23 Oct 2024, 17:28
ވޮޝިންޓަން (23 އޮކްޓޯބަރު 2024): އީރާނާއި ރަޝިއާއާ ދެމެދު ބަދަހިވަމުންދާ ފަޒާގެ ޓެކްނޮލޮޖީގެ ގުޅުންތަކާމެދު ކަންބޮޑުވާކަން އެމެރިކާ ހާމަކޮށްފިއެވެ.
އެމެރިކާގެ މަސްއޫލުވެރިއަކު ވިދާޅުވިގޮތުގައި ފަޒާގެ ދާއިރާގައި އީރާނާއި ރަޝިއާ ގުޅުން ބަދަހިކުރުމަކީ ޔުކްރެއިންއަށާއި އިސްރާއީލަށް އޮތް ސީދާ ނުރައްކަލަކަށްވާއިރު އެކަމުގެ ނުސީދާ އަސަރު ޔޫރަޕަށާއި މެދުއިރުމައްޗަށް އޮންނާނެއެވެ.
ނަންހާމަކުރަން ނޭދޭ އެމެރިކާގެ މަސްއޫލުވެރިޔާ މިހެން ވިދާޅުވީ ރަޝިއާގެ ރޮކެޓެއްގައި ޖައްވަށް އެރުވުމަށްޓަކައި އީރާނުން ޖާސޫސީ ސެޓަލައިޓަކާއި ކޮމިއުނިކޭޝަން ސެޓަލައިޓެއް ރަޝިއާއަށް ފޮނުވުމާ ގުޅިގެންނެވެ. އީރާނުން ތައްޔާރުކުރި މި ދެ ސެޓަލައިޓް ރަޝިއާއަށް ގެންދިޔައީ މިދިޔަ ހަފުތާގައެވެ.
އެމެރިކާގެ މަސްއޫލުވެރިޔާ ވިދާޅުވިގޮތުގައި އީރާނާއި ރަޝިއާ ބަދަހިކުރަމުންގެންދާ ފަޒާގެ ގުޅުންތަކުގެ ސަބަބުން މެދުއިރުމަތީގައިވާ އިސްރާއީލާއި އެމެރިކާގެ އަސްކަރީ ހައްސާސް ތަންތަން އީރާނަށް އެނގި އެތަންތަނުގެ ފޮޓޯތައް ނެގުމުގެ ފުރުސަތު އީރާނަށް ތަނަވަސްވެގެންދާނެއެވެ. މިއީ ވަރަށް ނުރައްކާތެރި ކަމެއްގެ ގޮތުގައި އެމެރިކާގެ މަސްއޫލުވެރިޔާ ސިފަކުރެއްވިއެވެ.
އީރާނާއި ހިޒްބުﷲއިން އިސްރާއީލަށް ފޮނުވާ މިސައިލްތައް އަރާ ތަންތަނާއި އެ ހަމަލާތަކުން އިސްރާއީލަށް ގެއްލުން ލިބޭ މިންވަރުވެސް ސެޓަލައިޓްތަކުގެ އެހީގައި އީރާނަށް އެނގޭނެއެވެ. މިއީ އެމެރިކާގެ އިތުރުން އިސްރާއީލަށްވެސް ހުރި ނުރައްކަލެއްކަމަށް އެމެރިކާގެ މަސްއޫލުވެރިޔާ ވިދާޅުވިއެވެ.
އީރާނަކީ އަމިއްލަ ރޮކެޓްގައި ޖައްވަށް ސެޓަލައިޓް ފޮނުވާ ގައުމެކެވެ. އީރާން އަމިއްލައަށް ފޮނުވާފައިވާ އަށް ސެޓަލައިޓް ޖައްވުގެ އޯބިޓް ތަކުގައި ދަތުރުކުރަމުން ދެއެވެ.
ދާދިފަހުން އީރާން އިސްރާއީލަށް ދިން މިސައިލް ހަމަލާތަކުގައި އިސްރާއީލަށް ގެއްލުން ލިބުނުވަރާއި އެ މިސައިލްތައް އެރި ތަންތަނުގެ މައުލޫމާތު އީރާނުން ހޯދާފައިވަނީ އެގައުމުގެ އަމިއްލަ ސެޓަލައިޓްތަކުގެ އެހީގައި ކަމަށް އީރާނުގެ ތަސްނީމް ނޫސް އެޖެންސީން ބުނެފައިވެއެވެ.
ފަޒާގެ ޓެކްނޮލޮޖީ ތަރައްގީ ކުރުމަށްޓަކައި އީރާނާއި ރަޝިއާ އާ ދެމެދު ސޮއިކޮށްފައިވާ އެއްބަސްވުމުގެ ދަށުން ކުރުމަށް ރާވާފައިވާ ކަންކަމުގެ ތެރޭގައި އީރާނުގެ އެސްޓްރޮނޯޓުން ރަޝިއާގައި ތަމްރީނު ކުރުމާއި އީރާނުން ގާއިމްކުރަން އުޅޭ އެގައުމުގެ އަމިއްލަ "ސެޓަލައިޓް ނެވިގޭޝަން ސިސްޓަމް" އަށް ބޭނުންވާ ފަންނީ އެހީތެރިކަން ރަޝިއާއިން ލިބުމާއި އީރާނުން އުފައްދާ ބައެއް ސެޓަލައިޓްތައް ރަޝިއާގެ ރޮކެޓްތަކުގައި ޖައްވަށް އެރުވުމާއި ފަޒާގެ ޓެކްނޮލޮޖީއާ ބެހޭ ރީސާޗްތަކުގައި ފަޒާއާބެހޭ އީރާނުގެ ސައެންސްވެރިން ބައިވެރިކުރުން ފަދަ އެތަށް ކަމެއް ހިމެނެއެވެ.
"ސެޓަލައިޓް ނެވިގޭޝަން ސިސްޓަމް"އަކީ އެމެރިކާގެ ޖީޕީއެސް ސިސްޓަމާ އެއްގޮތް ގްލޯބަލް ޕޮޒިޝަނިންގް ނިޒާމެކެވެ.
އީރާން ބުނާގޮތުން އެގައުމުން ބިނާކުރަން މަސައްކަތްކުރާ އަމިއްލަ ސެޓަލައިޓް ގްލޯބަލް ނެވިގޭޝަން ސިސްޓަމްއަށް 100 ސެޓަލައިޓް ބޭނުންވާނެއެވެ. މި ސެޓަލައިޓްތައް އުފެއްދުމަށާއި ފޮނުވުމާއި މިކަމާގުޅޭ އާތު ސްޓޭޝަންތަކާއި ޑިވައިސްތައް އުފެއްދުމަށް އަށެއްކަ އަހަރު ނަގާނެ ކަމަށް އީރާން ބުނެއެވެ.
ރަޝިއާއަކީވެސް އެގައުމުގެ އަމިއްލަ "ސެޓަލައިޓް ނެވިގޭޝަން ސިސްޓަމް" އެއް އޮންނަ ގައުމެކެވެ. އެއީ "ގްލޯބަލް ނަޔާ ނެވިގޭޓްސިއޮންނަޔާ ސްޕުޓް ނިކޮވަޔާ ސިސްޓެމާ" ނުވަތަ ކުރުކޮށް "ގްލޯނަސް" އެވެ.
ތުރުކީވެސް ގެންދަނީ އެގައުމުގެ އަމިއްލަ ސެޓަލައިޓް ޕޮޒިޝަނިން ސިސްޓަމްއެއް ބިނާކުރަން މަސައްކަތް ކުރަމުންނެވެ. ޗައިނާއަކީވެސް އެގައުމުގެ އަމިއްލަ ސެޓަލައިޓް ޕޮޒިޝަނިން ސިސްޓަމްއެއް ބިނާކޮށްފައިވާ ގައުމެކެވެ.