްރީމިއާކުރާ ފިލްމު "ދޯ ޕައްތީ"އިންނެވެ.