23 Oct 2024, 16:07
ޓެލްއަވީވު (23 އޮކްޓޯބަރު 2024): އިސްރާއީލުގެ ވެރިރަށް ޓެލްއަވީވުގައި ބާރުގަދަ ގޮވުންތަކެއް ގޮވުމާއެކު އިސްރާއީލުގެ މައި އެއާޕޯޓް ކަމަށްވާ ބެންގޯރިއަން އެއާޕޯޓް ވަގުތީ ގޮތުން ބަންދުކޮށްފިއެވެ.
އިސްރާއީލު ސިފައިންގެ ރޭޑިއޯ ބުނާގޮތުން ހެނދުނު ގިނަ ބަޔަކު ސްކޫލްތަކަށާއި އޮފީސްތަކަށާއި ކާރުޚާނާތަކަށް ދިޔަވަގުތު ސިފައިންވަނީ ކުއްލި ގޮތަކަށް ބިންގަރާސްތަކަށް ވަނުމަށް އާންމުންނަށް ގޮވާލާ ސައިރަން އަޅަންފަށާފައެވެ. އޭގެ އަޑުން ޓެލްއަވީވު ގުގުމާލިއެވެ. މިއާއެކު ބާރުގަދަ ގޮވުންތަކެއްގެ އަޑު ޓެލްއަވީވުގެ ދެތިން ސަރަހައްދަކުންވަނީ އިވިފައެވެ.
މިކަމުގެ ސަބަބުން މީހުންގެ ހިތްތަކުގައި ބިރުވެރިކަން އުފެދިފައިވާއިރު މިހާލަތު ވަރަށް ގިނައިން އިސްރާއީލުގެ ސިޓީތަކާއި ޓައުންތަކަށް ކުރިމަތިވެފައިވާކަމަށް ރިޕޯޓްތައް ބުނެއެވެ. ޓެލްއަވީވުގައި ގޮވި ބާރުގަދަ ގޮވުންތަކަށްފަހު އިސްރާއީލުގެ ސިފައިން ނެރުނު ބަޔާނެއްގައި ބުނެފައިވަނީ ހިޒްބުﷲ އިން ފޮނުވާލި ބަލިސްޓިކް މިސައިލްތަކަކަށް ހުރަސްއެޅުމަށް ވައިގެ ދިފާއީ ނިޒާމުތަކުން ގިނަ އަދަދެއްގެ އެންޓި ބަލިސްޓިކް ފޮނުވާލި ކަމުގައެވެ. ހިޒްބުﷲގެ މިސައިލްތަކުން ގެއްލުމެއް ލިބުނުކަން އިސްރާއީލުން ހާމަކޮށްފައެއް ނުވެއެވެ.
ކުރިން ހިޒްބުﷲ އިން ހަމަލާދެނީ އިސްރާއީލުގެ އުތުރުގެ ސަރަހައްދުތަކަށް އެކަންޏެވެ. ނަމަވެސް އިސްރާއީލުން ހިޒްބުﷲގެ ވެރިން ޝަހީދުކޮށްލުމާއި ލުބްނާނުގެ އާންމުންގެ ގެދޮރަށް ހަމަލާދީ އާންމުން މަރަން ފެށުމުން ހިޒްބުﷲ ވަނީ އިސްރާއީލުގެ އިގްތިސާދީ ސިޓީކަމަށްވާ ހައިފާއަށްވެސް ބަލިސްޓިކް މިސައިލުން ހަމަލާދޭން ފަށާފައެވެ. ހިޒްބުﷲ ބުނާގޮތުން އިސްރާއީލުން ޣައްޒާގެ އާންމުންނާއި ލުބްނާނުގެ އާންމުން މަރަންދޭ ހަމަލާތައް ނުހުއްޓާނަމަ އިސްރާއީލުން ޣައްޒާ ފުނޑާލި ގޮތަށް ހިޒްބުﷲގެ ހަމަލާތަކުން ދިގު މުއްދަތަކުން އިސްރާއީލުގެ ހައިފާ ފުނޑާލާނެއެވެ.
މިހާރު ހިޒްބުﷲ މިވަނީ ހައިފާއަށް ހަމަލާދިނުމުގެ އިތުރުން އިސްރާއީލުގެ ވެރިރަށް ޓެލްއަވީވަށްވެސް ހަމަލާ ދޭން ފަށާފައެވެ. ޓެލްއަވީވަކީ ލުބްނާނާ 150 ވަރަކަށް ކިލޯމީޓަރު ދުރުގައިވާ ސިޓީއެކެވެ. އިސްރާއީލާ ކުރިމަތިލުމުގައި ހިޒްބުﷲ ގެންގުޅޭ ސްޓްރެޓެޖީ އަކީ ހަނގުރާމަ ދިގުދަންމައިގެން އިސްރާއީލަކީ އަމާންކަން ނެތް ގައުމެއްގެ ގޮތުގައި ހެދުމެވެ.
އެގޮތަށް ހެދުމުން އިސްރާއީލުގެ މޮޅެތި ސިކުނޑިތަކާއި އިންވެސްޓަރުންނާއި އަދި އެމެރިކާއާއި ޔޫރަޕުން ހިޖުރަކޮށްގެން އުޅޭ ޔަހޫދީން އެގައުމު ދޫކޮށް ދޭނެތީއެވެ. ރިޕޯޓްތައް ބުނާގޮތުން މިހާރުވެސް ހަތްލައްކައެއްހާ މީހުންވަނީ އިސްރާއީލު ދޫކޮށް ގޮސްފައެވެ. އަދި އެތައް ހާސް ކުންފުންޏެއްވެސްވަނީ އިސްރާއީލު ދޫކޮށް ގޮސްފައެވެ. ހައިޓެކްގެ ބައެއް ކުންފުނިތައްވެސް އިސްރާއީލު ދޫކޮށްދާކަމަށް ޚަބަރުލިބެއެވެ. މިކަމުގެ ސަބަބުން އިސްރާއީލު އިގްތިސާދީ ގޮތުން ވަރަށް ބޮޑަށް ބަލިކަށިވެގެންދާނެކަމަށް މުހައްލިލުން ވިދާޅުވެއެވެ.