16 Oct 2024, 08:49
ދަރުމާ ޕްރޮޑަކްޝަންސްއިން ގެނެސްދިން ރީތި ލޯބީގެ ފިލްމު "ދަޅަކް"ގެ ދެވަނަ ބައި އަންނަ މަހުން ރިލީޒްކުރާ ގޮތަށް އޮތް ނަމަވެސް ފިލްމު ރިލީޒްކުރުން އަންނަ އަހަރަށް ފަސްކުރެވިފައިވާ ކަމަށް ރިޕޯޓުތައް ބުނެފިއެވެ.
އާއްމުންގެ ބޮޑު މަގުބޫލުކަމެއް ހޯދަމުން އަންނަ ބަތަލާ ތުރިޕްތީ ދިމްރީ އަދި ސިދާންތު ޗަތުރުވެދީ ލީޑްރޯލް ކުޅޭ "ދަޅަކް 2" ކުރިން ރިލީޒްކުރާ ގޮތަށް ނިންމީ ކުރިއަށް އޮތް ނޮވެމްބަރު މަހުގެ 22ވަނަ ދުވަހަށެވެ.
ރިޕޯޓުތައް ބުނާގޮތުން ފިލްމު ރިލީޒްކުރާނެ ކަމަށް ބެލެވެނީ އަންނަ އަހަރުގެ ފެބްރުއަރީ މަހުގެ 21ވަނަ ދުވަހުއެވެ. ފިލްމީ ޚަބަރުތައް ބުނާގޮތުން "ދަޅަކް 2" ރިލީޒްކުރުން ފަސްކުރެވުނީ ޖެހިޖެހިގެން މާގިނަ ފިލްމުތަކެއް ނޮވެމްބަރު މަހުގެ ދެ ހަފްތާތެރޭގައި ރިލީޒްކުރުމަށް ތާވަލުކުރެވިފައިވާތީއެވެ.
ފިލްމު "އެނިމަލް"ގެ މަންޒަރެއްގައި ބަތަލާ ތުރިޕްތީ--ފޮޓޯ/ބޮލީވުޑްހަންގާމާ
ފިލްމު ރިލީޒްކުރުމަށް މިހާރު ހަމަޖެހިފައިވާ ތާރީޚަކީ ބަތަލާ ތުރިޕްތީގެ އުފަންދުވަސް ފާހަގަކުރާ ހަފުތާއަށް ވެފައި ފިލްމަށް ބެލުންތެރިންގެ ފަރާތުން ލިބޭނެ ސަމާލުކަން މާބޮޑަށް އިތުރުވާނެ ކަމަށް ރިޕޯޓުތައް ބުނެއެވެ. ފިލްމު "އެނިމަލް"ގައި ކުޅުނު ރޯލަށްފަހު ތުރިޕްތީ ވެފައި ވަނީ ބެލުންތެރިންގެ ސަމާލުކަން އެންމެ ބޮޑަށް ލިބެމުން އަންނަ ބަތަލާއަށެވެ.
ވަރަށް ރީތި ލޯބީގެ ވާހަކައެއްގެ މައްޗަށް ބިނާކޮށް އުފައްދާ "ދަޅަކް 2"އަކީ 2018ވަނަ އަހަރު އެ ކުންފުނިން ގެނެސްދިން ފިލްމު "ދަޅަކް"އާ ގުޅުވައިގެން ގެނެސްދޭ ފިލްމެކެވެ.
ތުރިޕްތީ މުހިއްމު ރޯލެއް ކުޅެފައިވާ ފިލްމު "ބޫލް ބުލައްޔާ 3" އަންނަ މަހު އެކެއްގައި ރިލީޒްކުރާއިރު ބަތަލާ އެންމެ ފަހުން ފެނިފައި ވަނީ މިދިޔަ ހުކުރު ދުވަހު ރިލީޒްކުރި ފިލްމު "ވިކީ ވިދިއާ ކާ ވޯ ވާލާ ވީޑިއޯ"އިންނެވެ.