14 Oct 2024, 11:41
ތެލްއަވީވު (14 އޮކްޓޯބަރު 2024) : މިމަހުގެ އެއް ވަނަ ދުވަހު އީރާނުން އިސްރާއީލަށް ދިން މިސައިލް ހަމަލާތަކުގައި އިސްރާއީލަށް މާއްދީ ބޮޑެތި ގެއްލުންތަކެއް ލިބި އެތައް ބަޔަކު ޒަޚަމްވިކަމަށް އެ ގައުމުގެ ނޫހެއް ކަމަށްވާ "ޔަދިއޮތު އަހްރަނޮތު" އިން ހާމަކޮށްފިއެވެ.
އިތުބާރު ހުރި އިސްރާއީލުގެ މަސްދަރުތަކަކާ ހަވާލާދީ އެ ނޫސް ބުނާގޮތުން އީރާނުގެ ހަމަލާތަކުގައި އިސްރާއީލުގެ ނުވަ އަސްކަރީ ބޭހަކަށް ގެއްލުންތައް ލިބުނެވެ. އަދި އިސްރާއީލުގެ އެންމެ ބޮޑު ވައިގެ ބޭސްކަމަށްވާ ނަވާތީމް ވައިގެ ބޭސްއަށް ބޮޑެތި ގެއްލުންތަކެއް ވެސް ލިބުނެއެވެ. މީގެ ތެރޭގައި އެތަނުގެ ހޭންގަރެއްގައި އޮތް އެފް-16 ގެ ބައެއް ފައިޓާޖެޓްތަކަށް ބޮޑެތި ގެއްލުންތަކެއް ލިބުން ހިމެނެއެވެ. މި ގެއްލުންތަކުގެ ތަފްސީލު ސާފުވެފައެއް ނުވެއެވެ.
އީރާނުގެ ހަމަލާތަކުގައި އިސްރާއީލުގެ މަދަނީ ތަންތަނަށް ލިބުނު ގެއްލުންތައް މިހާރުވަނީ ވަނީ އާންމުންނަށްވެސް އެނގިފައެވެ. އީރާނުގެ ހައިޕާސޮނިކް މިސައިލްތަކެއް އެރުމުގެ ސަބަބުން އިސްރާއީލުގެ ވެރިރަށް ޓެލްއަވީވް އާއި ދެވަނައަށް އެންމެ ބޮޑު ސިޓީކަމަށްވާ ހައިފާގައި ލަގްޒަރީ ކޮންޑޮމީނިޔަމް އިމާރާތްތަކަކަށް ބޮޑެތި ގެއްލުންތަކެއް ލިބިފައިވާކަންވަނީ ހާމަވެފައެވެ.
މިގޮތުން ޓެލްއަވީވް އާއި ހައިފާގައި ލަގްޒަރީ ކޮންޑޮމީނިޔަމް ތަކުގައިވާ ލަގްޒަރީ އެޕާޓްމަންޓް ތަކުގެ ތެރެއިން 138 އެޕާޓްމަންޓް، އީރާނުގެ ހަމަލާތަކުގައި ވަރަށް ފުނޑުފުނޑު ވެފައިވާކަމަށް އެތަންތަނުގެ ވެރިފަރާތްތަކާ ހަވާލާދީ "ޔަދިއޮތު އަހްރަނޮތު" ބުނެއެވެ.
އެތަންތަނުގައި ދިރިއުޅުނު މީހުން ސަލާމަތްވި ކަމަށްވަނީ އަވަހަށް ބިންގަރާސްތަކަށް ވަނުމުންނެވެ. އީރާނުގެ ހަމަލާތަކުގައި ގިނައިން ޒަޚަމްވީ އިސްރާއީލުގެ އަސްކަރީ ބޭސްތަކުގައި އުޅުނު ސިފައިންގެ މީހުންކަމަށް އެ ނޫސް ބުނެއެވެ.
އީރާނުގެ ހަމަލާތައް އިސްރާއީލަށް އަރަނީ
އިސްރާއީލުގެ އެތެރެއިން ލިބޭ ޚަބަރުތަކާ ހަވާލާދީ "ޔަދިއޮތު އަހްރަނޮތު" ބުނިގޮތުގައި އީރާނުގެ ހައިޕާސޮނިކް މިސައިލެއް އިސްރާއީލުގެ ވެރިރަށް ތެލްއަވީވުގެ އަތިރިމަތީގައިވާ ސީއެންޑްސަން ލަގްޒަރީ ކޮންޕްލެކްސް އިމާރާތާ ހައެއްކަ މީޓަރު ކައިރިއަށް ވެސް ވެއްޓުނެވެ. މިކަމުގެ ސަބަބުން އެއިމާރާތަށް ބޮޑެތި ގެއްލުންތަކެއް ލިބުނެވެ. މިގެއްލުންތަކުގެ އަގު އެކަނިވެސް 53 މިލިޔަން އެމެރިކާ ޑޮލަރަށް އަރާކަމަށް އެ ނޫސް ބުނެއެވެ.
އިސްރާއީލުގެ އަސްކަރިއްޔާ ބުނެފައިވާގޮތުން އީރާނުގެ ހަމަލާތަކުން އެ ގައުމަށް މާބޮޑު ގެއްލުމެއް ނުލިބެއެވެ. އިސްރާއީލު ވަނީ އީރާނުގެ ހަމަލާތަކުން ލިބުނު ގެއްލުމާބެހޭ އެއްވެސް މައުލޫމާތެއް އެއްވެސް ފަރާތަކާ ހިއްސާ ނުކުރުމަށާއި އީރާނުގެ ހަމަލާތައް އެރި ތަންތަކުގެ މައުލޫމާތުވެސް އެއްވެސް ފަރާތަކަށް ނުދިނުމަށާއި އެތަންތަން ފޮޓޯވެސް ނުނެގުމަށް އިސްރާއީލުގެ އާންމުންނަށާއި އެ ގައުމުގައި ދިރިއުޅޭ ފަރާތްތަކަށް އަންގައި އިންޒާރުކޮށްފައެވެ. އިސްރާއީލުން ވަނީ އީރާނުގެ މިސައިލްތައް އަމާޒުވި އިސްރާއީލުގެ ތަންތަނުގެ ފޮޓޯ ނަގަންއުޅުނު އެމެރިކާ މީހަކު ހައްޔަރުވެސް ކޮށްފައެވެ.
އީރާނުގެ ހަމަލާތައް އިސްރާއީލުގެ އަސްކަރީ ދެ ބޭސް އަކަށް އީރާނުގެ ހަމަލާތައް އެރިކަމާއި އެކަމުގެ ސަބަބުން މާބޮޑު ގެއްލުމެއް ނުލިބޭކަމަށް ބުނުން ފިޔަވައި އެހެން މައުލޫމާތެއް އިސްރާއީލުން ރަސްމީ ސިފައެއްގައި ހާމަކޮށްފައެއް ނުވެއެވެ.
ރިޕޯޓްތައް ބުނާގޮތުން ތެލްއަވީވުގައި ހުންނަ އިސްރާއީލުގެ ޖާސޫސީ އިދާރާ "މޫސާދް" ގެ މައި މަރުކަޒާ ސަތޭކަ ވަރަކަށް މީޓަރު ކައިރިން އީރާނުގެ ހައިޕާސޮނިކް މިސައިލެއް ދަތުރުކޮށްފައިވެއެވެ. އެ މިސައިލް "މޫސާދު" ގެ މައި މަރުކަޒުގެ ކައިރިން ދާގޮތަށް އީރާނުން ފޮނުވާލީ އިސްރާއީލަށް އިންޒާރު ދިނުމުގެ ގޮތުންކަމަށް ބެލެވޭކަމަށް މުހައްލިލުން ވިދާޅުވެއެވެ.
އީރާން ބުނާގޮތުން މި މަހުގެ އެއްވަނަ ދުވަހު އެ ގައުމުން އިސްރާއީލަށް ދިން ބަދަލު ހިފުމުގެ ހަމަލާތަކުގައި ހައިޕާ ސޮނިކް މިސައިލް ވަނީ ފުރަތަމަ ފަހަރަށް އިސްރާއީލާ ދެކޮޅަށް ބޭނުންކޮށްފައެވެ. ހައިޕާ ސޮނިކް މިސައިލް އަކީ ރާޑަރަށް ނާރާ އަދި ވައްޓާވެސް ނުލެވޭ ވަރަށް ބާރުގަދަ މިސައިލެކެވެ.
އީރާނުން އިސްރާއީލަށް ދިން ހަމަލާތަކުގައި ބޭނުންކުރިކަމަށް ވަނީ އަޑަށްވުރެ 10 ގުނަ ބާރަށް ދަތުރުކުރާ ހައިޕާސޮނިކް މިސައިލްއެވެ.
އީރާން ބުނެފައިވާގޮތުން ހައިޕާސޮނިކް އެއްވެސް މިސައިލެއް އިސްރާއީލަށް މަތަ ކުރެވިފައެއް ނުވެއެވެ. އެބާވަތުގެ މިސައިލްތައް އަމާޒު ކުރި އިސްރާއީލުގެ ހުރިހާތަންތަންތަނަށް އެތަކެތި ފުރިހަމައަށް އަރާފައިވާކަން އީރާނުގެ އަސްކަރީ މަސްއޫލުވެރިއަކު ވަނީ ކަށަވަރުކޮށް ދެއްވާފައެވެ.
އިސްރާއީލުން ވަނީ އީރާނުގެ ހަމަލާތަކުގެ ރައްދުގައި 24 ގަޑީއިރުވެސް ނުވަނީސް އީރާނުގެ އަސްކަރީ މަދަނީ އަދި ނިއުކްލިޔާ މަރުކަޒުތަކަށް ހަމަލާދޭނެކަމަށް ބުނެ އެތައް ފަހަރަކު އިންޒާރު ދީފައެވެ. ނަމަވެސް އީރާނުގެ ހަމަލާތަކަށް ދެ ހަފުތާ ވީއިރުވެސް އީރާނަށް ހަމަލާދޭން އިސްރާއީލަށް ކެރިފައެއް ނުވެއެވެ. ނަމަވެސް އީރާނަށް ވަރަށް ވޭންދެނިވި ހަމަލާތަކެއް ދޭނެކަމަށް ބުނެ އިސްރާއީލު ގެންދަނީ ހަރުކަށި އިންޒާރުތައް ދެމުންނެވެ.