16 Oct 2024, 15:11
ފީފާ ވޯލްޑް ކަޕަށް ކޮލިފައިވުމަށް ދެކުނު އެމެރިކާ ސަރަހައްދުގައި ކުޅެމުންދާ ކޮލިފައިންގައި ބްރެޒިލް އާއި ޕޭރޫ ބައްދަލުކުރި މެޗު ބްރެޒިލް އިން ކާމިޔާބު ކޮށްފިއެވެ.
ބްރެޒިލްގައި ކުޅުނު މިމެޗު އެޓީމުން ކާމިޔަބު ކޮށްފައިވަނީ ހަތަރު ލަނޑު ސުން ލަނޑުންނެވެ. ދެޓީމުގެ ފަރާތުން ވަދަވެރި ކުޅުމެއް ފެނިގެންދިޔަ މިމެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ބްރެޒިލް އިންނެވެ. މިމެޗުގައި ބްރެޒިލް އިން ކާމިޔާބު ކުރި ފުރަތަމަ ލަނޑު މެޗުގެ 38ވަނަ މިނެޓުގައި ލިބުނު ޕެނަލްޓީ އަކުން ކާމިޔާބު ކޮށްދިނީ ރަފީނިއާއެވެ.
މިމެޗުގެ ފުރަތަމަ ހާފުގައި އިތުރު ލަނޑެއް ނުފެނުން ނަމަވެސް ލަނޑު ޖަހާނެ ރަނގަޅު ފުރުސަތު ދެޓީމަށް ވެސް ލިބުނެވެ. މިމެޗުގައި ބްރެޒިލްއިން ކާމިޔާބު ކުރި ދެވަނަ ލަނޑު މެޗުގެ 54ވަނަ މިނެޓުގައި އެޓީމަށް ލިބުން ދެވަނަ ޕެނަލްޓީ އާއެކު ކާމިޔާބު ކޮށްދިނީ ވެސް ރަފީނިއާއެވެ. ބްރެޒިލްގެ ތިންވަނަ ލަނޑު މެޗުގެ 71ވަނަ މިނެޓުގައި ކާމިޔަބު ކޮށްދިނީ އެންޑްރިއާސް ޕެރެއިރާއެވެ. އަދި ފަހު ލަނޑު މެޗުގެ 74 ވަނަ މިނެޓުގައި ކާމިޔާބު ކޮށްދިނީ ލުއިޒް ހެންރީކޭއެވެ. މިމެޗުގައި ޕޭރޫގެ ފަރާތުން މާރަނގަޅު ކުޅުމެއް ފެނިގެނެއް ނުދިޔައެވެ.
މިކާމިޔާބީއާއެކު ބްރެޒިލް މިހާރު އުޅެނީ 10 މެޗުން ލިބިފައިވާ 16 ޕޮއިންޓާއެކު ތާވަލްގެ ހަތަރު ވަނައިގައެވެ. ތާވަލްގެ ތިންވަނައިގާ އުޅޭ އުރުގުއާއީއަށް ވެސް 16 ޕޮއިންޓް ލިބިފައިވީ ނަމަވެސް ފައިދާ ގޯލަށް ބަލާއިރު ކުރި ލިބެނީ އުރުގުއާއީ އަށެވެ.
އުރުގުއާއީ އާއި އެކުއެޑޯ ބައްދަލުކުރި މެޗު ނިމުނީ އެއްވެސް ޓީމަކަށް ލަނޑެއް ކާމިޔާބު ނުކުރެވި އެއްވަރު ވެގެންނެވެ. މިމެޗުގައި ދެޓީމަށް ވެސް ލަނޑު ޖަހާނެ ފުރުސަތު ލިބުނު ނަމަވެސް ދެޓީމުން ކުރެ އެއްވެސް ޓީމަކަށް އަނެއްޓީމުގެ ޑިފެންސް ފޫއަޅުވާލެވޭ ގޮތެއް ނުވިއެވެ.
މިމެޗު އެއްވަރު ވުމުން ތާވަލްގެ ދެވަނައިގާ އުޅޭ ކޮލޮމްބިއާ އާއި އެއް ޕޮއިންޓަށް ކައިރިވެލުމަށް އުރުގުއާއީއަށް ލިބުން ފުރުސަތު މިވަނީ ގެއްލިފައެވެ. އަދި އެކުއެޑޯ އުޅެނީ 13 ޕޮއިންޓާއެކު ތާވަލްގެ ފަސް ވަނައިގައެވެ.