22 Oct 2024, 13:01
ސިނގިރޭޓުން ނަގާ ޓެކްސް ބޮޑުކުރަން ނިންމައި ވޭޕު މަނާކުރަން ސަރުކާރުން ނިންމުމުން ދުންފަތުގެ އިސްތިއުމާލުކުރުން ހުއްޓާލަން ނިންމާފައި ވާކަމަށް އެމްޑީއޭއަށް ނިސްބަތްވާ ރައްޔިތުންގެ މަޖިލީހުގެ ވެލިދޫ ދާއިރާގެ މެމްބަރު މުޙައްމަދު އައްބާސް މިއަދު ވިދާޅުވެއްޖެއެވެ.
ސިނގިރޭޓާއި ދުންފަތުން ނަގާ ޓެކްސް ބޮޑުކޮށް އީ ސިނގިރޭޓާއި ވޭޕުން މަނާކުރާ މުއްދަތާ ހަމައަށް އެތަކެތިން ނަގާ ޓެކްސް ބޮޑުކުރުމަށް ސަރުކާރުގެ ފަރާތުން ހުށަހެޅި ބިލަށް ވާހަކަ ދައްކަވަމުން އައްބާސް ވިދާޅުވީ މަޖިލީހުގެ ބައެއް އިއްޒަތްތެރި މެމްބަރުން ސިނގިރޭޓު ހުއްޓާލުމަށް ވަރަށް ބޮޑަށް އާދޭހާއި އެކުގައި ދަންނަވާކަމަށެވެ. އޭނާއަކީ ދުވާލަކު ދެ ފޮށި ސިނގިރޭޓު ބުއި މީހެއް ކަމަށާއި ނަމަވެސް ނޮވެމްބަރު މަހުގެ 15ވަނަ ދުވަހުން ފެށިގެން ސިނގިރޭޓު ހުއްޓާލުމަށް ނިންމާފައި ވާކަމަށް އޭނާ ވިދާޅުވިއެވެ.
އައްބާސް ވިދާޅުވީ ދުންފަތާއި ދުންފަތާ ގުޅުންހުރި އެންމެހައި އާލާތްތަކުން ވަކިން ހާއްސަކޮށް ސިނގިރޭޓާއި ބިޑިއާ ވޭޕްގެ އިތުރުން ވޭޕާ ގުޅުންހުރި ހުރިހާ ބާވަތްތަކުން ނަގާ ޓެކްސް ބޮޑުކުރުމަށް ފުރިހަމައަށް ތާއީދު ކުރައްވާކަމަށެވެ.
ދުންފަތާއި ދުންފަތާ ގުޅުންހުރި ބާވަތްތަކުން ނަގާ ޓެކްސް ބޮޑުކުރުމަށް މަޖިލީހުން ނިންމަވައިފި ކަމުގައި ވާނަމަ އެކަމަށް ވެސް ދިވެހި ރައްޔިތުން ތާއީދު ކުރައްވާނެ ކަމަށް އައްބާސް ވަނީ ވިދާޅުވެފައެވެ. ނަމަވެސް އިދިކޮޅު ފަރާތްތަކުން ބޭނުންވަނީ ރައްޔިތުންނަށް ހަގީގަތް އޮޅުވާލާ ރައްޔިތުންގެ ތެރެއިން ބަޔަކު މަގުމައްޗަށް ނެރެ މުޒާހަރާކުރުވާ ޒުވާނުންނަކީ އެބޭފުޅުންގެ ސިޔާސީ އައްޑަނައަކަށް ހެދުންކަމަށް އައްބާސް ވަނީ ވިދާޅުވެފައެވެ.
އޭނާ ވިދާޅުވީ މި ފިޔަވަޅަކީ އާންމު ދިރިއުޅުމުގެ އިގްތިސޯދީ ހާލަތު ރަނގަޅުވެ ދުންފަތަށް ކުރާ ހޭދަ ނިމުމަކަށް އައިސް އާއިލާގެ ދިރިއުޅުމުގެ ހާލަތު ރަނގަޅުކުރުމަށް އެ ފައިސާ ހަރަދުކުރެވުމަށް އެޅޭ މުހިންމު ފިޔަވަޅެއް ކަމަށެވެ.
"މިއީ ޒުވާން ޖީލަށް ކޮށްދޭ ހެޔޮކަމެއް. އަންނަން އޮތް ޖީލަށް ކޮށްދެން އޮތް ހެޔޮކަމެއް. މިއަދުގެ ތުއްތު ކުދީންނަށް ކޮށްދޭން އޮތް ހެޔޮކަމެއް. މީގެ ސަބަބުން ރާއްޖެއިން ބޭރުވާ ބޭރު ފައިސާ ވެސް މަދުވެގެންދާނެ." އައްބާސް ވިދާޅުވިއެވެ.
އަދި މިފަދަ ވަގުތެއްގައި މިފަދަ ހަރުދަނާ ގައުމީ ނިންމުމެއް ނިންމި ކަމަށްޓަކައި ވަޒީރުންގެ މަޖިލީހާއި ރައީސް ޑރ. މުޙައްމަދު މުއިއްޒަށް އައްބާސް ވަނީ ވަރަށް އިޚުލާސްތެރިކަމާއެކު ޝުކުރު ދަންނަވާފައެވެ. އަދި މަޖިލީހުގައި ބިލަށް ވޯޓުދެއްވާ އެންމެހައި މެންބަރުންނަށްވެސް އައްބާސް ވަނީ ޝުކުރު އަދާކޮށްފައެވެ.
މީގެ އިތުރުން މިއަދުގެ މަޖިލީހުގައި ޕީއެންސީގެ ޕާލިމެންޓްރީ ގްރޫޕުގެ ޑެޕިއުޓީ ލީޑަރު މުހައްމަދު އިސްމާއިލް ވަނީ ސިނގިރޭޓު ބޯ މީހުންނަށް އާސަންދަ ނުދޭން ވެސް ގޮވައިލާފައެވެ.
އޭނާ ވިދާޅުވީ، ސިނގިރޭޓާއި ދުންފަތުގެ ބާވަތްތައް ބޭނުންކޮށްގެން ބޮޑެތި ބަލިތައްވުމުން ވެސް ބޭސްކުރަންޖެހެނީ އާސަންދައިން ކަމަށެވެ. އަދި ސިނގިރޭޓު ބުއިމަކީ ސިއްހަތަށް ގެއްލުންހުރި ކަމެއްކަން ރައްޔިތުންނަށް ވަރަށް ސާފުކޮށް އެނގޭ ކަމަށް އޭނާ ވަނީ ވިދާޅުވެފައެވެ