16 Oct 2024, 10:10
ޔުއޭފާ ނޭޝަންސް ލީގުގެ ކުޓާ ފައިނަލުން އެންމެ ފަހުގެ ޔޫރަޕްގެ ޗެމްޕިއަން ސްޕެއިން ޖާގަހޯދައިފިއެވެ.
މިމުބާރާތުގެ ކުއާޓާ ފައިނަލުން ސްޕެއިން ޖާގަހޯދާފައިވަނީ ލީގު އޭގެ ގްރޫޕް ހަތަރެއްގައި ސާބިއާ އާއި ބައްދަލުކުރި މެޗު ތިން ލަނޑު ސުން ލަނޑުން ކާމިޔާބު ކޮށްގެންނެވެ.
ދެޓީމުގެ ފަރާތުން ވާދަވެރި ކުޅުމެއް ފެނުން މިމެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ސްޕެއިން އިންނެވެ. މިމެޗު ސްޕެއިން އިން ފެށީ ވަރަށް ފޯރީގައެވެ. މިގޮތުން މެޗުގެ ފަސް ވަނަ މިނެޓުގައި އުފެއްދި ހަމަލާއެއްގައި އެޓީމުންވަނީ މެޗުގެ ލީޑު ނަގައިފައެވެ. މިލަނޑު އެޓީމަށް ކާމިޔާބު ކޮށްދިނީ އެމެރިކް ލަޕޯޓުއެވެ. ފުރަތަމަ ހާފުގައި އިތުރު ލަނޑެއް ފެނިގެން ނުދިޔަ ނަމަވެސް ލަނޑު ޖަހާނެ ރަނގަޅު ފުރުސަތު ސްޕެއިން އިން ތަނަވަސްކުރިއެވެ. ނަމަވެސް މިއިން އެއްވެސް ހަމަލާއެއް ލަނޑަކަށް ބަދަލުކުރެވޭ ގޮތެއް ނުވިއެވެ.
މިމެޗުގައި ސްޕެއިން ކާމިޔާބު ކުރި ދެވަނަ ލަނޑު މެޗުގެ 65ވަނަ މިނެޓުގައި ޖަހައިދީ ލީޑު ފުޅާކޮށްދިނީ ކެޕްޓަން އަލްވާރޯ މޮރާޓާއެވެ. އަދި ފަހު ލަނޑު މެޗުގެ 77ވަނަ މިނެޓުގައި ޖަހައިދިނީ އެލެކްސް ބައީނާއެވެ. މިލަނޑު ޖެހުމުގެ އެއް މިނެޓް ކުރިން ސާބިއާގެ ސްޓްރަހިންޔާ ޕަވްލޮވިޗްއަށް ވަނީ ރަތް ކާޑު ދައްކާފައެވެ.
މިކާމިޔާބީއާއެކު ސްޕެއިން އުޅެނީ ހަތަރު މެޗުން ލިބިފައިވާ 10 ޕޮއިންޓާއެކު ގްރޫޕްގެ އެއްވަނައިގައެވެ. އަދި ސާބިއާ އުޅެނީ ހަތަރު ޕޮއިންޓާ އެކު ގްރޫޕްގެ ތިން ވަނައިގައެވެ.
މިގްރޫޕްގައި ދެން ހިމެނޭ ދެޓީމް ކަމަށްވާ ޑެންމާކް އާއި ސްވިތްޒަލަންޑް ބައްދަލުކުރި މެޗު ނިމުނީ އެއްވަރު ވެގެންނެވެ. ސްވިޓްޒަލަންޑްގައި ކުޅުނު މިމެޗު ނިމުނީ ދެ ލަނޑު ދެ ލަނޑުން ދެޓީމު އެއްވަރު ވެގެންނެވެ. މިމެޗުގެ ފުރަތަމަ ލަނޑު މެޗުގެ 26ވަނަ މިނެޓްގައި ސްވިސްގެ ރެމޯ ފްރެއުލާ ޖަހާ އެޓީމަށް ލީޑު ނަގައިދިން ނަމަވެސް އެޓީމަށް މިލީޑު ދެމެހެއްޓޭވަރުވީ އެންމެ މިނެޓަކަށެވެ. ޑެންމާކްއިން އިން ވަނީ މެޗުގެ 27ވަނަ މިނެޓުގައި ގުސްޓާވް އިސާކްސެން ޖަހައިދިން ލަނޑުން މެޗުގެ ނަތީޖާ ހަމަހަމަ ކޮށްފައެވެ.
މިމެޗުގައި ސްވިޓްޒަލަންޑް އިން ދެވަނަ ފަހަރަށް ލީޑު ނެގީ ފުރަތަމަ ހާފުގެ އިތުރު ވަގުތުގައި ލިބުނު ޕެނަލްޓީ އަކުންނެވެ. މިޕެނަލްޓީ އެޓީމަށް ކާމިޔާބު ކޮށްދިނީ ޒެކީ އަމްދޫނީއެވެ. ޑެންމާކްއަށް ދެވަނަ ފަހަރަށް މިމެޗުގައި ނަތީޖާ ހަމަހަމަ ކޮށްދިނީ 69 ވަނަ މިނެޓުގައި ކްރިސްޓިއަން އެރިކްސަންއެވެ.
މިމެޗު އެއްވަރު ވުމުން ޑެންމާކް މިހާރު އުޅެނީ ހަތް ޕޮއިންޓާއެކު ގްރޫޕްގެ ދެވަނައިގައެވެ. އަދި ސްވިޓްޒަލަންޑް އުޅެނީ މިމެޗުން ލިބުނު ޕޮއިންޓާއެކު ގްރޫޕްގެ އެންމެ ފުލުގައެވެ.