22 Oct 2024, 12:09
އިންގްލިޝް ޕްރިމިއާ ލީގުގައި ނޮޓިންހަމް ފޮރެސްޓް އާއި ކްރިސްޓަލް ޕެލަސް ބައްދަލުކުރި މެޗު ފޮރެސްޓް ކާމިޔާބު ކޮށްފިއެވެ.
ފޮރެސްޓްގެ ދަނޑުގައި ކުޅުނު މިމެޗު އެޓީމު ކާމިޔާބު ކޮށްފައިވަނީ އެއް ލަނޑު ސުން ލަނޑުންނެވެ. ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ދެޓީމުގެ ފަރާތުން ފެނިގެންދިޔައީ ވަރަށް ހަމަހަމަ ކުޅުމެކެވެ. އަދި ދެޓީމަށް ހަމަލާ އުފެއްދިފައިވަނީ ވެސް އެއްވަރަކަށެވެ.
މިމެޗުގެ ފެށުން ރަނގަޅުވީ ޕެލަސްގެއެވެ. މިގޮތުން އެޓީމުންވަނީ ރަނގަޅު ކުޅުމެއް ދައްކާ ނުރައްކާތެރި ހަމަލާތަކެއް ފޮރެސްޓްގެ ގޯލަށް އަމާޒުކޮށްފައެވެ. މިގޮތުން އެބެރެޗީ އެޒޭ އާއި އެދީ އެންކޭޓިއާ ފޮނުވާލި ދެ ހަމަލާއެއްވަނީ ފޮރެސްޓް ގޯލްގެ ދަނޑިއަށް އަމާޒުވެފައެވެ. ނަމަވެސް މާގިނައިރު ތަކެއް ނުވެ ފޮރެސްޓްއިން ވެސް ވަނީ އެޓީމުގެ ކުޅުން ރަނގަޅުކޮށް ޕެލަސްއަށް ނުރައްކާ ކުރަން ފަށައިފައެވެ.
މިގޮތުން އެޓީމުން ވެސް ނުރައްކާތެރި ހަމަލާތަކެއް އުފެއްދިތަން ފެނިގެންދިޔައެވެ. މިގޮތުން ކްރިސް ވުޑްސްގެ ފަރާތުން ރަނގަޅު ދެތިން ހަމަލާ ފެނިގެންދިޔަ އިރު ރަޔަން ޔޭޓްސް ފޮނުވާލި ހަމަލާއެއްވަނީ ޕެލަސްގެ ގޯލްގެ ދަނޑިއަށް އަމާޒު ވެފައެވެ.
މިމެޗުގެ ހަމައެކަނި ލަނޑު މެޗުގެ 65ވަނަ މިނެޓުގައި އެޓީމަށް ކާމިޔާބު ކޮށްދިނީ ވުޑްސްއެވެ. ނަމަވެސް މިލަނޑު ޕެލަސް ގޯލަށް ވަނުމުގައި އެޓީމުގެ ޑީން ހެންޑަސަންއަށް ހެދުނު ގޯސް ވަރަށް ބޮޑު ދައުރެއް އަދާކުރިއެވެ. ވުޑްސް ފޮނުވާލި ހަމަލާ ޕަލަސްގެ ގޯލަށް ވަދެފައިވަނީ ހެންޑަސަން ދިފާއު ކުރަން އުޅުމުގެ ތެރޭގައި އަތް ދަށުން ގޮހެވެ. މިމެޗުގައި އިތުރު ލަނޑެއް ފެނިގެން ނުދިޔަ ނަމަވެސް ދެޓީމަށް ވެސް ވަނީ ލަނޑު ޖަހާނެ ރަނގަޅު ފުރުސަތު ލިބިފައެވެ.
މިދިޔަ ސީޒަންގައި ޕެލަސް އިން ކުޅުނު ފަހު ހަތް މެޗުގެ ތެރެއިން ހަ މެޗު ކާމިޔާބު ކޮށްފައިވީ ނަމަވެސް މިސީޒަންގައި ޕެލަސްއަށް މިވަނީ މިހާތަނަށް އަށް މެޗު ކުޅުނު އިރު އެއްވެސް މެޗެއް ކާމިޔާބު ނުކުރެވިއެވެ. މިއީ ވޭތުވެދިޔަ 31 އަހަރުގެ ތެރޭގައި ސީޒަނެއްގެ ފެށުމުގައި މެޗަކުން މޮޅުނުވެ ޕެލަސް އެންމެ ގިނަ ދުވަސް ވީ ފަހަރެވެ.
މިކާމިޔާބީ އާއެކު ޕެލަސް މިހާރު އުޅެނީ ކުޅުނު އަށް މެޗުން ލިބިފައިވާ 13 ޕޮއިންޓާއެކު ތާވަލްގެ އަށް ވަނައަށް ކުރިއަށް ޖެހިލާފައެވެ. އަދި ޕެލަސް އުޅެނީ ތިން ޕޮއިންޓާއެކު ތާވަލްގެ 18 ވަނައިގައެވެ.