20 Oct 2024, 09:09
އިންގްލިޝް ޕްރިމިއާ ލީގުގައި ލީގަށް އެންމެ ބޮޑަށް ވާދަކުރާ އެއް ޓީމު ކަމަށްވާ އާސެނަލް ބޯންމޯތު އަތުން ބަލިވެއްޖެއެވެ.
ބޯންމޯތުގެ ދަނޑުގައި ކުޅުނު މި މެޗު އެޓީމު ކާމިޔާބުކުރީ 2-0 އިންނެވެ. ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މި މެޗުގައި ގިނައިރު އާސެނަލް ބޯޅަ ގެންގުޅުނު އިރު ގިނަ ހަމަލާ އުފައްދާފައިވަނީ ބޯންމޯތެވެ.
މި މެޗު ވަރަށް ހަމަހަމަ ގޮތަކަށް ކުޅުން ދަނިކޮށް މެޗަށް ދިރުން އައީ މެޗުގެ 30 ވަނަ މިނެޓުގައި ބޯންމޯތުން އުފައްދަން އުޅުނު ހަމަލާއެއްގައި އެ ޓީމުގެ ފޯވަޑް އެވަނީލްސަން ހުއްޓުވަން އުޅުނުމުގެ ތެރޭގައި އާސެނަލްގެ ޑިފެންޑާ ވިލިއަމް ސަލީބާ އުރަސްއެޅި ހިސާބުންނެވެ.
ރެފްރީ އެންމެ ފުރަތަމަ ސަލީބާއަށް ރީނދޫ ކާޑު ދެއްކި ނަމަވެސް ވީއޭއާރުން ދެވަނަ ފަހަރަށް ބެލުމަށް ރެފްރީއަށް ލަފާދިނުމާއެކު އަލުން ބެލުމަށްފަހު ރެފްރީވަނީ ރީނޑޫ ކާޑުގެ ބަދަލުގައި ރަތް ކާޑު ދައްކާފައެވެ.
އެއީ ސަލީބާ އެންމެ ފަހު ކުޅުންތެރިޔާއަށް ވެހުރެ ލަނޑު ޖަހަން ލިބުނު ފުރުސަތަކަށް ހުރަސްއެޅިމުގެ ސަބަބުންނެވެ. މިއީ ސަލީބާގެ ސީނިއާ ކެރިއާގައި އޭނާއަށް ދެއްކި ފުރަތަމަ ރަތް ކާޑެވެ. އަދި މިސީޒަންގައި މިހާތަނަށް އާސެނަލްއަށް ރަތް ކާޑު ދެއްކި ތިންވަނަ މެޗެވެ.
ހަމައެއާއެކު މިހަފްތާގައި ޕްރިމިއާ ލީގުގައި މިހާތަނަށް ދެއްކި ފަސްވަނަ ރަތްކާޑެވެ. މި ރަތް ކާޑާއެކު މެޗުގެ އޮވެވަރު މުޅިން ބަދަލުވެ ބޯންމޯތުން ހަމަލާއަށް އިތުރަށް އިސްކަން ދިން ތަން ފެނިގެންދިޔައެވެ. އާސެނަލްއިން ފުރަތަމަ ބަދަލެއް ނުގެނެސް ފަރުޖެއްސޭތޯ ބެލިނަމަވެސް އެންމެ ފަހުން ބަދަލު ގެނައެވެ.
ފުރަތަމަ ހާފުގައި ލަނޑެއް ފެނިގެން ނުދިޔަ ނަމަވެސް ލަނޑު ޖަހާނެ ފުރުސަތު ދެ ޓީމަށް ވެސް ލިބިގެންދިޔައެވެ. އަދި ދެވަނަ ހާފަށް ބޯންމޯތު ނިކުންއިރު މެޗުން މޮޅުވުމަށް ބޭނުންވެފައިތިބި މިންވަރު ފެނިގެންދިޔައެވެ.
އަދި މިގޮތުން އެޓީމުންދިޔައީ އާސެނަލްގެ ޑިފެންސް ފޫއަޅުވާލެވޭތޯ މަސައްކަތް ކުރަމުންނެވެ. އަދި މިގޮތުން އެ ޓީމުން ކުރަމުންދިޔަ މަސައްކަތް ކާމިޔާބުވީ މެޗުގެ 70 ވަނަ މިނެޓުގައި އެޓީމަށް ލިބުނު ކޯނަރަކުންނެވެ.
މި ލަނޑު އެޓީމަށް ކާމިޔާބު ކޮށްދީ މެޗުގެ ލީޑު ނަގައިދިނީ ރަޔަން ކްރިސްޓީއެވެ. އަދި މިލަނޑު ކާމިޔާބު ކުރިތާ ނުވަމިނެޓް ފަހުން ބޯންމޯތުގެ ދެވަނަ ލަނޑު އެ ޓީމުން ކާމިޔާބުކުރި ލިބުނު ޕެނަލްޓީ އަކުން ޖަސްޓިން ކްލައިވާޓްއެވެ. މި މެޗުގެ ފަގު 10 މިނެޓުގައި އާސެނަލްއިން ކުރިއަށް އަރާ ލަނޑެއް ޖެހޭތޯ މަސައްކަތްކުރި ނަމަވެސް އެކަން ކާމިޔާބު ވާގޮތެއްނުވިއެވެ.
މިއީ މި ސީޒަންގައި އާސެނަލް ބަލިވި ފުރަތަމަ މެޗެވެ. މީގެ ކުރިން ދެ މެޗުގައި އާސެނަލްގެ ދެ ކުޅުންތެރިއަކަށް ރަތް ކާޑު ދެއްކި ނަމަވެސް އެދެމެޗު ނިމުނީ އެއްވަރު ވެގެންނެވެ. އަދި މި ނަތީޖާގެ ސަބަބުން ތާވަލްގެ އެއްވަނައަށް އެރުމަށް އާސެނަލްއަށް ލިބިގެންދިޔަ ފުރުސަތު މިވަނީ ގެއްލިގެން ގޮސްފައެވެ.
އަދި އެ ޓީމު އުޅެނީ ކުޅުނު އަށް މެޗުން ލިބިގެންދިޔަ 17 ޕޮއިންޓާއެކު ތާވަލްގެ ތިންވަނައިގައެވެ. އަދި މިކާމިޔާބީއާއެކު ބޯންމޯތު ވަނީ 11 ޕޮއިންޓާއެކު ތާވަލްގެ 10 ވަނައަށް ކުރިއަށް ޖެހިލާފައެވެ.