16 Oct 2024, 16:50
ފީފާ ވާލްޑް ކަޕަށް ކޮލިފައިވުމަށް ދެކުނު އެމެރިކާ ސަރަހައްދުގައި ކުޅެމުންދާ ކޮލިފައިންގައި ކޮލޮމްބިއާ އާއި ޗިލީ ބައްދަލުކުރި މެޗު ކޮލޮމްބިއާއިން ކާމިޔާބުކޮށްފިއެވެ.
ކޮލޮމްބިއާގެ ބަރަންކުއިޔާގެ އެސްޓާޑިއޯ މެޓްރޮޕޮލިޓާނޯގައި ކުޅުނު މިމެޗު އެޓީމުން ކާމިޔާބު ކޮށްފައިވަނީ ހަތަރު ލަނޑު ސުން ލަނޑުންނެވެ. މިދިޔަ ހުކުރު ދުވަހު ބޮލީވިއާއާ ބައްދަލުކުރި މެޗުން ބަލިވެފައިވުމުން މިމެޗުން މޮޅުވުމަށް ކޮލޮމްބިއާއިން ތިބީ ވަރަށް ބޮޑަށް ބޭނުންވެފައެވެ. އަދި މިކަން އެޓީމުން މިމެޗުގައި ދެއްކި ކުޅުމުން ވަރަށް ރަނގަޅަށް ހާމަވިއެވެ.
މިމެޗުގައި ކޮލޮމްބިއާއިން ކާމިޔާބު ކުރި ފުރަތަމަ ލަނޑު މެޗުގެ 34 ވަަނަ މިނެޓުގައި ކާމިޔާބު ކޮށްދިނީ ޑިފެންޑާ ޑެވިންސަން ސަންޗޭޒްއެވެ. މިމެޗުގެ ފުރަތަމަ ހާފުގައި ލަނޑު ޖަހާނެ އިތުރު ފުރުސަތުވެސް ކޮލޮމްބިއާއަށް ލިބުނެވެ.
ކޮލޮމްބިއާއިން މިމެޗުގައި ކާމިޔާބު ކުރި ދެވަނަ ލަނޑު މެޗުގެ 52 ވަނަ މިނެޓުގައި ޖަހައިދިނީ ލުއިސް ޑިއާޒްއެވެ. މިމެޗުގައި އެޓީމުން ކާމިޔާބު ކުރި ތިންވަނަ ލަނޑު ޖަހައިދިނީ މެޗުގެ 82 ވަނަަ މިނެޓުގައި ޖޯން ޑުރާންއެވެ. އަދި ފަހު ލަނޑު މެޗުގެ އިތުރު ވަގުތުގެ ތިންވަނަ މިނެޓުގައި ކާމިޔާބު ކޮށްދިނީ ލުއިސް ސިނިސްޓޭރާއެވެ.
މިކާމިޔާބީ އާއެކު ކޮލޮމްބިއާ މިހާރު އުޅެނީ ކުޅުނު 10 މެޗުން ލިބިފައިވާ 19 ޕޮއިންޓާއެކު ތާވަލްގެ ދެވަނައިގައެވެ. އެއީ އެއްވަނައިގާ އުޅޭ އާޖެންޓީނާއަށް ވުރެ ތިން ޕޮއިންޓް ފަހަތުންނެވެ. އަދި ޗިލީ އުޅެނީ ފަސް ޕޮއިންޓާއެކު 10 ޓީމު ހިމެނޭ ދެކުނު އެމެރިކާ ސަރަހައްދުގެ އެންމެ ފުލުގައެވެ.
މިސަރަހައްދުގެ ކޮލިފައިންގައި ޕެރަގުއާއީ އާއި ވެނެޒުއޭލާ ބައްދަލުކުރި މެޗު ދެ ލަނޑު އެއް ލަނޑުން ކާމިޔާބު ކުރީ ޕެރަގުއާއީއެވެ. މިމެޗުގެ ފުރަތަމަ ލަނޑު މެޗުގެ 25 ވަނަ މިނެޓުގައި ހޮން އަރަމްބުރޫ ޖަހައިދިން ލަނޑުން ވެނެޒުއޭލާއިން ކުރި ހޯދި ނަމަވެސް ޕެރަގުއާއީއިން ވަނީ ފަހަތުން އަރައި ދެ ލަނޑު ކާމިޔާބު ކޮށްފައެވެ. މިދެ ލަނޑު އެޓީމަށް ކާމިޔާބު ކޮށްދިނީ 59 ވަނަ މިނެޓާއި 74 ވަނަ މިނެޓުގައި އެންޓޯނިއޯ ސަނަބްރިއާއެވެ.
މިކާމިޔާބީއާއެކު ޕެރަގުއާއީ މިހާރު އުޅެނީ 13 ޕޮއިންޓާއެކު ތާވަލްގެ ހަ ވަނައިގައެވެ. އަދި ވެނެޒުއޭލާ އުޅެނީ 11 ޕޮއިންޓާއެކު ތާވަލްގެ އަށް ވަނައިގައެވެ.