14 Oct 2024, 13:05
ޔުއޭފާ ނޭޝަންސް ލީގު ބީގެ ގްރޫޕް ތިނެއްގައި އޮސްޓްރިއާ އާއި ނޯވޭ ބައްދަލުކުރި މެޗު އޮސްޓްރިއާއިން ކާމިޔާބު ކޮށްފިއެވެ.
އޮސްޓްރިއާގައި ކުޅުނު މި މެޗު އެޓީމުން ކާމިޔާބު ކޮށްފައިވަނީ ހީކުރި ވަރަށް ވުރެ ފަސޭހަ ކަމާއެކު 1-5 އިންނެވެ. ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ އޮސްޓްރިއާއިންނެވެ. އަދި މި މެޗުގެ ފެށުން ރަނގަޅުވީ ވެސް އޮސްޓްރިއާގެއެވެ.
މިގޮތުން މެޗުގެ އަށްވަނަ މިނެޓުގައި އުފެއްދި ހަމަލާއެއްގައި އޮސްޓްރިއާއިންވަނީ މެޗުގެ ލީޑު ނަގައިފައެވެ. މިލަނޑު އެ ޓީމަށް ކާމިޔާބު ކޮށްދިނީ ތަޖްރިބާކާރު ފޯވަޑް މާކޯ އަނޯޓޮވިޗްއެވެ. ނަމަވެސް ނޯވޭއިންވަނީ ފުރަތަމަ ހާފު ނިމެން ހަ މިނެޓަށް ވެފައިވަނިކޮށް އެލެގްޒެންޑާ ސޮރިއޮތު ޖަހައިދިން ލަނޑުން މެޗުގެ ނަތީޖާ ހަމަހަމަ ކޮށްފައެވެ.
ފުރަތަމަ ހާފު ހަމަހަމަކޮށް ނިމިގެންދިޔަ ނަމަވެސް ދެވަނަ ހާފުގައި ފެނިގެންދިޔައީ އޮސްޓްރިއާއިން އިތުރު ހިތްވަރަކާއެކު މެޗު ކާމިޔާބު ކުރުމަށް ނިކުން ތަނެވެ. މިގޮތުން ދެވަނަ ހާފުގެ ކުޅުން ފެށިތާ ހަތަރުވަނަ މިނެޓުގައި އެ ޓީމަށް ލިބުނު ޕެނަލްޓީ އަކުން އޮސްޓްރިއާއިންވަނީ ދެވަނަ ފަހަރަށް މެޗުގެ ލީޑު ނަގައިފައެވެ.
މި ފަހަރު ވެސް މިލަނޑު ކާމިޔާބު ކޮށްދިނީ ފުރަތަމަ ލަނޑު ކާމިޔާބު ކޮށްދިން އަނޯޓޮވިޗްއެވެ. މި މެޗުގައި އޮސްޓްރިއާގެ ތިންވަނަ ލަނޑު އެޓީމަށް ކާމިޔާބު ކޮށްދިނީ މެޗުގެ 58 ވަނަ މިނެޓުގައި ފިލިޕް ލިއެންހާޓްއެވެ.
މި ލަނޑު ޖެހިތާ ހަތަރު މިނެޓު ފަހުން އޮސްޓްރިއާގެ ހަތަރު ވަނަ ލަނޑު ސްޓެފަން ޕޯޝް ޖަހައިދިން އިރު ފަހު ލަނޑު މެޗުގެ 71 ވަނަ މިނެޓުގައި ކާމިޔާބު ކޮށްދިނީ މައިކަލް ގްރެގޮރިޓްސްއެވެ.
މިކާމިޔާބީއާއެކު އޮސްޓްރިއާއިން މިވަނީ ގްރޫޕްގެ އެއްވަނަ މަގާމްގައި އޮތް ނޯވޭ އާއި ޕޮއިންޓްގެ ގޮތުން އަރާ ހަމަހަމަ ކޮށްފައެވެ. މިދެޓީމަށްވެސް މިހާރުވަނީ ހތަރު މެޗުން ހަތް ޕޮއިންޓް ލިބިގެން ގޮސްފައެވެ.