14 Oct 2024, 23:50
ސަރުކާރުން ވޭޕު ބޭނުންކުރުމާއި އެތެރެކުރުން މަނާކުރުމަށް މިއަދު ނިންމީ ވޭޕް ކުރަން ބޭނުން ކުރާ އާލާތްތައް ބޭނުންކޮށްގެން މަސްތުވާތަކެތި ބޭނުން ކުރުން އިތުރުވާތީ ކަމަށް ރައީސް ޑރ. މުހައްމަދު މުއިއްޒު މިރޭ ވިދާޅުވެއްޖެއެވެ.
ރައީސް ވަނީ ރާއްޖެއަށް ވޭޕް އެތެރެކޮށް ބޭނުން ކުރުން މަނާ ކުރަން ނިންމަވައި، އެކަން ކުރުމަށް ކަމާ ބެހޭ އިދާތާރަކުން ފިޔަވަޅު އެޅުމަށް އަންގަވާފައެވެ.
ރައީސް ވަނީ އެމަނިކުފާނުގެ ރަސްމީ އިންސްޓަގްރާމް އެކައުންޓުގައި، ރާއްޖޭގައި ވޭޕް މަނާ ކުރުމަށް ނިންމި ސަބަބުތައް ހާމަކުރައްވާފައެވެ.
View this post on Instagram
އެގޮތުން، ފާއިތުވި އަހަރުތަކުގައި އެއްވެސް ސަރުކާރަކަށް ވޭޕް ރެގިއުލޭޓް ކުރެވިފައިނުވާ ކަމަށާއި މިފަހުން ޒުވާނުންނާއި ކުޑަކުދިން ވޭޕް ބޭނުން ކުރާ މިންވަރު އިތުރުވެފައިވާ ކަމަށް އެމަނިކުފާނު ކުރެއްވި ޕޯސްޓުގައި ވެއެވެ.
އެކަމުގެ ސަބަބުން ސިއްޙީ އެތައް ނުރައްކަލަކަށް ހުށަހެޅޭ ކަން އެމަނިކުފާނު ވަނީ ފާހަގަކުރައްވާފައެވެ.
އިތުރަށް ރައީސް ވަނީ ވޭޕްގެ އާލާތްތައް ބޭނުންކޮށްގެން މަސްތުވާތަކެތި ބޭނުން ކުރާ މިންވަރު އިތުރުވަމުން އަންނަ ކަމަށާއި އެކަމުގެ ކަންބޮޑުވުންތައް ވަރަށް ބޮޑު ކަން ފާހަގަކުރައްވާފައެވެ.
ހަމައެހެންމެ، މަސްތުވާތަކެތި ފަތުރަން އާ އުކުޅުތައް ބޭނުން ކުރާތީ އެކަން ހުއްޓުވަން އުނދަގޫވެފައިވާ ކަމަށާއި އޭގެ ވަބާގައި ޖެހޭ ޒުވާނުން ގިނަވެ، އޯވަޑޯސްގެ ކޭސްތައް ވެސް ގިނަވެފައިވާ ކަން ރައީސް މުއިއްޒު ހާމަކުރައްވާފައިވެއެވެ.
މިދިޔަ ފަސް އަހަރު ތެރޭ ރާއްޖެއަށް 600،000 އަށްވުރެ ގިނަ ވޭޕްގެ އާލާތްތައް އެތެރެކޮށްފައިވާއިރު، ސަރުކާރުގެ އަމާޒަކީ ދުންފަތާ ދުރުވެފައިވާ ދުޅަހެޔޮ މުޖުތަމައުއެއް ބިނާކުރުން ކަމަށް އެމަނިކުފާނު ވިދާޅުވެފައިވެއެވެ.
ރައީސް މިއަދު ކުރެއްވި ޕޯސްޓުގައި ވަނީ، ވޭޕްކުރުމަށް ބޭނުންކުރާ ތަކެއްޗާއި، އެ ތަކެތީގެ ވަކިވަކި ބައިތައް ދިވެހިރާއްޖެއަށް އެތެރުކުރުން 15 ނޮވެމްބަރުން ފެށިގެން މަނާ ކުރުމަށް އަންގަވާފައި ވާކަމަށެވެ.
އަދި، ވޭޕްކުރުމަށް ބޭނުންކުރާ ތަކެތި ރާއްޖޭގައި ބޭނުންކުރުމާއި، ގެންގުޅުމާއި، އުފެއްދުމާއި، ވިއްކުމާއި، އިޝްތިހާރު ކުރުމާއި ހިލޭބެހުން މިއަހަރުގެ ޑިސެމްބަރު 15ވަނަ ދުވަހުން ފެށިގެން މަނާކުރުމަށް ކުރަންޖެހޭ އެންމެހާ ކަންކަން ކުރުމަށް ކަމާބެހޭ ފަރާތްތަކަށް އަންގަވާފައި ވަކަމަށް ރައީސްގެ ޕޯސްޓުގައި ވެއެވެ.
ފާހަގަކޮށްލެވޭ ގޮތުގައި، ރައީސްގެ ނިންމެވުމާ ގުޅިގެން ގިނަ ބަޔަކު އެ ނިންމެވުމަށް އަންނަނީ ތައުރީފު ކުރަމުންނެވެ. އަދި، ވޭޕާ އެއްކޮށް ސިނގިރޭޓާއި މަސްތުވާތަކެތީގެ އެހެނިހެން ބާވަތްތައް އެތެރެކުރުން ހުއްޓުވުމަށް ގިނަ ބަޔަކު އަންނަނީ ގޮވާލަމުންނެވެ.