13 Oct 2024, 15:16
ޔުއޭފާ ނޭޝަންސް ލީގު އޭގެ ގްރޫޕް އެކެއްގައި ޕޯޗުގަލް އާއި ޕޮލެންޑް ބައްދަލުކުރި މެޗު ޕޯޗުގަލްއިން ކާމިޔާބު ކޮށްފިއެވެ.
ޕޮލެންޑްގައި ކުޅުނު މި މެޗު ޕޯޗުގަލްއިން ކާމިޔާބު ކޮށްފައިވަނީ ތިން ލަނޑު އެއް ލަނޑުންނެވެ.
މި މެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ޕޯޗުގަލްއިންނެވެ. މި މެޗު ޕޯޗުގަލް އިން ފެށީ ވަރަށް ފޯރީގައެވެ. މިގޮތުން މި މެޗުގެ ލީޑު އެންމެ ފުރަތަމަ ޕޯޗިގަލްއިން ނެގުމުގެ ކުރިން އެ ޓީމުގެ ތަޖުރިބާކާރު ކެޕްޓަން ކްރިސްޓިއާނޯ ރޮނާލްޑޯ ފޮނުވާލި ހަމަލާއެއް ވަނީ ޕޮލެންޑްގެ ގޯލްގެ ދަނޑިއަށް އަމާޒުވެފައެވެ.
މި މެޗުގެ ފުރަތަމަ ލަނޑު ޕޯޗުގަލްއިން ކާމިޔާބުކޮށް ލީޑު ނަގާފައިވަނީ މެޗުގެ 26 ވަނަ މިނެޓުގައެވެ. މި ލަނޑު އެ ޓީމަށް ކާމިޔާބު ކޮށްދިނީ ބްރޫނޯ ފެނާންޑޭޒް ތަނަވަސްކޮށްދިން ފުރުސަތެއްގައި ބެނާޑޯ ސިލްވާއެވެ. އަދި މެޗުގެ 37 ވަނަ މިނެޓުގައި ޕޯޗުގަލްގެ ފޯވާޑް ލައިންގައި ހިމެނޭ ރަފައެލް ލިއާއޯ މެދުރޮނގާ ހިސާބުން ބޯޅަ ހިފައިގެން ގޮސް ގޯލަށް ފޮނުވާލި ހަމަލާގެ ރިބައުންޑް ގޯލް ތެރެއަށް ވައްދާލާ ރޮނާލްޑޯ ވަނީ ޕޯޗުގަލްގެ ލީޑު ފުޅާވެސް ކޮށްދީފައެވެ. މިއީ އޭނާ ޤައުމީ ޓީމަށް ކާމިޔާބު ކޮށްދިން 133 ވަނަ ލަނޑެވެ. އަދި މިއީ މި ފަހަރުގެ ނޭޝަންސް ލީގުގައި އޭނާ ކާމިޔާބުކުރި ތިން ވަނަ ލަނޑެވެ.
މި މެޗުގެ 78 ވަނަ މިނެޓުގައި ޕޮލެންޑްގެ ޕިއޮޓްރޭ ޒިއެލިންސްކީ ލަނޑެއް ކާމިޔާބު ކުރެވެންދެން ޕޯޗުގަލް ފެނިގެންދިޔައީ ވަރަށް ހަމަޖެހިގެން ކުޅެމުންދިޔަ ތަނެވެ. ނަމަވެސް މި ލަނޑާއެކު އެ ޓީމު ހާސްކަމުގެ ތެރެއަށް ވެއްޓި މެޗުގެ ފަހު ވަގުތު ކޮޅުގެ ފޯރި ގަދަވެގެންދިޔައެވެ. ނަމަވެސް މެޗު ނިމެން ދެ މިނެޓަށް ވެފައިވަނިކޮށް ޕޯޗުގަލްއިން އުފެއްދި ހަމަލާއެއް ލަނޑަކަށް ބަދަލުކޮށް އެ ޓީމުން ވަނީ އަނެއްކާވެސް ދެ ލަނޑުގެ ލީޑެއް ނަގައި ހަމަޖެހިލާފައެވެ. ޕޯޗުގަލްގެ ތިން ވަނަ ލަނޑަކީ ޕޮލެންޑްގެ ޑިފެންޑާ ޔާން ބެޑްނަރެކް އަތުން ބައިކޮޅަށް ވަތް ލަނޑެކެވެ.
މި ނަތީޖާއާއެކު ޕޯޗުގަލް މި ވަނީ ނޭޝަންސް ލީގުގައި މިހާތަނަށް ކުޅުނު ތިން މެޗުވެސް ކާމިޔާބުކޮށް ނުވަ ޕޮއިންޓް ހޯދައިފައެވެ. އަދި ޕޮލެންޑްއުޅެނީ ތިން ޕޮއިންޓާއެކު ގްރޫޕްގެ ތިން ވަނައިގައެވެ.