15 Oct 2024, 09:43
ޔުއޭފާ ނޭޝަންސް ލީގު އޭގެ ގްރޫޕް ތިނެއްގައި ޖަރުމަނުވިލާތާއި ނެދަލަންޑްސް ބައްދަލުކުރި މެޗު ޖަރުމަނުން ކާމިޔާބުކޮށް ގްރޫޕްގެ އެއްވަނައިގާ ހަމަޖެހިލައިފިއެވެ.
ޖަރުމަނުވިލާތުގެ މިޔުނިކްގެ އެލިއާންޒް އެރީނާގައި ކުޅުނު މިމެޗު ޖަރުމަނުން ކާމިޔާބު ކޮށްފައިވަނީ 0-1 އިންނެވެ. މި މެޗު ފެށުމުގެ ކުރިން ޖަރުމަނުންވަނީ ޔޫރޯ މުބާރާތަށްފަހު ޤައުމީ ޓީމަށް ކުޅުން ހުއްޓާލި ތިން ކުޅުންތެރިއެއްގެ ޝަރަފުގައި ރަސްމިއްޔާތެއް ބާއްވާފައެވެ.
އެ ތިން ކުޅުންތެރިންނަކީ ޤައުމީ ޓީމުގެ ކުރީގެ ކެޕްޓަން އިލްކާއި، ގުންޑޮގާން، ކީޕާ މެނުއެލް ނޯޔާގެ އިތުރުން ފޯވަޑް ތޯމަސް މުލާއެވެ.
މިގޮތުން މިހަފްލާގައި އެކުޅުންތެރިންނަށް އަލްވަދާއު ކިޔުމުގެ ފުރުސަތު ކުޅިބެލުންތެރިންނަށް ލިބިގެންދިޔައެވެ. މިގޮތުން މި ހަފްލާގައި މި ކުޅުންތެރިން ޤައުމީ ޓީމަށް ކޮށްދިން ހިދުމަތުގެ އަގު ވަޒަން ކުރުން އޮތެވެ. އަދި އެ ކުޅުންތެރިންގެ އާއިލާއާއެކުގާ ކުރިން ކުޅުނު ބައެއް ކުޅުންތެރިންނާއި ކޯޗުން ބައިވެރިވިއެވެ.
ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ގިނައިރު ނެދަލަންޑްސް އިން ބޯޅަ ގެންގުޅުނު އިރު ގިނަ ހަމަލާ އުފައްދާފައިވަނީ ޖަރުމަނުންނެވެ. މިމެޗުގެ ފުރަތަމަ ހާފުގައި ލަނޑެއް ފެނިގެން ނުދިޔަ ނަމަވެސް ލަނޑު ޖަހާނެ ފުރުސަތު ދެ ޓީމަށް ވެސް ލިބިގެންދިޔައެވެ. މި މެޗުގެ ހަމައެކަނި ލަނޑު މެޗުގެ 64 ވަނަ މިނެޓުގައި ޖަރުމަނުވިލާތަށް ކާމިޔާބު ކޮށްދިނީ ޖެމީ ލެވެލިންއެވެ.
ލެވެލިން އަކީ ޖަމާލް މުސިއެލާއަށް އަނިޔާ ވުމުގެ ސަބަބުން އެންމެ ފަހު ވަގުތު ޓީމަށް ނެގުނު ކުޅުންތެރިއެކެވެ. މި މެޗު ނެދަލަންޑްސްއިން ކުޅެފައިވަނީ އެޓީމުގެ ކެޕްޓަން ވާޖިލް ވެން ޑައިކްއަށް އެންމެ ފަހު މެޗުގައި ދެއްކި ރަތް ކާޑާއެކު އޭނާ އާއި ނުލައެވެ.
އަދި މި މެޗުގައި ލަނޑެއް ޖެހުމާ އެންމެ ގާތަށް ދިޔައީ ކޯޑީ ގަކްޕޯ އާއި ޒާވީ ސިމޮންސްއެވެ. މި ދެ ކުޅުންތެރިން ފޮނުވާލި ދެ ހަމަލާ އަމާޒުވީ ޖަރުމަނު ގޯލްގެ ދަނޑިއަށެވެ.
މި ކާމިޔާބީއާއެކު ޖަރުމަނުން މިހާރު މިވަނީ ކުޅުނު ހަތަރު މެޗުން ލިބިފައިވާ 10 ޕޮއިންޓާއެކު ނޭޝަންސް ލީގުގެ ކުއާޓާ ފައިނަލެއް ހޯދުމާ ގާތަށް ޖެހިލާއިފައެވެ. އަދި ނެދަލަންޑްސް އުޅެނީ ފަސް ޕޮއިންޓާއެކު ގްރޫޕްގެ ދެވަނައިގައެވެ.
މި ގްރޫޕްގައި ދެން ހިމެނޭ ދެޓީމު ކަމުގައިވާ ހަންގޭރީ އާއި ބޮސްނިއާ އެންޑް ހާޒެގޮވީނާ ބައްދަލުކުރި މެޗު ދެ ލަނޑު ސުން ލަނޑުން ކާމިޔާބު ކޮށްފައިވަނީ ހަންގޭރީއެވެ.
މި މެޗުގައި ހަންގޭރީއިން ކާމިޔާބު ކުރި ދެ ލަނޑު ވެސް އެ ޓީމަށް ޖަހައިދިނީ ކެޕްޓަން ޑޮމިނިކް ޒޮބޯސްޒްލައިއެވެ. މި ކާމިޔާބީއާއެކު ހަންގޭރީ މިހާރުވަނީ ދެވަނައިގާ އުޅޭ ނެދަލަންޑްސް އާއި ޕޮއިންޓްގެ ގޮތުން އަރާ ހަމަކޮށްފައެވެ. އަދި ބޮސްނިއާ އުޅެނީ އެއް ޕޮއިންޓާއެކު ގްރޫޕްގެ އެންމެ ފުލުގައެވެ.