20 Oct 2024, 23:46
އިންގްލިޝް ޕްރިމިއާ ލީގުގައި ލިވަޕޫލްއާއި ޗެލްސީ ބައްދަލުކުރި މެޗު ލިވަޕޫލުން ކާމިޔާބު ކޮށް ތާވަލްގެ އެއްވަނައަށް އަރައިފިއެވެ.
ލިވަޕޫލްގެ ދަނޑުގައި ކުޅުނު މިމެޗު އެޓީމުން ކާމިޔާބު ކޮށްފައިވަނީ ދެ ލަނޑު އެއް ލަނޑުންނެވެ. މިމެޗުގެ ކުރިން ކުޅުނު އެންމެ ފަހުގެ ޗެމްޕިއަން މެންޗެސްޓާ ސިޓީ އާއި ވުލްވަހެމްޕްޓަން ވޮންޑަރާސްގެ މެޗު ސިޓީ ކާމިޔާބު ކުރުމާއެކު ލިވަޕޫލުން މިމެޗު ފެށީ ތާވަލްގެ ދެވަނައިގައި އޮވެގެންނެވެ. ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ޗެލްސީއިންނެވެ. މިގޮތުން މިމެޗުގައި ޗެލްސީން ވަނީ ރަނގަޅު ކުޅުމެއް ދައްކާ ލިވަޕޫލަށް ނުރައްކާ ކޮށްފައެވެ. ނަމަވެސް ލިވަޕޫލް ފެނިގެންދިޔައީ ޗެލްސީގެ ހަމަލާތަކަށް ރަނގަޅަށް ތައްޔާރު ވުމުގެ އިތުރުން ޗެލްސީގެ ޑިފެންސް ފޫއަޅުވާލެވޭވަރުގެ ހަމަލާތަކެއް އުފެއްދުމަށް ތައްޔާރަށް ތިބި ތަނެވެ.
ނަތީޖާ އަކަށްވީ މެޗުގެ 29ވަނަ މިނެޓުގައި ލިވަޕޫލުން އުފެއްދި ހަމަލާއެއް ދިފާއު ކުރަން ޗެލްސީގެ ލެވީ ކޯލްވިލް އުޅުމުގެ ތެރޭގައި ކާޓިސް ޖޯންސްއަށް ކުރި ފައުލަކާ ގުޅިގެން އެޓީމަށް ޕެނަލްޓީ އެއް ލިބުމެވެ. މިޕެނަލްޓީ ކާމިޔާބު ކޮށް ލިވަޕޫލަށް މެޗުގެ ލީޑު ނަގައިދިނީ މުހަންމަދު ސަލާހްއެވެ.
މިމެޗުގެ ދެވަނަ ހާފު ޗެލްސީއިން ފެށީ ފުރަތަމަ ހާފަށް ވުރެ ރަނގަޅު ކުޅުމެއް ދެއްކުމުގެ އުންމީދާއި އެކުއެވެ. އަދި ދެވަނަ ހާފުގެ ކުޅުން ފެށިތާ ތިންވަނަ މިނެޓުގައި ޗެލްސީން ވަނީ ލަނޑެއް ޖަހާ މެޗުގެ ނަތީޖާ ހަމަހަމަ ކޮށްފައެވެ.
ނިކްލަސް ޖެކްސަން ޖެހި މިލަނޑު އެންމެ ފުރަތަމަ އޮފް ސައިޑް ކަމަށް ދެއްކި ނަމަވެސް ވީއޭއާރުން ބެލުމަށްފަހު އެލަނޑު ވަނީ ބަލައިގެންފައެވެ. މިލަނޑާއެކު ޗެލްސީގެ ކުޅުން ރަނގަޅު ވާނެކަމަށް ބެލެވުނު ނަމަވެސް މިލަނޑު ޖެހިތާ ތިން މިނެޓް ފަހުން ކާޓިސް ޖޯންސް ވަނީ ލިވަޕޫލަށް އަނެއްކާވެސް ލީޑު ނަގައިދީފައެވެ. މިމެޗުގައި އިތުރު ލަނޑެއް ފެނިގެން ނުދިޔަ ނަމަވެސް ލަނޑު ޖަހާނެ ރަނގަޅު ފުރުސަތު ދެޓީމަށް ވެސް ލިބިގެންދިޔައެވެ.
މިކާމިޔާބީއާއެކު ލިވަޕޫލް މިހާރު އުޅެނީ ކުޅުނު އަށް މެޗުން ލިބިފައިވާ 21 ޕޮއިންޓާއެކު ތާވަލްގެ އެއްވަނައިގައެވެ. އަދި މިކާމިޔާބީއާއެކު ލިވަޕޫލްގެ ކޯޗު އާން ސްލޮޓް ވެގެން ގޮސްފައިވަނީ އޭނާގެ ކޯޗު ކަމުގެ ދަށުން ޕްރިމިއާ ލިގުގައި ކުޅުނު ފުރަތަމަ 11 މެޗުގެ ތެރެއިން 10 މެޗު ކާމިޔާބު ކުރި ލިވަޕޫލްގެ ފުރަތަމަ ކޯޗަށެވެ. އަދި މިމެޗުން ބަލިވުމުން ޗެލްސީ އުޅެނީ 14 ޕޮއިންޓާއެކު ތާވަލްގެ ހަވަނައިގައެވެ.