18 Oct 2024, 23:55
އެމެރިކާގެ އެންމެ ވަރުގަދަ އެއް ޓެކް ކުންފުނި އެޕަލްއިން ދާދިފަހުން ހަދާފައިވާ ދިރާސާއަކުން ޗެޓްޖީޕީޓީ ފަދަ އޭއައި މޮޑެލްތަކަކީ ހަގީގަތުގައި ވެސް ބުއްދިވެރި ނިޒާމުތަކެއްތޯ ނުވަތަ ހަމައެކަނި މޮޅު ކޮޕީތަކެއްތޯ ސުވާލު އުފެދިއްޖެއެވެ.
އިމާން މިރްޒާދެހްގެ ލީޑަރޝިޕްގެ ދަށުން އެޕަލްގެ ޓީމުން މި ނިޒާމުތަކުގެ ލިމިޓޭޝަންސް ދެނެގަތުމަށް މަސައްކަތް ކުރިއެވެ. އެގޮތުން ޖީއެސްއެމް-ސިމްބޮލިކް ކިޔާ އައު ވަޒަންކުރުމެއް ބޭނުންކޮށްގެން، ބޮޑެތި ލޭންގުއޭޖް މޮޑެލްތައް (އެލްއެލްއެމް) އުނދަގޫ ހިސާބާއި ލޮޖިކަލީ މައްސަލަތަކާ ކުރިމަތިލާއިރު މައްސަލަތައް ހައްލުވަނީ ކިހާ ރަނގަޅަށްތޯ ބެލިއެވެ.
މި ނަތީޖާތަކުން މި ޓޫލްތަކުގެ ހަގީގީ "ވިސްނުމުގެ" ގާބިލުކަމާމެދު ބޮޑެތި ސުވާލުތަކެއް ވަނީ އުފައްދައިފައެވެ.
އެޕަލްގެ ޓީމުން ދެނެގަތް ގޮތުގައި ސުވާލުތަކަށް ގުޅުމެއް ނެތް ބަސްތަކާއި ނަންބަރުތައް އިތުރުކޮށްލުމުން، ކުރިން ރަނގަޅަށް ޖަވާބުދޭ އޭއައީ މޮޑެލްތައް ފެއިލްވާން ފަށައެވެ. ހަގީގަތުގައި، މައްސަލައަކަށް ކުޑަ އިތުރު ޖުމްލައެއް ލުމުން، މި މޮޑެލްތަކުގެ ސައްޙަކަން 65 އިންސައްތައަށް ވުރެ ބޮޑަށް ދަށްވެއެވެ. އިތުރުކުރެވުނު ޓެކްސްޓުން މައިގަނޑު މައްސަލައަށް ބަދަލެއް ނާދެއެވެ. ނަމަވެސް އޭއައީ ސިސްޓަމްތަކަށް އޮޅުން އަރައެވެ.
މި ދިރާސާއިން ފާހަގަކުރެވުނު ގޮތުގައި މި މޮޑެލްތަކުން ފެންނަ ޖަވާބުތަކަކީ ހަމައެކަނި މަތި މަތިން ފެންނަ ބުއްދިވެރި ޖަވާބުތަަކެކެވެ.
އެތަކެތީގެ ގިނަ ޖަވާބުތައް ބިނާވެފައި ވަނީ ހަގީގީ ވިސްނުމަށް ނުވަތަ ހިސާބުގެ ހުނަރަކަށް ނޫނެވެ. އޭގެ ބަދަލުގައި އެއީ ތަމްރީނުގެ ތެރެއިން ދަސްވެފައިވާ ގަވާއިދުތަކާއި ނަމޫނާތަކެވެ. ގާތުން ބަލާއިރު، ބައެއް ޖަވާބުތައް ފުރަތަމަ ބެލުމަށް ރަނގަޅު ކަމަށް ފެނުނު ނަމަވެސް، އެއީ ޙަޤީޤަތުގައި ރަނގަޅުނޫން ޖަވާބުތަކެކެވެ.
މި ދިރާސާއިން ސާފުވެގެންދަނީ އޭއައީ ޓޫލްތަކުން އަހަރުމެން އިންސާނުން ފަދައިން "ވިސްނުން" ނުގެންގުޅޭކަމާއި، އޭގެ ބަދަލުގައި އިންސާނުންގެ ވާހަކަދެއްކުމުގެ ނަމޫނާތައް ކޮޕީކުރާކަމެވެ. މިކަމުން އޭއައީ ނިޒާމުތަކުގެ ހަގީގީ ގާބިލުކަމާމެދު ސުވާލު އުފެދި، އިތުރު ދިރާސާތަކުގެ މުހިންމުކަން ފާހަގަކުރެވެއެވެ.
އެޕަލްގެ މި ދިރާސާއިން އަލިއަޅުވާލަނީ އަހަރެމެން އޭއައީ ސިސްޓަމްތައް ބޭނުންކުރާ ގޮތާއި އެއަށް އިތުބާރުކުރާ މިންވަރު އަލުން ވިސްނާލަން ޖެހޭކަމެވެ.
މި މޮޑެލްތައް ބުއްދިވެރި ކަމަށް ފެނުނު ނަމަވެސް، އުނދަގޫ ނުވަތަ ބޮޑެތި މައްސަލަތަކާ ކުރިމަތިލާއިރު އެތަކެއްޗަށް ބޮޑެތި ގޮންޖެހުންތަކާ ކުރިމަތިވެއެވެ.
މި ހޯދުންތަކުން ފާހަގަކޮށްދެނީ ބޮޑެތި ލޭންގުއޭޖް މޮޑެލްތަކަކީ (އެލްއެލްއެމް) ކުށެއް ނުހެދޭނެ އެއްޗެހި ނޫންކަމާއި، ފުން ވިސްނުމެއް ނުވަތަ ހަގީގީ ދެނެގަތުމެއް ބޭނުންވާ ކަންކަމުގައި އެއަށް މުޅިން ބަރޯސާވެގެން ނުވާނެކަމެވެ.
ދިރާސާކުރި ފަރާތްތަކުން ބާރުއަޅަނީ އޭއައީ މޮޑެލްތަކުގެ ވިސްނުމާއި ހިސާބުގެ ގާބިލުކަން އިތުރުކުރުމަށް އިތުރަށް ދިރާސާކުރުމަށެވެ. މި ޓެކްނޮލޮޖީތައް ކުރިއަރަމުންދާއިރު، އޭގެ އުނިކަންތައްތައް ދެނެގަތުމާއި އެތަކެތި ބޭނުންކުރުމުގެ ސަރަހައްދުތައް ކަނޑައެޅުން އިތުރަށް މުހިންމުވެއެވެ.
އޭއައި އިން ގިނަ ފައިދާތަކެއް ލިބުނު ނަމަވެސް، އެތަކެތި ހައްލުކުރަން މަސައްކަތްކުރާ އުނދަގޫ ކަންކަން ހަގީގަތުގައި ނުވިސްނޭ ނިޒާމުތަކަށް ބޮޑަށް ބަރޯސާވުމުގެ ނުރައްކަލާމެދު ފަރުވާތެރިވާން ޖެހެއެވެ.