13 Oct 2024, 23:32

ކައުންސިލްތަކުގެ ގާނޫނީ ޒިންމާ އަދާކުރުމަށް މި ސަރުކާރުން މަގުފަހިކޮށްދޭ ކަމަށާއި، މީޑިއާތަކުން އެ ކަން ހާމަވާ ކަމަށް ލޯކަލް ގަވަނަންސް މިނިސްޓަރު އާދަމް ޝަރީފް އުމަރު މިރޭ ވިދާޅުވެއްޖެއެވެ.

އިދިކޮޅު އެމްޑީޕީން ކުރިޔަށް ގެންދާ "ލާމަރުކަޒީ ގުޅުން" ކޮންފަރެންސްގައި، އެ ޕާޓީއަށް ނިަސްބަތްވާ އުތުރުގެ ރަށްތަކުގެ ކައުންސިލަރުންނާއި ޑަބްލިއުޑީސީގެ މެންބަރުން ވަނީ މި ސަރުކާރުން ލާމަރުކަޒީ ނިޒާމު ހަނިކުރަމުންދާ ކަމަށް ބުނެ، އެ ނިޒާމު ދިފާއުކުރަން އިގުރާރުވެފައެވެ.

ލާމަރުކަޒީ ގާނޫނު ދިފާއުކުރުމަށް އުތުރުގެ ކައުންސިލަރުން އިގުރާރުވެފައިވަނިކޮށް، މިނިސްޓަރު އެކްސްގައި މިރޭ ކުރެއްވި ޕޯސްޓެއްގައި ވިދާޅުވީ ތަފާތު ކުރުމެއް ނެތި މި ސަރުކާރުން ހުރިހާ ކައުންސިލްތަކަށް ފުރިހަމަ އެއްބާރުލުންދީ، ކައުންސިލްތަކުގެ ގާނޫނީ ޒިންމާ އަދާކުރުމުގެ މަގު ފަހިކޮށްދޭ ކަމަށާއި، އެ ކަން މީޑިއާގައި ހާމަވަމުންދާ ކަމަށެވެ.

މިނިސްޓަރު ވިދާޅުވި ގޮތުގައި ލާމަރުކަޒީ ނިޒާމު ހަރުދަނާކޮށް ކައުންސިލްތައް މާލީ ގޮތުން ބާރުވެރި ކުރުމަށް ރައީސް ޑރ. މުހައްމަދު މުއިއްޒު ގެންދަވަނީ ހަރުދަނާ ސިޔާސަތުތަކެއް އެކަށައަޅުއްވައި، ތަންފީޒު ކުރައްވަމުންނެވެ.

މި ސަރުކާރުން އެކުލަވާލާފައިވާ ކައުންސިލްތަކަށް ފަޅުރަށް ލިބޭނެ އުސޫލުގެ ދަށުން، އެ ކައުންސިލްތަކުން މިހާރު ޕްރޮޕޯޒަލްތައް ހުށަހަޅަމުންދާ ކަމަށާއި، އެ ހުށަހެޅުންތައް ރިވިއު ކުރަމުންދާ ކަމަށް މިނިސްޓަރު ވިދާޅުވިއެވެ.

ރައީސް މުއިއްޒުގެ ސަރުކާރުން ވެސް ވަނީ ލާމަރުކަޒީ ނިޒާމުގެ ތެރެއިން ކައުންސިލްތަކަށް މުހިންމު ކަންތައްތަކެއް ފަހިކޮށްދީފައެވެ. އޭގެ ތެރޭގައި:

  • ރަށުން ނަގާ ޓެކްސްގެ 10 ޕަސަންޓު ކައުންސިލްތަކަށް ލިބޭނެ ނިޒާމެއް އިއުލާން ކުރެއްވުން

  • ކައުންސިލްތަކުގެ އުމްރާނީ ހާލަތު، ރައީސް އަމިއްލަފުޅަށް ބައްލަވައި، 50 ކައުންސިލް އިދާރާ އެޅުއްވުމަށް މިހާރު ދަނީ ތައްޔާރުވަމުން
  • އަދި ކޮންޓްރެކްޓާ ފައިނޭންސްގެ ދަށުން 55 ކައުންސިލް އެޅުމަށް ހުށަހަޅާފައިވާ ޕްރޮޕޯޒަލް ރިވިއުކޮށް، އިކޮނަމިކް ކައުންސިލަށް ވަނީ ހުށަހަޅާފައި

މިނިސްޓަރު ވިދާޅުވި ގޮތުގައި ލާމަރުކަޒީ ނިޒާމު ހަރުދަނާ ކުރެއްވުމަށް ޓަކައި ރައީސް މުއިއްޒު ވަރަށް ބޮޑު އިސްކަމެއް ދެއްވައެވެ.

އިދިކޮޅު އެމްޑީޕީން ތުހުމަތުކުރާ ގޮތުގައި މި ސަރުކާރަކީ ލާމަރުކަޒީ ނިޒާމާއި ބީރައްޓެހި، އަދި އެ ނިޒާމުގެ ތެރެއިން ކައުންސިލްތަކަށް ދީފައިވާ ބާރުތައް ހަނިކުރަން މަސައްކަތް ކުރާ ފިކުރެއް އޮތް ސަރުކާރެކެވެ.