21 Oct 2024, 10:51
ގިނަ އަދަދެއްގެ މަސްތުވާތަކެއްޗާ އެކު، އެ ތަކެތީގެ ވިޔަފާރިކުރާ ކަމުގެ ތުހުމަތުގައި މާލެއިން މިއަދު ތިން މީހަކު ހައްޔަރުކޮށްފިއެވެ.
މި މައްސަލައިގައި ހައްޔަރުކޮށްފައިވަނީ 22 އަހަރުގެ ލ. ކަލައިދޫ، އެވަގްރީން، މުޙައްމަދު އައިޝަރު ޔޫސުފާއި ކ. ކާށިދޫ، އަންދަލީބުގެ، މުޙައްމަދު މައިހާން ފަޔާޒް (19އ)ގެ އިތުރުން ދ. ކުޑަހުވަދޫ، ރަނަކުރި، އިބްރާހީމް މާޖިދު (31އ) އެވެ.
ފުލުހުން ބުނީ، އެ މީހުން ހައްޔަރުކުރީ މަސްތުވާތަކެތި ވިއްކައި، ވިޔަފާރިކުރާ ކަމަށް ކައުންޓާ ނާކޮޓިކްސް އިންޓެލިޖެންސަށް ލިބުނު މައުލޫމާތަކާ ގުޅިގެން ހިންގި އޮޕަރޭޝަނެއްގެ ތެރެއިން ކަމަށެވެ. އެ އޮޕަރޭޝަންގައި ކޯޓު އަމުރެއްގެ ދަށުން ތިން ގެއެއް ވަނި ބަލައި ފާސްކޮށްފައެވެ.
އެ ގޮތުން، އެ ގެތަށް ބަލައި ފާސްކުރުމުގެ ތެރެއިން ވަގުތީ ބަރުދަނުގައި އެއް ކިލޯގެ މަސްތުވާތަކެތި ކަމަށް ބެލެވޭ އެއްޗެއް ފެނިފައިވާ ކަމަށް ފުލުހުން ބުނެފައިވެއެވެ. އަދި، 86،000 ރުފިޔާ ވެސް ގެތަކުން ފެނިފައިވެއެވެ.
އެ ތިން މީހުންގެ ބަންދާމެދު ގޮތެއް ނިންމަން ކްރިމިނަލް ކޯޓަށް ހާޒިރުކުރުމުން މުޙައްމަދު އައިޝަރު ޔޫސުފް 15 ދުވަހަށް ބަންދުކޮށް، މުޙައްމަދު މައިހާން ފަޔާޒާއި އިބްރާހީމް މާޖިދު ހަތް ދުވަހަށް ބަންދުކުރުމަށް އެ ކޯޓުން ވަނީ އަމުރުކޮށްފައެވެ.
މި މައްސަލަ ފުލުހުން އަންނަނީ ތަހުގީގުކުރަމުންނެވެ.
މަސްތުވާތަކެތީގެ މައްސަލަތަކުގައި ދޭތެރެއަކުން މީހުން އަތުލައިގެނެއެވެ. އެ ގޮތުން، މިދިޔަ ހޮނިހިރު ދުވަހު ކަސްޓަމްސްއިން ވަނީ ރާއްޖެ އެތެރެކުރަން އުޅުނު 1.86 ކިލޯގެ މަސްތުވާތަކެތި އަތުލައިގެންފައެވެ.
ރާއްޖޭގައި މިހާރު މަސްތުވާތަކެތީގެ އަސަރުނުކުރާ ރަށެއް ނެތް ކަމަށް ނެޝަނަލް ޑުރަގު އެޖެންސީ (އެންޑީއޭ)އިން ވެސް ވަނީ ބުނެފައެވެ.