13 Oct 2024, 23:28
އިންސްޓަންޓް މެސެޖިން އަދި އޯޑިއޯ/ވީޑިއޯ ކޯލް އެޕްލިކޭޝަނެއް ކަމުގައިވާ ޑިސްކޯޑްގެ ބޭނުންކުރާ މީހުންގެ އަދަދު މިލިއަނުން ގުނޭއިރު، މި ޕްލެޓްފޯމުގައި ކުށްކުރުން އިތުރުވަމުންދާކަމަށް ބުނެ ފާޑުކިޔުންތަކެއް އަމާޒުވަމުންދާކަމަށް ރިޕޯޓުތަކުން ދައްކައިފިއެވެ.
2015ވަނަ އަހަރު އެމެރިކާގައި ގާއިމުކުރެވުނު މި ޕްލެޓްފޯމަކީ ގޭމިން ކޮމިއުނިޓީތަކުގެ މެދުގައި ވަރަށް މަގުބޫލު ޕްލެޓްފޯމެކެވެ. ނަމަވެސް މި ޕްލެޓްފޯމުގައި ކޮންޓްރޯލްތައް މަދުވުމުގެ ސަބަބުން ކުށްކުރުން އިތުރުވަމުންދާ ކަމަށް މާހިރުން ފާހަގަކުރެއެވެ.
ޑިސްކޯޑްގެ ބޭނުންކުރާ މީހުންގެ ތެރެއިން 53 ޕަސަންޓަކީ 24 އާއި 34 އަހަރާ ދެމެދުގެ މީހުންނެވެ. އަދި މި ޕްލެޓްފޯމްގެ ޔޫޒަރުންގެ ތެރެއިން ކޮންމެ 10 މީހުންގެ ތެރެއިން ހަތް މީހުންނަކީ ފިރިހެނުންނެވެ.
މި ޕްލެޓްފޯމުގައި އެކި ބާވަތުގެ ކުށްތައް ހިންގަމުންދާކަމަށް ތުހުމަތުކުރެވޭ ކަމަށާއި، މީގެ ތެރޭގައި ވަގަށް ނަގާފައިވާ ކްރެޑިޓް ކާޑު މަޢުލޫމާތު ހިއްސާކުރުމާއި، ގާނޫނާ ޚިލާފު ގްރޫޕްތައް އުފެއްދުން ހިމެނޭކަމަށް ރިޕޯޓުތަކުން ދައްކައެވެ. އަދި ކުޑަކުދިންނަށް ޖިންސީ ގޯނާކުރުމާ ގުޅޭ މަޢުލޫމާތު ހިއްސާކުރާކަމުގެ ތުހުމަތުތަކެއްވެސް ކުރެވެއެވެ.
މި ކަންކަމާ ގުޅިގެން ތުރުކީ ސަރުކާރުން ވަނީ ބުދަ ދުވަހު ޑިސްކޯޑަށް ވަނުން މަނާކޮށްފައެވެ. އަދި ރަޝިއާގެ ސެންސަރޝިޕް ރެގިއުލޭޓަރުން ބުނާ ގޮތުގައި ޕްލެޓްފޯމުގައި ހުރި 947 މެޓީރިއަލް ރަޝިއާގެ ގާނޫނާ ޚިލާފު ކަމަށް ބުނެ އެ ޤައުމުންވެސް ވަނީ ޑިސްކޯޑް ބްލޮކްކޮށްފައެވެ.
މި ފިޔަވަޅުތަކާއެކު، ޑިސްކޯޑްގެ ސަލާމަތީ ފިޔަވަޅުތައް ހަރުދަނާކުރުމަށް ގިނަ ފަރާތްތަކުން ގޮވާލަމުންދާކަން ފާހަގަކުރެވެއެވެ.