15 Oct 2024, 16:07
ޔުއޭފާ ނޭޝަންސް ލީގުގެ ލީގު އޭގެ ގްރޫޕް ދެއެއްގައި ފަރަންސޭސިވިލާތާއި ބެލްޖިއަމް ބައްދަލުކުރި މެޗު ފަރަންސޭސީން ކާމިޔާބު ކޮށްފިއެވެ.
ބެލްޖިއަމްގެ ވެރިރަށް ބްރަސެލްސްގެ ސްޓާޑޭ ރޮއި ބައުޑޮއިންގައި ކުޅުނު މިމެޗު ފަރަންސޭސީން ކާމިޔާބު ކޮށްފައިވަނީ ދެލަނޑު އެއް ލަނޑުންނެވެ. ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ގިނައިރު ފަރަންސޭސީން ބޯޅަ ގެންގުޅުނު އިރު ގިނަ ހަމަލާ އުފައްދާފައިވަނީ ބެލްޖިއަމް އިންނެވެ. ގިނަ ހާދިސާތަކެއް ފެނިގެންދިޔަ މިމެޗުގައި ދެޓީމުވެސް ފެނިގެންދިޔައީ ހަމަލާއަށް އިސްކަންދީ މެޗުން ނަތީޖާއެއް ހޯދުމަށް މަސައްކަތް ކުރަމުންދިޔަ ތަނެވެ.
މިގޮތުން ދެޓީމުން ވެސް ގިނަ ހަމަލާތަކެއް ފުރަތަމަ ހާފުގައި އުފެއްދިތަން ފެނިގެންދިޔައެވެ. މިމެޗުގައި ލަނޑެއް ޖެހުމަށް އެންމެ ރަނގަޅު ފުރުސަތެއް ފުރަތަމަ ލިބިގެންދިޔައީ ބެލްޖިއަމްއަށެވެ. މެޗުގެ 20 ވަނަ މިނެޓުގައި ފަރަންސޭސި ޑިފެންޑާ ވިލިއަމް ސަލީބާ ބެލްޖިއަމްގެ ފޯވަޑް ލޮއިސް އޮޕެންޑާއަށް ކުރި ފައުލަކާ ގުޅިގެން ލިބުނު ޕަނަލްޓީ ބެލްޖިއަމްއަށް ކާމިޔާބު ކުރެވޭގޮތެއްނުވިއެވެ.
މި ޕެނަލްޓީ ބެލްޖިއަމްއަށް ދީފައިވަނީ ވީއޭއާރުން ބެލުމަށްފަހުއެވެ. މިމެޗުގައި ބެލްޖިއަމްގެ ކެޕްޓަންކަން ކުރަމުންދިޔަ ޔޫރީ ޓިއެލެމަންސް ފޮނުވާލި ބޯޅަ ދިޔައީ ގޯލުގެ ހުރަސް ދަނޑިމަތިން ބޭރަށެވެ. މިމެޗުގެ ފުރަތަމަ ލަނޑު ޖަހާ މެޗުގެ ލީޑު ނަގާފައިވަނީ ފަރަންސޭސީންނެވެ.
މެޗުގެ 35ވަނަ މިނެޓުގައި ލިބުނު ޕެނަލްޓީ އަކުން މިލަނޑު ކާމިޔާބު ކޮށްދިނީ ރަންޑާލް ކޯލޯ މުއާނީއެވެ. މިމެޗުގައި ބެލްޖިއަމްއިން މެޗުގެ ނަތީޖާ ހަމަހަމަ ކޮށްފައިވަނީ ފުރަތަމަ ހާފުގެ އިތުރު ވަގުތުގެ ތިންވަނަ މިނެޓުގައި އޮޕެންޑާ ކާމިޔާބު ކުރި ލަނޑަކުންނެވެ. މިލަނޑު އެންމެ ފުރަތަމަ އޮފް ސައިޑް ކަމަށް ދެއްކި ނަމަވެސް ވީއޭއާރުން ބެލުމަށްފަހު ވަނީ ލަނޑެއްކަމަށް ދައްކާފައެވެ.
މިމެޗުން ފަރަންސޭސީން މޮޅުވިލަނޑު މެޗުގެ 62ވަނަ މިނެޓުގައި ކާމިޔާބު ކޮށްދިނީ ވެސް ފުރަތަމަ ލަނޑު ޖަހައިދިން ކޯލޯ މުއާނީއެވެ. މިލަނޑު ޖެހުމުގެ ކުރިން މާނޫ ކޯނޭ ފަރަންސޭސީންނަށް ލީޑު ނަގައިދެވުނު ކަމަށް ހީކުރެވުނު ނަމަވެސް އެލަނޑު ވަނީ އޮފް ސައިޑް ކަމަށް ދައްކާފައެވެ.
މިމެޗުގައި ދެން ފެނިގެންދިޔައީ މެޗުގެ 76ވަނަ މިނެޓުގައި ފަރަންސޭސި ޓީމުގެ ކެޕްޓަން ބޭންޑް އަޅަައިގެން ކުޅެމުންދިޔަ އައުރެލިއަން ޗޫމޭނީ އަށް ދެވަނަ ރީނޑާއެކު ރަތްކާޑު ދެއްކި ތަނެވެ. މިކާޑާއެކު ބެލްޖިއަމްއިން އިތުރު ލަނޑެއް ޖެހޭތޯ މަސައްކަތް ކުރި ނަމަވެސް ނަތީޖާއަށް ބަދަލެއް ގެނެވޭގޮތެއް ނުވިއެވެ.
މިކާމިޔާބީއާއެކު ފަރަންސޭސީން އުޅެނީ ހަތަރު މެޗުން ލިބިފައިވާ ނުވަ ޕޮއިންޓާއެކު ގްރޫޕް ގެ ދެވަނައިގައެވެ. އަދި ބެލްޖިއަމް އުޅެނީ ހަތަރު ޕޮއިންޓާއެކު ގްރޫޕްގެ ތިންވަނައިގައެވެ.