13 Oct 2024, 09:06
އިންގްލިޝް ޕްރިމިއާ ލީގުގެ ޗެމްޕިއަން މެންޗެސްޓާ ސިޓީގެ ޑިރެކްޓާ އޮފް ފުޓްބޯލްގެ މަގާމް މިހާރު ފުރަމުންދާ ޗީކީ ބެގިރިސްޓައިން މި ސީޒަން ނިމުމާއެކު އެ ގާމުން ވަކިވުމުން ދެން އެ މަގާމާ ހަވާލުވާނީ ސްޕޯޓިން ލިޒްބަންގެ ހޫގޯ ވިއާނާކަން އެ ކްލަބުން ހާމަކޮށްފިއެވެ.
އުމުރުން 60 އަހަރުގެ ބެގިރިސްޓައިން ސިޓީގައި 12 އަހަރު ހޭދަކުރުމަށްފަހު މަގާމުން ވަކިވަން އުޅޭކަން މިދިޔަ ހަފްތާގައި ބީބީސީއިންވަނީ ހާމަކޮށްފައެވެ.
ސިޓީއިން މިއަދު އާންމުކުރި ބަޔާނެއްގައި ވާގޮތުން އެ ކްލަބުންވަނީ ބެގިރިސްޓައިންގެ ދައުރުގައި ތަށިތަކުން ފުރިފައިވާ ސީޒަންތަކެއް ހޭދަކޮށްފައިވާކަން ހާމަކޮށްފައެވެ.
އެގޮތުން 2012 ވަނަ އަހަރު މި މަގާމާ ބެގިރިސްޓައިން ހަވާލުވިފަހުން ސިޓީއިންވަނީ ޕްރިމިއާ ލީގުގެ ތަށި ހަތް ފަހަރު ހޯދައި، ޗެމްޕިއަންސް ލީގުގެ ތަށި ފުރަތަމަ ފަހަރަށް ހޯދައިފައެވެ. އަދި އެފް އޭ ކަޕް ދެ ފަހަރު ހޯދައި ކަރަބާއޯ ކަޕް ހަފަހަރު ކާމިޔާބު ކޮށްފައެވެ.
ވިއާނާ މަގާމާއި ހަވާލުވާނީ އަންނަ އަހަރުގެ ހޫނު މުސުމުގައިކަމަށް ހާމަކުރެއެވެ. ނަމަވެސް މަގާމުގެ މަސްއޫލިއްޔަތުތައް ފުރިހަމައަށް ހަވާލުކުރުމަށް ފުރުސަތު ދިނުމުގެ ގޮތުން އޭގެ ކުރީ ދެތިންމަހުން ފެށިގެން ބެގިރިސްޓައިން އާއެކު ވިއާނާ މަސައްކަތް ކުރާނެކަމަށް ވެސް ސިޓީއިން ހާމަކުރެއެވެ.
އަދި ބެގިރިސްޓައިން ސިޓީއަށް ކޮށްދީފައިވާ އަގުހުރި ހިދުމަތް ފާހަގަކުރުން ސީޒަން ނިމޭތާ އޮންނާނެކަމަށް ވެސް އެ ކްލަބުން ހާމަކުރިއެވެ.
ސިޓީގެ ކޯޗު ކަމަށް 2016 ވަނަ އަހަރު ޕެޕް ގާޑިއޯލާ ގެނައުމުގައި ބެގިރިސްޓައިން ވަނީ މުހިންމު ދައުރެއް އަދާކޮށްފައެވެ. ޕެޕް ވަނީ ސިޓީއަށް ގެނެވޭ ކުޅުންތެރިން ޚިދުމުގައި ބެގިރިސްޓައިން ފަރުދާގެ ފުރަގަހުގައި އަދާކުރާ މުހިންމު ދައުރަށް އެތައް ފަހަރެއްގެ މަތިން ތައުރީފް ކޮށްފައެވެ. ބެގިިރިސްޓައިން މަގާމުން ވަކިވާކަމުގެ ހަބަރު އާންމު ކޮށްފައިމިވަނީ ސިޓީ އާއެކު ޕެޕް ހަދާފައިވާ އެއްބަސްވުން މިސީޒަނާއެކު ހަމަވާން ގާތްވެފައިވަނިކޮށެވެ.
ވިއާނާވަނީ 2002 އިން 2005 ވަނަ އަހަރާއި ދެމެދު ޕްރިމިއާ ލީގުގެ ނިއުކާސްލް ޔުނައިޓެޑަށް 39 މެޗު ކުޅެފައެވެ. މީގެއިތުރުން އޭނާވަނީ ސްޕެއިން އާއި ޕޯޗުގަލް ގެއިތުރުން ޔުނައިޓެޑް އެރަބް އެމިރޭޓްސްގައިވެސް ކްލަބް ފުޓްބޯޅަ ކުޅެފައެވެ.
ސްޕޯޓިންގެ ޑިރެކްޓާ އޮފް ފުޓްބޯލްގެ މަގާމުގައި ހޭދަކުރި ހަ އަހަރު އޭނާއަށް ވަނީ ގިނަ ބަޔެއްގެ ތައުރީފް ލިބިގެން ގޮސްފައެވެ. މި ހަ އަހަރުގެ ތެރޭގައި ސްޕޯޓިން ވަނީ ލީގު ތަށި ދެ ފަހަރު ކާމިޔާބު ކޮށްފައެވެ.
މިގޮތުން 2021 ވަނަ އަހަރު ސްޕޯޓިން އިން ވަނީ 19 އަހަރުގެ ތެރޭގައި ފުރަތަމަ ފަހަރަށް ލީގު ތަށި ކާމިޔާބު ކޮށްފައެވެ.އަދި މިދިޔަ ސީޒަންގައި އެޓީމުންވަނީ ދެވަނަ ފަހަރަށް ކާމިޔާބު ކޮށްފައެވެ.
މީގެއިތުރުން ވިއާނާ ވަނީ ރަނގަޅު ވިޔަފާރިތަކެއް ކޮށް ކްލަބަށް ފައިދާ ވެސް ހޯދާދީފައެވެ. މިގޮތުން ބްރޫނޯ ފެނާންޑޭޒް މެންޗެސްޓާ ޔުނައިޓެޑަސް ވިއްކާލުމާއި މެތިއުސް ނޫނޭސް ވުލްވަހެމްޕްޓަން ވޮންޑަރާސްއަށް ވިއްކާލި ވިއްކާލުން ފާހަގަ ކޮށްލެވުނެވެ.