21 Oct 2024, 11:26
މަސްތުވާތަކެއްޗާ އެކު ވެލާނާ އިންޓާނެޝަނަލް އެއާޕޯޓުން އަތުލައިގެން ޒުވާނާގެ ބަންދަށް ކްރިމިނަލް ކޯޓުން އިއްޔެ 15 ދުވަސް ޖަހައިފިއެވެ.
މި މައްސަލައިގައި ފުލުހުން ހައްޔަރުކޮށްފައިވަނީ 33 އަހަރުގެ ދިވެހި ފިރިހެނެކެވެ.
އޭނާ ހައްޔަރުކުރީ 1.86 ކިލޯގެ މަސްތުވާތަކެތި އެތެރެކުރަން އުޅެނިކޮށް އެއާޕޯޓުންނެވެ. ކަސްޓަމްސްއިން ކުރިން ބުނި ގޮތުގައި އޭނާގެ ލަގެޖުން އަތުލައިގަތީ މެފެޑްރޯމް ނަމަކަށް ކިޔާ ބާވަތެއްގެ މަސްތުވާއެއްޗެކެވެ.
އޭނާގެ ބަންދާ މެދު ގޮތެއް ނިންމަން އިއްޔެ ކްރިމިނަލް ކޯޓަށް ހާޒިރުކުރުމުން އެ ކޯޓުން ވަނީ އޭނާގެ ބަންދަށް 15 ދުވަސް ޖަހައިފައެވެ.
އެއީ، ކުށުގެ ރިކޯޑު އޮންނަ މީހެކެވެ. އެހެންވެ، އެ މީހާ ބަންދުކުރަން ނިންމީ، ތުހުމަތުކުރެވޭ މިންވަރަށް ހެކި ހުށަހެޅިފައި ހުރުމުންނާއި މުޖުތަމައުގެ ސަލާމަތާއި ރައްކާތެރިކަން ކަށަވަރުކުރުމަށްޓަކައެވެ.
ފާހަގަކޮށްލެވޭ ގޮތުގައި މިދިޔަ އަންގާރަ ދުވަހު ރާއްޖެ އައި އިންޑިއާ ދެމަފިރިންގެ އަތުން ވެސް ގިނަ އަދަދެއްގެ މަސްތުވާތަކެތި އަތުލައިގެންފައިވެއެވެ.