20 Oct 2024, 09:03
އަތައަކީ ރާއްޖޭގެ ބާޒާރުން ވެސް އާއްމުކޮށް ލިބެން ހުންނަ މޭވާއެކެވެ. ކަސްޓަޑް އެޕަލްގެ ނަމުން ބައެއް މީހުން ދަންނަ މި މޭވާއަކީ މީރު ސިއްހަތަށް ފައިދާ ހުރި މޭވާއެކެވެ. އެހެންކަމުން ބާޒާރުގައި ލިބެން ހުންނަ އެހެން މޭވާތަކާ އަޅާ ބަލާއިރު ބައެއް ދުވަސްވަރު މިއީ ބޮޑު އަގުގައި ވިއްކަން ހުންނަ މޭވާއެކެވެ.
ސިއްހަތަށް ފައިދާހުރި ގިނަގުނަ މާއްދާތައް އެކުލެވޭ އަތައިގައި ފައިބާއާއި ވިޓަމިންސް އަދި މިނެރަލް މަތީ މިންވަރަކަށް ހުރުމާ އެކު މިއީ ހަށިގަނޑުގެ ދިފާއީ ނިޒާމު ވަރުގަދަކޮށްދީ، އިންފްލެމޭޝަން ދަށްކޮށް ހިތާއި ލޮލަށް ކުރިމަތިވާ ސިއްހީ ގެއްލުންތަކުން ހަށިގަނޑު ރައްކާތެރިކޮށްދޭ މޭވާއެކެވެ. މި މޭވާގައި މަތީ އަދަދަކަށް އެންޓިއޮކްސިޑެންޓްސް އެކުލެވޭތީ ކެންސަރުން ބަލިން ވެސް ހަށިގަނޑު ރައްކާތެރިކުރުމަށް އެހީވެދެއެވެ.
އަތަ ބޭނުންކޮށްގެން ތައްޔާރުކުރެވިފައިވާ އައިސްކްރީމް ޔޮގަޓް--ފޮޓޯ/ޕިންޓްރެސްޓް
އަތައިގައި އެކުލެވޭ ވިޓަމިން ބީ6ގެ ސަބަބުން އިންސާނުންނަށް އިހުސާސްވާ މާޔޫސްކަމުން ދުރުކޮށްދީ ޑިޕްރެޝަން ފަދަ ނަފުސާނީ ބަލިތަކާ ދުރުކޮށްދިނުމަށް އެހީތެރިވެދެއެވެ. ކޮންމެ ދުވަހަކު ވެސް އަތަކޮޅެއް ނަމަވެސް ކެއުމުން ލޭގެ ޕްރެޝަރު ދަށްކޮދިނުމަށް އެހީތެރިވެދޭ ކަމަށް ދިރާސާތަކުން ދައްކައެވެ. ލޭގެ ޕްރެޝަރު މަތިވުމަކީ ހިތުގެ ބައްޔަށް މަގުފަހިކޮށް ސްޓްރޯކް ޖެހުމަށް މަގުފަހިކުރުވާކަމަކަށްވުމުން ދުވަހުގެ ކެއުމުގެ ތާވަލުގައި މި މޭވާ ހިމަނާލުން މުހިއްމެވެ.
ސިއްހީ ދިރާސާ ކުރައްވާ ނިއުޓްރީޝަން ލިޒީ ސްޓްރެއިޓް ބުނެފައިވާ ގޮތުގައި މި މޭވާ މާ ގިނައިން ކައިފިނަމަ ސިކުނޑިއަށް އޭގެ ނޭދެވޭ އަސަރުކުރުމުގެ ފުރުސަތު ބޮޑެވެ.
އަތަ ކެއުމަށް އެންމެ ރަނގަޅީ ރަނގަޅަށް ދޮންވުމަށް ފަހުއެވެ. މި މޭވާ ކާއިރު އޭގެ ތޮށި ނެގުމަށާއި އޭގެ އޮށްތައް ނުކެއުމަށް ޚާއްސަ ސަމާލުކަމެއް ދޭންވާނެއެވެ. މިއީ ފޮނި ރަހައެއް ހުންނަ އަނގަޔަށް މީރު މޭވާއެއްކަމުން މީރު ސެލެޑެއް ތައްޔާރުކުރުމަށް އަތަ ބޭނުންކުރެވިދާނެއެވެ. ހަމައެއާއެކު އޯޓްމީލް ނުވަތަ ޔޮގަޓާ އެކު ވެސް މިއީ ބޭނުންކޮށްލެވިދާނެ މޭވާއެކެވެ.