14 Oct 2024, 16:09
މާލީ ދާއިރާގައި އާޓިފިޝަލް އިންޓެލިޖެންސް (އޭއައި)އާއި މެޝިން ލާނިން ބޭނުންކުރުން އިތުރުވަމުން ދިއުމުން މާލީ ދާއިރާގެ ހަރުދަނާ ކަމަށް ނުރައްކާތަކެއް ކުރިމަތިވެދާނެ ކަމަށް އިންޑިއާގެ ރިޒާވް ބޭންކުގެ ގަވަރުނަރު ޝަކްތިކާންތާ ދާސް އިންޒާރު ދެއްވައިފިއެވެ.
ނިއު ދިއްލީގައި ބޭއްވުނު ޖަލްސާއެއްގައި ވާހަކަފުޅުދައްކަވަމުން ގަވަރުނަރު ވިދާޅުވީ, އޭއައިއަށް ބޮޑަށް ބަރޯސާވުމުން ވަކި ޚާއްޞަ ނުރައްކާތަކެއް ކުރިމަތިވެދާނެ ކަމަށެވެ. ޚާއްޞަކޮށް މަދު އަދަދެއްގެ ޓެކްނޮލޮޖީ ފޯރުކޮށްދޭ ފަރާތްތަކެއް މާކެޓް ކޮންޓްރޯލްކުރާ ހާލަތުގައެވެ.
"މި ސިސްޓަމްތަކުގައި މައްސަލަތަކެއް ދިމާވެއްޖެނަމަ، އޭގެ ނޭދެވޭ އަސަރު މުޅި މާލީ ދާއިރާއަށް ކުރާނެ," ދާސް ވިދާޅުވިއެވެ.
އިންޑިއާގެ މާލީ ޚިދުމަތްދޭ ފަރާތްތަކުން މިހާރު ވެސް ވަނީ ކަސްޓަމަރުންނަށް ދޭ ޚިދުމަތް ރަނގަޅުކުރުމަށާއި، ޚަރަދު ކުޑަކުރުމަށާއި، ރިސްކް މެނޭޖްކުރުމަށް އަދި ވިޔަފާރި ކުރިއެރުވުމަށް ޗެޓްބޮޓްތަކާއި ޕާސަނަލައިޒްޑް ބޭންކިން ފަދަ އޭއައި ޓެކްނޮލޮޖީތައް ބޭނުންކުރަން ފަށާފައެވެ.
ނަމަވެސް، އޭއައި ބޭނުންކުރުން އިތުރުވުމުން ސައިބާ ހަމަލާތަކާއި ޑޭޓާ ހޯދުމުގެ ނުރައްކާ އިތުރުވެގެންދާނެ ކަމަށް ދާސް ވިދާޅުވިއެވެ. އަދި، އޭއައިއަކީ "އޮޕެސިޓީ" (ދެނެގަންނަން އުނދަގޫ) އެއްޗަކަށްވުމުން، ލޯނު ދޫކުރުމުގެ ނިންމުންތައް ނަގާ އެލްގޮރިދަމްތައް އޮޑިޓްކޮށް ދެނެގަތުމަށް އުނދަގޫވެ، "މާކެޓަށް ލަފާނުކުރެވޭ ނަތީޖާތަކެއް ނުކުމެދާނެ" ކަމަށް ވެސް އޭނާ އިންޒާރުދެއްވިއެވެ.
މީގެ އިތުރުން، ދުނިޔޭގެ އެކި ކަންކޮޅުތަކުގައި ޕްރައިވެޓް ކްރެޑިޓް މާކެޓްތައް އަވަސް ސްޕީޑެއްގައި ފުޅާވަމުންދާއިރު، އެކަށީގެންވާ ރެގިއުލޭޝަންތަކެއް ނެތުމުން މާލީ ދާއިރާގެ ހަރުދަނާކަމަށް ބޮޑެތި ނުރައްކާތަކެއް ކުރިމަތިވެދާނެ ކަމަށް ވެސް ދާސް ވިދާޅުވިއެވެ.
ދުނިޔޭގެ އެކި ދާއިރާތަކުގައި އާޓިފިޝަލް އިންޓެލިޖެންސް (އޭއައި) ބޭނުންކުރުން ވަނީ އިންތިހާއަށް އިތުރުވެފައެވެ. ސްޓެޓިސްޓާގެ ރިޕޯޓެއްގެ މަޢުލޫމާތު ދައްކާ ގޮތުގައި 2022 ވަނަ އަހަރު ދުނިޔޭގެ އޭއައި މާކެޓްގެ އަގު 136.55 ބިލިއަން ޑޮލަރަށް އަރާފައިވާއިރު، 2030 ވަނަ އަހަރާ ހަމައަށް މި އަދަދު 1.8 ޓްރިލިއަން ޑޮލަރަށް އަރާނެކަމަށް ލަފާކުރެވެއެވެ.
މާލީ ދާއިރާގެ އިތުރުން ޞިއްޙީ ދާއިރާ، ތަޢުލީމީ ދާއިރާ، އުފެއްދުންތެރިކަމުގެ ދާއިރާ އަދި ދަތުރުފަތުރުގެ ދާއިރާ ފަދަ ގިނަ ދާއިރާތަކުގައި އޭއައިވަނީ މުހިންމު ދައުރެއް އަދާކުރަން ފަށާފައެވެ. މިކަމުގެ ސަބަބުން ވަޒީފާގެ ބާޒާރަށާއި އިޖުތިމާޢީ ގުޅުންތަކަށް ބޮޑެތި ބަދަލުތަކެއް އަންނަމުންދާކަން ފާހަގަކުރެވެއެވެ.