16 Oct 2024, 08:40
ދާދިފަހުން އަމިއްލަ މިއުޒިކް ވީޑިއޯއެއް ރިލީޒްކުރި ބަތަލާ ޖެކްލީން ފެނާންޑޭޒްއަށް އެ ދާއިރާއިން މުޅިން އާ ކަންތައްތައް ތަޖުރިބާކުރެވި އުފެއްދުންތެރި ގިނަ ކަންކަން ދަސްވުމުގެ ފުރުސަތު ހުޅުވުނު ކަމަށް ބަތަލާ ބުނެފިއެވެ.
މީގެ ދުވަސްކޮޅެއް ކުރިން ޔޫޓިއުބް މެދުވެރިކޮށް ރިލީޒްކުރި "ސްޓޯމްރައިޑާ" މި ލަވައަށް މިހާތަނަށް މިލިއަނުން ހިޓްސް ލިބިފައިވާއިރު މިއީ ޖެކްލީންގެ އުފެއްދުންތެރިކަން އިތުރުވެ ބަތަލާގެ މުޅިން އާ ހުނަރެއް ބެލުންތެރިންނަށް ދައްކުވައިދިން ލަވައެކެވެ.
ފިލްމު ފެއާއަށް ދިން އިންޓަވިއުއެއްގައި ޖެކްލީން ބުނީ ބަތަލާގެ ބައްޕައަކީ ޕާޓް ޓައިމް ޑީޖޭއެއް ކަމަށާއި ބޮޑުވަމުން އައިއިރު ތަފާތު އެކި މިއުޒިކް ޖޯންރާއަށް ލޯ ހުޅުވި މިއުޒިކަށް އޭރު ވެސް ޝައުގުވެރިކަން އުފެދުނު ކަމަށެވެ.
އެހެންނަމަވެސް މޮޑެލިންގް ދާއިރާއަށް ވަދެވި ފަހުން ފިލްމު އިންޑަސްޓްރީގައި އަވަދިނެތި އުޅެން ޖެހުމުން ޖެކްލީންގެ ކިބައިގައި ހުރި މިއުޒިކީ ހުނަރަށް މާބޮޑު އިސްކަމެއް ނުދެވޭ ކަމަށް ބަތަލާ ވަނީ ބުނެފައެވެ.
ބަތަލާ ޖެކްލީން މިއުޒިކް އަދި އެކްޓަރު އަކްޝޭ ކުމާރު--ފޮޓޯ/ކޮއިމޮއި
ޖެކްލީންގެ މި ސިންގަލް މިއުޒިކް ވީޑިއޯ އަކީ އެއް އަހަރު ދުވަހުގެ ވަރަށް ބުރަ މަސައްކަތް ކަމަށާއި ލަވައިގެ ތީމް ބިނާކޮށްފައި ވަނީ ޖެކްލީންގެ އަމިއްލަ ދިރިއުޅުމުގައި އައި އަޑިގުޑަން ދަނޑިވަޅުތަކަށް ކަމަށް ވަނީ ބުނެފައެވެ. ޖެކްލީން އެކްޓުކޮށްފައިވާ މި މިއުޒިކް ވީޑިއޯ އުފައްދާފައި ވަނީ އިންޑިއާގެ ދަރިކޮޅަށް ނިސްބަތްވާ އަމްރިތާ ސެން އަދި ސްވެޑިޝް-ޖާމަން މިއުޒިކް ކުޅުންތެރިޔާ ރޮބިން ގްރުބާޓްއާ ގުޅިގެންނެވެ.
މި މިއުޒިކް ވީޑިއޯ މެދުވެރިކޮށް ހަޔާތުގައި ދެކެމުން އަންނަ ހުވަފެންތައް ހަގީގަތަކަށް ހެދުމަކީ އުނދަގޫ ކަމެއް ނޫންކަން އަންހެނުންނަށް އަންގައިދެވޭނެ ކަމަށް ގަބޫލުކުރާ ކަމަށް ޖެކްލީން ވަނީ ބުނެފައެވެ.
މި ސިންގަލް ލަވައާ އެކު މިއުޒިކް ދާއިރާއިން އިތުރު އުފެއްދުންތެރި ފުރުސަތުތަކެއް މިހާރު ވެސް ހުޅުވިފައިވާ ކަމަށާއި ވަރަށް އަވަހަށް ޖެކްލީންގެ އިތުރު މަސައްކަތްތައް ބެލުންތެރިންނަށް ފެންނާނެ ކަމަށް ބަތަލާ ވަނީ ބުނެފައެވެ.
ޖެކްލީން އެންމެ ފަހުން ބެލުންތެރިންނަށް ފެނިފައި ވަނީ މިދިޔަ މަހު ރިލީޒްވި ހޮލީވުޑް ފިލްމު "ކިލް އެމް އޯލް 2"އިންނެވެ.