23 Oct 2024, 12:39
ޓެކްސް ބޮޑުކުރުމުގެ ދެ ބިލު އިތުރަށް ދިރާސާކުރަން ރައްޔިތުންގެ މަޖިލީހުގެ މާލިއްޔަތު ކޮމިޓީއާއި އިގުތިސާދީ ކޮމިޓީގެ ސަބް ކޮމިޓީއަކަށް މިއަދު ފޮނުވައިފިއެވެ.
ޓެކްސްތައް ބޮޑުކުރުމާ ބެހޭ ބިލުތަކުގެ މަސައްކަތްކުރަން ފުރަތަމަ ނިންމީ މުޅި މަޖިލީހުގެ ކޮމިޓީގައެވެ. އެކަމަކު، އެ ކޮމިޓީގައި ބައެއް މެންބަރުންގެ ހިޔާލު ތަފާތުވެ، ޕީއެންސީގެ ޕާލިމަންޓްރީ ގްރޫޕުގެ ލީޑަރު އިބްރާހިމް ފަލާހް ވަނީ މައްސަލަ ދިރާސާކޮށް، ގޮތެއް ނިންމަން ސަބް ކޮމިޓީއަކަށް ފޮނުވަން ހުށަހަޅުއްވާފައެވެ.
ފަތުރުވެރިކަމުގެ މުދަލާއި ޚިދުމަތުގެ އަގުން ޓެކްސް ނެގުމުގެ ގާނޫނަށް ސަރުކާރުގެ ފަރާތުން ހުށަހަޅާފައިވާ ބިލު ސަބް ކޮމިޓީއަށް ފޮނުވުމަށް ނިންމާފައިވަނީ ވޯޓުގައި ބައިވެރިވި 62 މެންބަރުންގެ އިއްތިފާގުންނެވެ.
ދިވެހިރާއްޖޭގެ އެއާޕޯޓްތަކުން ރާއްޖޭން ބޭރަށް ފުރާ ފަސިންޖަރުންގެ އަތުން ޓެކުހާއި ފީ ނެގުމާ ބެހޭ ގާނޫނު ވެސް ކޮމިޓީއަށް ފޮނުވަން މިއަދުގެ ޖަލްސާގައި ވަނީ ވޯޓަށް އަހާފައެވެ. އެ ބިލު ސަބްކޮމިޓީއަށް ފޮނުވީ ވެސް ވޯޓުގައި ބައިވެރިވި 62 މެންބަރުންގެ އިއްތިފާގުންނެވެ.
މުދަލާއި ޚިދުމަތުގެ އަގުން ޓެކްސް ނެގުމުގެ ގާނުނަށް ހުށަހެޅި އިސްލާހުގައި ބުނެފައިވަނީ ޓީޖީއެސްޓީގެ ގޮތުގައި މިހާރު ނަގަމުން އަންނަ 16 ޕަސެންޓް، އަންނަ އަހަރުގެ ޖޫން މަހުގެ ފުރަތަމަ ދުވަހުން ފެށިގެން 17 ޕަސެންޓަށް ބޮޑު ކުރުމަށެވެ.
މި އިސްލާހުތަކަށް ތާއީދުކުރި ނަމަވެސް ޓެކްސް ބޮޑުކުރާ ތާރީޚާ ގުޅޭ ގޮތުން ވެރިކަން ކުރާ ޕީއެންސީއަށް ނިސްބަތްވާ ބައެއް މެންބަރުން ވެސް ވަނީ ކަންބޮޑުވުން ފާޅުކުރައްވާފައެވެ.
މަޖިލީހުގެ ޖަލްސާއެއްގެ ތެރެއިން: ޓެކްސް ބޮޑުކުރުމުގެ ދެ ބިލު އިތުރަށް ދިރާސާކުރަން ސަބް ކޮމިޓީއަކަށް ފޮނުވާލައިފި -- ފޮޓޯ/ މަޖިލިސް
މި އިސްލާހު މަޖިލީހުން ބަލައިގެންފައިވަނީ 52 މެންބަރުންގެ ވޯޓާ އެކުއެވެ. މި އިސްލާހު ބަލައިގަތުމާ ދެކޮޅަށް ހަތް މެންބަރަކު ވޯޓު ދެއްވިއެވެ.
އޭގެ އިތުރުން، އެއާޕޯޓުތަކުން ފުރާ ފަސިންޖަރުންގެ އަތުން ނަގާ ޓެކުހާއި ފީ ބޮޑުކުރުމާ ބެހޭ ގާނޫނަށް ހުށަހަޅާފައިވާ އިސްލާހުގައިވަނީ އަންނަ ޑިސެމްބަރު މަހުން ފެށިގެން ޑިޕާޗާ ޓެކްސް ބޮޑުކުރުމަށެވެ.
އެގޮތުން:
އިކޮނޮމީ ކުލާހުން ފުރާ ދިވެހިން އަތުން ޓެކްސްގެ ގޮތުގައި 12 ޑޮލަރު ނަގާއިރު އާ އިސްލާހުގައި އެ އަދަދު ބޮޑު ކުރަން ހުށަހަޅާފައެއް ނެތް.
- އިކޮނޮމީ ކުލާހުން ފުރާ ބިދޭސީންގެ އަތުން މިހާރު ނަގާ 30 ޑޮލަރުގެ ބަދަލުގައި ދެން 50 ޑޮލަރު ނެގުމަށް ވަނީ ހުށަހަޅައިފައި.
- ބިޒްނަސް ކުލާހުން ފުރާ ދިވެހިންނާއި ބިދޭސީންގެ އަތުން 60 ޑޮލަރުގެ ޓެކްސްއެއް ނަގާއިރު އިސްލާހުގައި ވަނީ 120 ޑޮލަރު ނެގުމަށް ހުށަހަޅައިފައި.
- ފަސްޓް ކުލާހުން ފުރާ ދިވެހިންނާއި ބިދޭސީންގެ އަތުން 90 ޑޮލަރު މިހާރު ނަގާއިރު އިސްލާހުގައި 240 ޑޮލަރު ނަގަން ވަނީ ހުށަހަޅައިފައި.
- ޕްރައިވެޓް ޖެޓްގައި ފުރާ މީހުންގެ އަތުން މިހާރު 120 ޑޮލަރު މިހާރު ނަގާއިރު އިސްލާހުގައި ވަނީ 480 ޑޮލަރު ނެގުމަށް ވަނީ ހުށަހަޅާފައި.