13 Oct 2024, 23:18
ޔުއޭފާ ނޭޝަންސް ލީގު އޭގެ ގްރޫޕް އެކެއްގައި ކްރޮއޭޝިއާ އާއި ސްކޮޓްލަންޑް ބައްދަލުކުރި މެޗު ފަހަތުން އަރާ ކްރޮއޭޝިއާއިން ކާމިޔާބު ކޮށްފިއެވެ.
ކްރޮއޭޝިއާގެ ވެރިރަށް ޒަގްރެބްގެ ސްޓާޑިއޮން މަކްސިމީރުގައި ކުޅުނު މިމެޗު އެޓީމުން ކާމިޔާބު ކޮށްފައިވަނީ ދެ ލަނޑު އެއް ލަނޑުންނެވެ. ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ދެޓީމުގެ ފަރާތުން ވަރަށް ހަމަހަމަ ކުޅުމެއް ފެނިގެންދިޔައިރު ގިނަ ހަމަލާ އުފައްދާފައިވަނީ ކްރޮއޭޝިއާއިންނެވެ.
ނަމަވެސް މިއާއެކު ވެސް މެޗުގެ ފެށުން ރަނގަޅު ކަމަށް ފާހަގަ ވެގެންދިޔައީ މިފަހަރުގެ ނޭޝަންސް ލީގުގައި ފުރަތަމަ ކާމިޔާބީ ހޯދުމަށް މަސައްކަތް ކުރަމުންދިޔަ ސްކޮޓްލަންޑްގެއެވެ. މިގޮތުން މެޗުގެ 32ވަނަ މިނެޓުގައި ސްކޮޓްލަންޑް އިން ވަނީ މިމެޗުގެ ލީޑު ނަގައިފައެވެ.
މިލަނޑު އެޓީމަށް ކާމިޔާބު ކޮށްދިނީ ރަޔަން ކްރިސްޓީއެވެ. ނަމަވެސް ސްކޮޓްލަންޑަށް މިލީޑު ދެމެހެއްޓޭވަރުވީ ހަތަރު މިނެޓް ވަންދެނެވެ. ކްރޮއޭޝިއާއިން ވަނީ މެޗުގެ 36ވަނަ މިނެޓުގައި އުފެއްދި ހަމަލާއެއްގައި އީގޯ މަޓަނޮވިޗް ކާމިޔާބު ކޮށްދިން ލަނޑާއެކު މެޗުގެ ނަތީޖާ ހަމަހަމަ ކޮށްފައެވެ. މިލަނޑާއެކު ފުރަތަމަ ހާފު ނިމިގެންދިޔައީ މިނަތީޖާގައި އޮވެގެންނެވެ.
މިމެޗުން ކްރިއޭޝިއާ މޮޅުވި ލަނޑު މެޗުގެ 70ވަނަ މިނެޓުގައި އެޓީމަށް ކާމިޔާބު ކޮށްދިނީ އަންޑްރޭ ކްރަމަރިޗްއެވެ. މިއީ އޭނާ ޤައުމީ ޓީމަށް ކުޅުނު 99ވަނަ މެޗުގައި ކާމިޔާބު ކޮށްދިން 30ވަނަ ލަނޑެވެ. މިމެޗުގެ އިތުރު ވަގުތުގައި ސްކޮޓްލަންޑަށް މެޗުގެ ނަތީޖާ ހަމަހަމަ ކުރެވުނު ކަމަށް ހީވި ނަމަވެސް ޝޭ އެޑަމްސް ކްރޮއޭޝިއާގެ ގޯލަށް ބޯޅަ ވައްދާލިއިރު އޭނާ ހުރީ އޮފް ސައިޑްގައި ކަން ވީއޭއާރުން ބެލުމަށްފަހު ހާމަކުރުމާއެކު އެލަނޑު ބަލައިގެންފައެއް ނުވެއެވެ.
މިކާމިޔާބީއާއެކު ކްރޮއޭޝިއާއިން ވަނީ ގްރޫޕް އެކެއްގައި ކުޅުނު ތިން މެޗުން ލިބިފައިވާ ހަ ޕޮއިންޓާއެކު ދެވަނައަށް ކުރިއަށް ޖެހިލާފައެވެ. އަދި ސްކޮޓްލަންޑް އުޅެނީ ޕޮއިންޓެއް ނުލިބި އެންމެ ފުލުގައެވެ.