22 Oct 2024, 08:58
އިންޑިއާގެ ޕަންޖާބު ލަވަކިޔުންތެރިޔާ/އެކްޓަރު ދިލްޖީތު ދޯންސާޖަށް އިންޑިއާގެ އިތުރުން ބޭރު ދުނިޔޭގެ ގިނަ ބައެއްގެ ސަމާލުކަން އަންނަނީ ލިބެމުންނެވެ.
އިންޑިއާގެ އިތުރުން ބޭރު ދުނިޔޭގެ ބައެއް ޤައުމުތަކުގައި ސްޓޭޖް ޝޯތައް ދެމުން އަންނަ ލަވަކިޔުންތެރިޔާއަށް ދާދި ފަހުން ވަނީ ބިލްބޯޑު ކެނެޑާގެ ބޭރު ގަނޑުގައި ފީޗާކުރި ފުރަތަމަ އިންޑިއާ އާޓިސްޓުގެ މަގާމު ވެސް ލިބިފައެވެ.
ބިލްބޯޑު ކެނެޑާއަކީ އެމެރިކާގައި މުނިފޫހިފިލުވުމުގެ ދާއިރާއަށް ހާއްސަކޮށް ނެރޭ، އާއްމުންގެ މެދުގައި ބޮޑު މަގުބޫލުކަމެއް ހޯދާފައިވާ މެގަޒިންއެކެވެ.
ބިލްބޯޑު ކެނެޑާއިން މިކަން އިއުލާނު ކުރަމުން ބުނީ ދިލްޖީތަކީ މިހާރު ބޭރު ދުނިޔެއަށް އާ ނަމެއް ނޫން ކަމަށާއި މި މެގަޒިންއިން ލިބުނު ފުރުސަތާ އެކު އެއީ މިހާރު ގްލޯބަލް އައިކަންއެއް ކަމަށެވެ.
މި މެގަޒިންގައި ދިލްޖީތުގެ މިއުޒިކް ކެރިއަރު އަދި ފިލްމު އިންޑަސްޓްރީގައި އެކްޓަރެއްގެ ގޮތުން ކުރާ މަސައްކަތްތަކާ ބެހޭ ހާއްސަ އިންޓަވިއުއެއް ހިމެނޭއިރު ދާދިފަހުން ލަންޑަންގައި ކުރިއަށް ދިޔަ ދިލްޖީތުގެ ކޮންސެޓްގެ ބައެއް ފޮޓޯތައް ވެސް ވަނީ ޝާއިއު ކުރެވިފައެވެ.
ދިލްޖީތު ބަތަލާ ޕަރިނީތީ ޗޯޕްޅާއާ އެކު ފިލްމު "ޗަމްކީލާ"ގެ މަންޒަރެއްގައި--ފޮޓޯ/ކޮއިމޮއި
މި އަހަރުގެ އޭޕްރީލް މަހުން ފެށިގެން ދިލްޖީތު ވަނީ އެމެރިކާގެ ޗިކާގޯ، ކެލިފޯނިއާ އަދި އުތުރު އެމެރިކާގެ ބައެއް ސަރަހައްދުތަކުގައި ސްޓޭޖް ޝޯތަކެއް ބާއްވާފައެވެ. މި މަހުގެ 26 ވަނަ ދުވަހު ދިލްޖީތުގެ ޝޯއެއް އިންޑިއާގެ ނިއު ދިއްލީގައި ވެސް ބާއްވަން އަންނަނީ ތައްޔާރު ވަމުންނެވެ.
ދިލްޖީތު މުހިއްމު ރޯލެއް ކުޅުނު ޑައިރެކްޓަރު އިމްތިޔާޒު އަލީގެ ފިލްމު "ޗަމްކީލާ"އަށް ލިބުނު ކާމިޔާބީއާ އެކު ފިލްމުތަކުން ވެސް އޭނާއަށް އަންނަނީ ގިނަ ފުރުސަތުތަކެއް ލިބެމުންނެވެ.
ދިލްޖީތުގެ ކުރިއަށްހުރި ފިލްމުތަކުގެ ތެރޭ ސަނީ ޑިއޯލްއާ އެކު ކުޅޭ ފިލްމު "ބޯޑާ 2" ހިމެނޭއިރު އޭނާ ވަނީ އަންނަ މަހު އެއް ވަނަ ދުވަހު ރިލީޒްކުރާ ފިލްމު "ބޫލް ބުލައްޔާ 3"އަށް މަޝްހޫރު ލަވަކިޔުންތެރިޔާ ޕިޓްބުލްއާ އެކު ލަވައެއް ހުށަހަޅައިދީފައެވެ.