22 Oct 2024, 12:23
ބްރެޒިލްގެ ފޯވާޑް ނޭމާ އަނިޔާގެ ސަބަބުން ކުޅުމާ ދުރުގާ އަހަރެއްހާ ދުވަސް ހޭދަކުރުމަށްފަހު ފުރަތަމަ ފަހަރަށް އަލް ހިލާލަށް ކުޅެފިއެވެ.
ނޭމާގެ ވައަތު ކަކުލަށް އަނިޔާވެފައިވަނީ މިދިޔަ އަހަރުގެ އޮކްޓޫބަރު މަހުގެ 17ވަނަ ދުވަހު ވާލްޑް ކަޕް ކޮލިފައިން މެޗެއްގައި ބްރެޒިލް ތަމްސީލް ކުރަނިކޮށެވެ. އަދި އެއާއެކު ޖެހިގެން އައި މަހު ނޭމާ ވަނީ ޑޮކްޓަރުގެ ލަފާގެ މަތިން ކަކުލުގެ އޮޕަރޭޝަން ކޮށްފައެވެ. އަހަރެއްހާ ދުވަހުގެ ތެރޭގައި ނޭމާ ކުޅުނު ފުރަތަމަ މެޗަށް ވެގެންދިޔައީ އޭޝިއަން ޗެމްޕިއަންސް ލިގުގައި ޔުއޭއީ ޕްރޯ ލީގުގެ އަލް އައިން އާއި ބައްދަލުކުރި މެޗެވެ.
މިމެޗުގައި ނޭމާ ކުޅެން އަރާފައިވަނީ މެޗުގެ 77ވަނަ މިނެޓުގައި ބަދަލު ކުޅުންތެރިއެއްގެ ގޮތުގައެވެ. މިމެޗު ފަސް ލަނޑު ހަތަރު ލަނޑުން ކާމިޔާބު ކޮށްފައިވަނީ އަލް ހިލާލްއެވެ. މިމެޗު ނިމެން ގާތްވެފައިވަނިކޮށް އުފެއްދި ކައުންޓާ އެޓޭކެއްގައި ނޭމާއަށް ލަނޑެއް ޖެހުމުގެ ފުރުސަތު ލިބުން ނަމަވެސް އެކަން ކާމިޔާބު ވާގޮތެއް ނުވިއެވެ. ނޭމާ ސައުދީ ޕްރޯ ލީގުގެ އަލް ހިލާލަށް ބަދަލުވެފައިވަނީ މިދިޔަ އަހަރުގެ އޮގްސްޓް މަހު ފްރެންޗް ލީގު އާންގެ ޗެމްޕިއަން ޕެރިސް ސެއިންޓް ޖާމެއިން އިން 90 މިލިއަން ޔޫރޯގެ އަގަކަށެވެ. އޭނާ ޕީއެސްޖީގައި ހޭދަކުރި ފަހު ދެ އަހަރުވެސް ވަނީ ކަކުލަށް ލިބިފައިވި އަނިޔާ އަކާއި ގުޅިގެން ގިނަ މަސްތަކެއް ވަންދެން ކުޅުމާއި ދުރުގައި ހޭދަކޮށްފައެވެ. އަދި އަލް ހިލާލް އަށް ބަދަލުވުމަށްފަހު އަނިޔާ ވުމުގެ ކުރިން އޭނާއަށް އެކްލަބަށް ކުޅެވިފައިވަނީ އެންމެ ފަސް ފަހަރުއެވެ.
ނޭމާ އަކީ ބްރެޒިލް ޤައުމީ ޓީމުގައި ވެސް މުހިންމު ކުޅުންތެރިއެއް ކަމުން އޭނާގެ އެނބުރި އައުން ވެގެންދާނީ ބްރެޒިލްއަށް ލިބިގެންދާނެ ހިތްހަމަ ޖެހުމަކަށެވެ. ނޭމާ ބްރެޒިލްއަށް 128 ފަހަރު ކުޅެފައިވާއިރު އޭނާ އަކީ އެޓީމަށް އެންމެ ގިނަ ލަނޑު ޖަހާދީފަވާ ކުޅުންތެރިޔާއެވެ.