15 Oct 2024, 09:03
ބޮލީވުޑްގެ މަގުބޫލު ދެ ބަތަލާއިން ކަމަށްވާ ކްރިތީ ސެނޮން އާއި ކާޖޮލް އެކީގައި ފުރަތަމަ ފަހަރަށް ސްކްރީނުން ފެންނަ ފިލްމު "ދޯ ޕައްތީ"ގެ ޓްރެއިލާ އާއްމުންނަށް ދައްކާލައިފިއެވެ.
މި ފިލްމަކީ ނެޝަނަލް އެވޯޑު ހޯދާފައިވާ ބަތަލާ ކްރިތީ ސެނޮން ފުރަތަމަ ފަހަރަށް ޑަބަލް ރޯލަކުން ވެސް ފެންނާނެ ފިލްމެވެ.
ރީތި ވާހަކަތަކެއްގެ މައްޗަށް ބިނާކޮށް ސްކްރީންޕްލޭ ލިޔަން ކުޅަދާނަ ކަނީކާ ދިއްލޮން ލިޔެފައިވާ ވާހަކައެއްގެ މައްޗަށް ބިނާކޮށް އުފައްދާ މި ފިލްމުގެ ޑައިރެކްޓަރަކީ އަލަށް ފިލްމު ޑައިރެކްޝަނަށް ނުކުންނަ ޝަޝަންކާ ޗަތުރުވެދީއެވެ.
ކަނީކާ ދިއްލޮންގެ ކަތާ ޕިކްޗާސް އާއި ކްރިތީ ސެނޮންގެ އަމިއްލަ ފިލްމު ކުންފުނި ބްލޫ ބަޓަފްލައި ފިލްމްސް ގުޅިގެން ގެނެސްދޭ މި ފިލްމުން ކްރިތީ ފިލްމު ޕްރޮޑިއުސްކުރުމުގެ ދާއިރާއަށް ތައާރަފްވާނެއެވެ.
ފިލްމު "ދޯ ޕައްތީ"ގެ ޓްރެއިލާ ރިލީޒްކުރި ހަފްލާގައި ބަތަލާ ކާޖޮލް--ފޮޓޯ/ބޮލީވުޑްހަންގާމާ
ކާޖޮލް ފުރަތަމަ ފަހަރަށް ފުލުސް އޮފިސަރެއްގެ ރޯލްއިން ފެންނާނެ "ދޯ ޕައްތީ"އަކީ އޯޑިއަންސްއާ ވަރަށް ބޮޑަށް ގުޅުން އުފައްދައިދޭނެ ފިލްމެއް ކަމަށާއި މިހާރު ބޮޑަށް ބޭނުންވަނީ އެފަދަ ރޯލްތައް ކުޅެން ކަމަށް ކާޖޮލް ވަނީ ބުނެފައެވެ.
މި ފިލްމުގެ ވާހަކައަކީ ވަރަށް ބާރުހުރި ވާހަކައެއް ކަމަށާއި ކާޖޮލް މުޅިން ތަފާތު ރޯލަކުން ފެންނަ މި ފިލްމަށް ބެލުންތެރިންގެ ފަރާތުން ލިބޭނެ ފާޑުކިޔުންތަކަށް ވަރަށް ބޮޑަށް އިންތިޒާރުކުރެވޭ ކަމަށް ކާޖޮލް ބުނެފައިވެއެވެ.
މި މަހުގެ 25 ވަނަ ދުވަހު ނެޓްފްލިކްސްގައި ޕްރީމިއާކުރަން ހަމަޖެހިފައިވާ "ދޯ ޕައްތީ"އިން ފެންނާނެ އިތުރު ތަރިންގެތެރޭ ޓެލެވިޒަން އެކްޓަރު ޝަހީރު ޝޭހް އަދި ތަންވީ އަޒްމީ ހިމެނެއެވެ.