14 Oct 2024, 22:33
ވޭޕުގެ ބާވަތްތައް މަނާކުރުމަކީ ޒުވާނުންނާއި ކުޑަކުދީންގެ ހައްގުގައި ރައީސް އެޅުއްވި ހަރުދަނާ ފިޔަވަޅެއް ކަމަށް ސަރުކާރު ހިންގާ މައި ޕާޓީ (ޕީއެންސީ)އިން ބުނެފިއެވެ.
އެ ޕާޓީން ވަނީ ވޭޕުގެ ބާވަތްތައް މަނާކުރުމަށް ރައީސް ނިންމެވުމުން އެކަމަށް ޝުކުރު އަދާކުރައްވާ ބަޔާނެއް ނެރެފައެވެ.
އެ ބަޔާނުގައި ވަނީ ޒުވާނުންނާއި ކުޑަކުދީންގެ މެދުގައި މަސްތުވާތަކެތި ފެތުރުމަށް މިހާރު ބޭނުންކުރަމުންދާ ވޭޕާއި އެއާ ގުޅުންހުރި އެކި ބާވަތްތައް ރާއްޖެއަށް އެތެރެކުރުމާއި ރާއްޖޭގައި ބޭނުންކުރުމާއި އޭގެއިން ވިޔަފާރިކުރުން މަނާ ކުރެއްވުމަށް ނިންމެވުމުން އެކަމަށް ރައީސަށް ޝުކުރު ދަންނަވާ މަރުހަބާ ދަންނަވާ ކަމަށެވެ.
ދުނިޔޭގެ އެކި ކަންކޮޅުތަކުގައި ހަދާފައިވާ ގިނަ ދިރާސާތަކުން ސާބިތުވާ ގޮތުގައި ވޭޕަކީ ދުންފަތުގެ އެހެނިހެން ބާވަތްތަކަށްވުރެ ނުރައްކާތެރި ގެއްލުން ބޮޑު އެއްޗެއް ކަމަށްވެސް އެ ބަޔާނުގައި ވަނީ ބުނެފައެވެ. އަދި އޭގެ ސަބަބުން ފުއްޕާމޭގައި ފެން އުފެދި ލިބޭ ގެއްލުންތަކުގައި ގިނަ އަދަދެއްގެ ޒުވާނުންގެ ފުރާނައަށް ނުރައްކާވާކަމީ މިހާރު ރެކޯޑު ކުރެވި ސާބިތުކުރެވިފައިވާ ހަގީގަތެއް ކަމަށްވެސް އެ ރިޕޯޓުގައި ވަނީ ބުނެފައެވެ.
ސިއްޚީ ނުރައްކަލުގެ އިތުރުން ވޭޕަކީ ޒުވާނުންނާއި ފުރާވަރުގެ ކުދީންގެ މެދުގައި މަސްތުވާތަކެތި ފެތުރުމަށް ބޭނުންކުރާ އެއްޗެއްކަން ކަމާ ގުޅުންހުރި އިދާރާތަކުގެ ސަމާލުކަމަށް އައިސްފައި ވާކަމަށް ވެސް އެ ބަޔާނުގައި ވަނީ ބުނެފައެވެ.
އަދި މި ހަގީގަތުގެ އަލީގައި މާހިރުނަނާއި މަދަނީ ޖަމިއްޔާތަކާއި ސިއްޚީ ދާއިރާގެ މާހިރުން ވޭޕު މަނާކުރުމަށް ގޮވާލަމުންދާތާ އަހަރުތަކެއް ވެފައި ވާއިރު ނިމިދިޔަ ސަރުކާރުން މިކަމުގައި ފިޔަވަޅެއް އަޅާފައި ނުވާކަން ވެސް ކޮންގްރެސް ޕާޓީން ނެރެފައިވާ ބަޔާނުގައި ވަނީ ފާހަގަކޮށްފައެވެ.
އެހެންކަމުން ވޭޕް މަނާކުރަން ރައީސް މުއިއްޒު ނިންމެވުމަކީ ދިވެހި ކުޑަކުދީންނާއި ޒުވާނުންގެ ހައްގުގައި ނިންމެވި ވަރަށް ބޮޑު ނިންމެވުމެއް ކަމަށް އެ ބަޔާނުގައި ވަނީ ބުނެފައެވެ.
އަދި ރައީސްގެ އެ ނިންމެވުމަށް އެ ޕާޓީން ފުރިހަމައަށް ތާއިދު ކުރައްވާ ކަމަށާއި މުސްތަގުބަލަށްޓަކައި އެމަނިކުފާނު ނިންމެވި ނިންމެވުން ތަންފީޒުކުރުމުގައި އެންމެހާ އިދާރާތަކާއި ވިޔަފާރިތަކާއި އާންމު ފަރުދުން އެއްބާރުލުން ދިނުމަށް އެ ޕާޓީއިން ވަނީ އިލްތިމާސް ކުރައްވާފައެވެ.