23 Oct 2024, 09:08
ގިނަ ބައެއްގެ މަގުބޫލުކަން ހޯދި ފިލްމު "ފެޝަން"ގެ ޑައިރެކްޓަރު މަދުރު ބަންޑާކަރުގެ އުފައްދާ އާ ފިލްމު ބިނާކޮށްފައި ވަނީ އިންޑިއާގެ ފިލްމު އިންޑަސްޓްރީގައި މަސައްކަތްކުރާ އަނބިންގެ ދިރިއުޅުމަށް ކަމަށް ބުނެފިއެވެ.
އަންނަ އަހަރު މަސައްކަތް ފަށަން ނިންމާފައިވާ މި ފިލްމުގެ ނަމަކީ "ވައިވްސް އޮފް ބޮލީވުޑް"އެވެ. މަދުރު އަމިއްލައަށް ޕްރޮޑިއުސްކުރާ މި ފިލްމުގެ ކާސްޓުން މިހާތަނަށް އިއުލާނުކޮށްފައި ނުވާއިރު އިންޑަސްޓްރީގެ އަނބިންގެ ދިރިއުޅުމުގައި ފަރުދާގެ ފުރަގަހުގައި ހިނގާފައިވާ ހަގީގަތް ނޭނގޭ ގިނަ ވާހަކަތަކެއް ކިޔައިދޭނެ ކަމަށް ރިޕޯޓުތައް ބުނެއެވެ.
މި ފިލްމު ގެނެސްދިނުމުގެ އެންމެ ބޮޑު އެއް ބޭނުމަކީ ފިލްމީ ތަރިންގެ އަނބިންގެ ޒާތީ ދިރިއުޅުމާ ބެހޭގޮތުން އާއްމުކޮށް ދެކެވޭ ހަގީގަތާ ހިލާފު ވާހަކަތަކުގެ ހަގީގަތް ކިޔައިދިނުން ކަމަށް މަދުރު ވަނީ ބުނެފައެވެ.
މަދުރު ފިލްމު "ފެޝަން"ގެ ލީޑް ބަތަލާއިން ކަމަށްވާ ޕްރިޔަންކާ އަދި ކަންގަނާއާ އެކު--ފޮޓޯ/ބޮލީވުޑްހަންގާމާ
ނެޝަނަލް އެވޯޑު އަދި އިންޑިއާގެ ސަރުކާރުންދޭ ޕަދުމާ ޝްރީ އެވޯޑު ހާސިލުކޮށްފައިވާ މަދުރުގެ މަގުބޫލު ފިލްމުތަކުގެތެރޭ "ފެޝަން"، "ހީރޮއިން" އަދި "ޕޭޖް 3" ހިމެނެއެވެ.
މަދުރު މިދިޔަ އަހަރު ގެނެސްދިން ފިލްމު "އިންޑިއާ ލޮކްޑައުން"އަކީ ކޮވިޑް ވަބާގެ ދުވަސްވަރު އިންޑިއާގެ އެކި ސަރަހައްދު ތަކުގައި މަސައްކަތްކުރި މީހުންގެ ދިރިއުޅުމަށް އައި ބަދަލުތައް ދައްކުވައިދިން ފިލްމެކެވެ. މަދުރު 2008ވަނަ އަހަރު ގެނެސްދިން ފިލްމު "ފެޝަން"ގެ ސީކުއަލްއެއް ވެސް އުފައްދާނެކަން އޭނާ ވަނީ އިއުލާނު ކޮށްފައެވެ.