23 Oct 2024, 17:36
ރާއްޖޭގައި ބައިނަލްއަގްވާމީ މާލީ އިދާރާތައް ހިންގުމުގެ މަގުފަހިކުރުމަށް, ރައީސް ޑރ. މުޙައްމަދު މުއިއްޒު އުފައްދަވާ އިންޓަނޭޝަނަލް ފައިނޭންޝަލް ސާވިސަސް އޮތޯރިޓީއަށް ސީއީއޯއެއް ހޯދަން އިއުލާނުކޮށްފިއެވެ.
އިކޮނޮމިކް މިނިސްޓްރީން ކޮށްފައިވާ އިއުލާނެއްގައި ވަނީ، އެ އޮތޯރިޓީއަށް ސީއީއޯއެއް ހޯދަނީ ފަސް އަހަރު މުއްދަތަށް ކަމަށާއި އެ މަގާމުގެ މުސާރައާއި އިނާޔާތްތައް ކަނޑައަޅާނީ ދެ ފަރާތުން މަޝްވަރާކޮށް، މަސައްކަތުގެ ތަޖުރިބާއާއި ފެންވަރަށް ބެލުމަށް ފަހުގައި ކަމަށެވެ.
އެ މަގާމަށް ކުރިމަތިލާ ފަރާތަކުން ފެންވަރު ރަނގަޅު ބިޒްނަސް ސުކޫލަކުން އެމްބީއޭ ހާސިލްކޮށްފައިވާން ޖެހޭއިރު، ފައިނޭންސް އިކޮނޮމިކްސް ނުވަތަ ޕަބްލިކް ޕޮލިސީއާ ގުޅޭ ދާއިރާއަކުން ފަސްޓް ޑިގްރީ ހާސިލްކޮށްފައިވާން ޖެހޭނެ ކަމަށް މިނިސްޓްރީން ބުނެފައިވެއެވެ.
އެ އޮތޯރިޓީއަށް އައްޔަން ކުރާ ސީއީއޯއަކީ އިންޝުއަރެންސާއި ބޭންކިންގެ ދާއިރާގެ އިތުރުން މާލީ ދާއިރާގެ ތަޖުރިބާއާއި އެދާއިރާތަކަށް ފަރިތަ މީހަކަށް ވާން ޖެހެއެވެ. އެ ފަރާތަކީ ބައިނަލްއަގުވާމީ މާލީ ނިޒާމުތަކަށާއި ވިޔަފާރިތަކަށް ހޭލުންތެރި ފަރާތަކަށް ވާން ޖެހޭއިރު، މަގާމާ ގުޅުން ހުރި ދާއިރާއެއްގެ އިސް މަގާމެއް 10 އަހަރު ވަންދެން ފުރުއްވައި، ތަޖުރިބާ ހޯދާފައި ވާންޖެހެއެވެ.
އެ ދާއިރާތަކަކީ:
ފިންޓެކްއާއި ސައިބާ ސެކިއުރިޓީ
މާލީ ދާއިރާގެ ހިންގުމުގެ އޮނިގަނޑުތައް (ބަސެލް، އައިއޭއައިއެސް އަދި އެފްއޭޓީއެފް)
ޑިވެލޮޕްމެންޓް ފައިނޭންޝަލް އިދާރާތަކާއި ކޮމާޝަލް ފައިނޭންޝަލް އިދާރާތައް
އެކި ދާއިރާތަކުގެ ރެގިއުލޭޓަރީ މަސައްކަތް
އިންޓަނޭޝަނަލް ފައިނޭންޝަލް ރިޕޯޓިން ސްޓޭންޑާޑްސް
ޕޭމެންޓު ނިޒާމުތައް، ސެންޓްރަލް ޑިޕޮސިޓަރީސް، ސެންޓްރަލް ކައުންޓާ ޕާޓީސް، ރޭޓިން އެޖެންސީތައް އަދި އެކްސްޗޭންޖުުތައް
މީގެއިތުރުން، އެ މިނިސްޓްރީން ބުނި ގޮތުގައި، ސީއީއޯއަށް މުސާރައިގެ އިތުރުން އެކޮމޮޑޭޝަން އެލަވަންސާއި ޓްރެވަލް އެލަވަންސްގެ އިތުރުން އިންޝުއަރެންސް ވެސް ލިބޭނެއެވެ.
ގާނޫނު އަސާސީން ރައީސަށް ލިބިދޭ ބާރުގެ ދަށުން އެ މަނިކުފާނު މޯލްޑިވްސް އިންޓަނޭޝަނަލް ފައިނޭޝަލް ސާވިސަަސް އޮތޯރިޓީގެ ނަމުގައި އިދާރާއެއް އުފެއްދެވީ 21 ޖެނުއަރީގައެވެ.
އެއީ އިކޮނޮމިކް މިނިސްޓްރީގެ ދަށުން ހިންގާ އިދާރާއެކެވެ. އެ އިދާރާގެ ޗެއާޕާސަންގެ މަގާމަށްވަނީ ކުރީގެ ނައިބު ރައީސް އަބްދުﷲ ޖިހާދު އައްޔަން ކުރައްވައިފައެވެ.