23 Oct 2024, 23:47
ދައުލަތާއި ސަރުކާރުގެ އެންމެ މަތީ ފަޑިން ފެށިގެން މާލީ އިސްލާހުތައް ގެންނަވައި، އަންނަ އަހަރުން ފެށިގެން އެ ކަންކަން ތަންފީޒު ކުރެއްވުމަށް ރައީސް ޑރ. މުހައްމަދު ނިންމެވި ނިންމެވުމަށް ވެރިކަން ކުރާ ޕީއެންސީން މަރުހަބާ ކިޔައިފިއެވެ.
އަންނަ އަހަރަށް ދައުލަތުގެ ބަޖެޓު ހުށަހަޅާއިރު، ދައުލަތުގެ މުސާރަތަކަށް ގެންނަ ބަދަލުތަކުގެ ތެރޭގައި ރައީސް މުއިއްޒުގެ މުސާރައިގެ 50 ޕަސެންޓާއި ރައްޔިތުންގެ މަޖިލީހުގެ މެންބަރުންނާއި ސިޔާސީ މަގާމުތަކުގެ މުސާރަ ކުޑަކުރަން ނިންމަވައިފައިވާކަން އެ މަނިކުފާނުވަނީ މިއަދު ހާމަ ކުރައްވައިފައެވެ.
ރައީސްގެ ނިންމެވުމަށް އެއްބާރުލުން ދެއްވުމުގެ ގޮތުން، ރައްޔިތުންގެ މަޖިލީހުގެ ރައީސްކަމުގެ މަގާމުގެ މުސާރައިގެ 50 ޕަސެންޓު ނުނަގަން ނިންމަވައިފައިވާކަމަށް މަޖިލިސް ރައީސް އަބްދުއްރަހީމް އަބްދުﷲ ވެސް މިރޭ ވިދާޅުވެފައިވެއެވެ.
ރައީސްގެ ނިންމެވުމަށް މަރުހަބާ ކިޔައި ޕީއެންސީން މިރޭ ނެރުނު ބަޔާނުގައިވަނީ އެ މަނިކުފާނު ނިންމެވީ ހަރުދަނާ އަދި ހިތްވަރުގަދަ ނިންމުންތަކެއް ކަމަށެވެ.
ރާއްޖޭގެ މާލީ ހާލަތު ގޯސްވެފައިވާއިރު، ޕީއެންސީން ތުހުމަތުކުރާ ގޮތުގައި އެ ކަމުގެ އެންމެ ބޮޑު ޒިންމާއެއް ނަގަންޖެހެނީ މިދިޔަ ސަރުކާރުންނެވެ.
އެ ބަޔާނުގައިވާ ގޮތުން ފާއިތުވެދިތަ ދެތިން އަހަރު ދައުލަތުގެ ޚަރަދުތައް އިންތިހާއަށް އިތުރުވެ، އެ ކަމުގެ ސަބަބުން ލިބޭ އާމްދަނީއާއި ކުރާ ހޭދައިގެ ފަރަގު ބޮޑުވަމުން ދިޔައިރު، އެ ކަން އިސްލާހުކުރުމަށް ޓަކައި ޚަރަދުތައް ކޮންޓްރޯލް ކުރުމަށް ދުނިޔޭގެ މާލީ އިދާރާތަކާއި ރާއްޖޭގެ ކްރެޑިޓް ރޭޓިން އޭޖެންސީތަކުން ދެމުންދިޔަ ލަފަޔަށް ކުރީ ސަރުކާރުން ދިނީ ބީރު ކަންފަތެކެވެ.
އަދި ކޮވިޑުގެ ބަލިމަޑުކަމަށް ފަހު، ބަޖެޓު ޑެފިސިޓު އިތުރުވަމުންދިޔަ ނަމަވެސް، ރިކަރަންޓު ޚަރަދުތައް ލިބުނު އާމްދަނީގެ ތެރޭގައި ހިފެހެއްޓިފައި ނުވާކަން އެ ބަޔާނުގައި ފާހަގަކޮށްފައިވެއެވެ.
ޕީއެންސީން ބުނީ، މިދިޔަ ސަރުކާރުން ސިޔާސީ ސަބަބުތަކަށް ޓަކައި ޚަރަދު ކުޑަކުރުމުގެ ފިޔަވަޅުތައް ނާޅައި އޮތް ނަމަވެސް، ރައީސް މުއިއްޒު އެ ފިޔަވަޅުތައް ފެއްޓެވީ ސީދާ އެ މަނިކުފާނާ ހިސާބުން ކަމަށެވެ.
"މިއީ މި ވަގުތު ދިވެހި ދައުލަތުގެ އެންމެ އިސްވއެިޔާގެ ހައިސިއްޔަތުން ދިވެހި މާލިއްޔަތުގެ ދެމެހެއްޓެނިވިކަން ޔަގީންކޮށްދެއްވުމަށް ރައީސް އަޅުއްވަން ނިންމެވި ހަރުދަނާ ފިޔަވަޅުތަކެކެވެ. ސިޔާސީ ގޮތުން އުނދަގޫ، އެހެން ނަމަވެސް ގައުމުގެ ހައްގުގައި ނިންމަވަންޖެހޭ ނިންމެވުމެކެވެ،" އެ ބަޔާނުގައިވެއެވެ.
އެމްޑީޕީން ތުހުމަތުކުރާ ގޮތުގައި ސަރުކާރުން ޚަރަދު ކުޑަކުރުމުގެ ގޮތުން ސިޔާސީ މަގާމުތަކުގެ މުސާރަ ކުޑަ ކުރުމަށް ފިޔަވަޅު އެޅީ އިޚްލާސްތެރި ނިޔަތެއްގައެއް ނޫނެވެ.
ރާއްޖޭގެ ދަރަނި ބޮޑުވެ، ބޭރުގެ އިދާރާތަކުން ވަނީ ލޯންތައް އަނބުރާ ނުދެއްކިދާނެ ކަމުގެ ކަންބޮޑުވުން ފާޅުކޮށްފައެވެ. އެގޮތުން މޫޑީސްއާއި ފިޗުން ވެސް މި އަހަރު ރާއްޖޭގެ ކްރެޑިޓް ރޭޓިން ދަށްކޮށްފައިވާއިރު، މާލީ ލަފާދޭ އިދާރާތަކުން އެންމެ ބޮޑަށް ގޮވައިލަނީ ސަރުކާރުގެ ޚަރަދުތައް ކުޑަކުރުމަށެވެ.