20 Oct 2024, 09:20
ޖަރުމަނު ބުންޑެސްލީގާގައި ތާވަލްގެ އެއްވަނައިގާ އުޅޭ ބަޔޭން މިޔުނިކާއި ވީއެފްބީ ސްޓުޓްގާޓް ބައްދަލުކުރި މެޗު ބަޔޭންއިން ކާމިޔާބުކޮށްފިއެވެ.
ބަޔޭންގެ ދަނޑުގައި ކުޅުނު މިމެޗު އެ ޓީމުން ކާމިޔާބު ކޮށްފައިވަނީ 4-0 އިންނެވެ. ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މި މެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ބަޔޭންއިންނެވެ.
ބަޔޭން އެންމެ ފަހުން ކުޅުނު ތިން މެޗުންވެސް މޮލުވެފައިނުވާތީ މި މެޗާއި އެ ޓީމުން ކުރިމަތިލީ އިތުރު ހިތްވަރަކާއެކުއެވެ. ނަމަވެސް މިމެޗުގެ ފުރަތަމަ ހާފުގައި ސްޓުޓްގާޓްއިންވަނީ ވަރަށް ރަނގަޅަށް ޑިފެންޑް ކޮށް ބަޔޭންގެ ހަމަލާތައް ނާކާމިޔާބު ކޮށްފައެވެ. ނަތީޖާއަކަށް ވެގެންދިޔައީ ފުރަތަމަ ހާފު ދެ ޓީމުން ކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި ނިމިގެންދިއުމެވެ.
ފުރަތަމަ ހާފާއި ޚިލާފަށް ދެވަނަ ހާފުގައި ސްޓުޓްގާޓްއަށް ބަޔޭން ހިފަހައްޓާލެވޭގޮތެއް ނުވިއެވެ. ހާއްސަކޮށް އެ ޓީމުގެ ނުރައްކާތެރި ފޯވަޑް ހެރީ ކޭން ހިފަހައްޓާލުން ސްޓުޓްގާޓްއަށް ވެގެންދިޔައީ އުނދަގޫ ކަމަށެވެ.
ނަތީޖާ އަކަށް ވެގެންދިޔައީ މިހާފުގައި ކޭންގެ ހެޓްރިކެއް ފެނިގެންދިއުމެވެ. މި މެޗުގައި ބަޔޭންގެ ފުރަތަމަ ލަނޑު ކޭން ކާމިޔާބު ކޮށްދީފައިވަނީ މެޗުގެ 57 ވަނަ މިނެޓުގައެވެ. އަދި މިލަނޑު ޖެހިތާ ތިން މިނެޓް ފަހުން ކޭންވަނީ ބަޔޭންގެ ލީޑު ފުޅާކޮށްދީފައެވެ.
އަދި މި މެޗުގައި އޭނާ ހެޓްރިކް ފުރިހަމަ ކުރީ މެޗުގެ 80 ވަނަ މިނެޓުގައި ކާމިޔާބުކުރި ލަނޑުންނެވެ. މިއި މި ސީޒަންގައި ލީގުގައި އޭނާ ކާމިޔާބުކުރި އަށްވަނަ ލަނޑެވެ. މި މެޗުގައި ބަޔޭންގެ ފަހު ލަނޑު މެޗުގެ 89 ވަނަ މިނެޓުގައި ކާމިޔާބު ކޮށްދިނީ ކިންގްލީ ކޯމަންއެވެ.
މިކާމިޔާބީއާއެކު ބަޔޭން މިހާރު އުޅެނީ ކުޅުނު ހަތް މެޗުން ލިބިފައިވާ 17 ޕޮއިންޓާއެކު ތާވަލްގެ އެއްވަނައިގައެވެ. އެއީ ދެވަނައިގައި އުޅޭ އާރްބީ ލެއިޕްޒިގް އާއި އެއްވަރަށް ޕޮއިންޓް ލިބިފައިވީ ނަމަވެސް ފައިދާ ގޯލަށް ބަލާއިރު ކުރި ލިބޭތީއެވެ.