13 Oct 2024, 09:16
ޗައިނާގައި މިހާރު ކުރިއަށްދާ ޝަންގްހާއީ މާސްޓާސް ޓެނިސް މުބާރާތުގެ ފައިނަލުން މިމުބާރާތުގައި އެއްވަނައަށް ސީޑު ކުރެވިފައިވާ އިޓަލީވިލާތުގެ ޔަނިކް ސިނާ އާއި ހަތަރުވަނައަށް ސީޑު ކުރެވިފައިވާ ސާބިއާގެ ނޯވަކް ޖޯކޮވިޗް ޖާގަހޯދައިފިއެވެ.
މި މުބާރާތުގެ ފައިނަލުން ސިނާ ޖާގަހޯދީ ސެމީފައިނަލްގައި 30 ވަނައަށް ސީޑު ކުރެވިފައިވާ ޗެކް ރިޕަބްލިކްގެ ތޯމަސް މަޗެކް އާއި ބައްދަލުކުރި މެޗު ސީދާ ދެ ސެޓުން ކާމިޔާބު ކޮށްގެންނެވެ.
މި މެޗުގެ ފުރަތަމަ ސެޓު ސިނާ ހައެއް ހަތަރަކުން ކާމިޔާބު ކުރި އިރު ދެވަނަ ސެޓު އޭނާ ކާމިޔާބު ކޮށްފައިވަނީ ހަތެއް ފަހަކުންނެެވެ. މި ކާމިޔާބީއާއެކު މި ސިޒަން ނިމޭއިރު ދުނިޔޭގެ ރޭންކިންގެ އެއްވަނަ މަގާމް އޭނާއަށް ނުގެއްްލޭނެކަންވަނީ ޔަގީންވެގެން ގޮސްފައެވެ.
އަދި ސިނާ ވެގެން ގޮސްފައިވަނީ ޝަންގްހާއީ މާސްޓާސްގެ ފައިނަލުން ޖާގަހޯދި އިޓަލީވިލާތުގެ ފުރަތަމަ ކުޅުންތެރިޔާ އަށެވެ. މެޗަށްފަހު ވާހަކަދައްކަމުން ސިނާ ވަނީ މިއީ ކުޑައިރު އަބަދުވެސް ކުޅެން ބޭނުންވި އެއް ފައިނަލް ކަމަށާއި އެހާ ހިސާބަށް ދަތުރު ކުރެވުމުން ވަރަށް ހިތްހަމަ ޖެހިފައިވާ ކަމަށެވެ.
މިމުބާރާތުގެ ފައިނަލުން ޖޯކޮވިޗް ޖާގަހޯދީ ދެވަނަ ސެމީ ފައިނަލްގައި މިމުބާރާތުގައި ހަތްވަނައަށް ސީޑު ކުރެވިފައިވާ އެމެރިކާގެ ޓޭލާ ފްރިޓްޒް އާއި ބައްދަލުކުރި މެޗު ސީދާ ދެސެޓުން ކާމިޔާބު ކޮށްގެންނެވެ.
މި މެޗުގެ ފުރަތަމަ ސެޓު ހައެއް ހަތަރަކުން ޖޯކޮވިޗް ކަމިޔާބު ކުރި ނަމަވެސް ދެވަނަ ސެޓު އޭނާއަށް ކާމިޔާބު ކުރެވޭގޮތްވީ ތައި ބްރޭކަކަށް ގޮސްގެންނެވެ.
މިގޮތުން ޓައި ބްރޭކް ޖޯކޮވިޗް ކާމިޔާބު ކުރި އަށެއް ހަޔަކުންނެވެ. ދެވަނަ ސެޓުގައި ޖޯކޮވިޗްއަށް ކޮންމެވެސް ވަރަކަށް އަނިޔާވެ ޑޮކްޓަރުގެ އެހީތެރިކަން ވެސް ހޯދަން ޖެހުނެވެ.
މެޗަށްފަހު ވާހަކަ ދައްކަމުން ޖޯކޮވިޗް ވަނީ އޭނާއަށް ފިޒިކަލީ ކޮންމެވެސް ވަރެއްގެ އުނދަގޫ ތަކެއް ދެވަނަ ސެޓުގެ ތެރޭގައި ކުރިމަތިވެގެންދިޔަކަން ފާހަގަ ކޮށްފައެވެ. އަދި ފައިނަލް މެޗަށް ރަނގަޅަށް ފިތް ވެވޭތޯ މަސައްކަތް ކުރާނެކަމަށް ވެސް އޭނާ ހާމަކުރިއެވެ.
މިމުބާރާތުގެ ފައިނަލް މެޗު ވެގެންދާނީ މިދެ ކުޅުންތެރިން ބައްދަލުކުރާ އަށްވަނަ މެޗަށެވެ. މީގެކުރިން ބައްދަލުކުރި ހަތް ފަހަރުގެ ތެރެއިން ހަަތަރު ފަހަރު ކާމިޔާބު ހޯދާފައިވަނީ ޖޯކޮވިޗް އެވެ.