12 Oct 2024, 11:50
ޔުއޭފާ ނޭޝަންސް ލީގު ބީގެ ގްރޫޕް އެކެއްގައި ޗެކް ރިޕަބްލިކް އާއި އަލްބޭނިއާ ބައްދަލުކުރި މެޗު ޗެކް ރިޕަބްލިކްއިން ކާމިޔާބު ކޮށްފިއެވެ.
ޗެކް ރިޕަބްލިކްގައި ކުޅުނު މި މެޗު އެ ޓީމުން ކާމިޔާބު ކޮށްފައިވަނީ ދެ ލަނޑު ސުން ލަނޑުންނެވެ.
ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މި މެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ޗެކު ޓީމުންނެވެ. އަދި އެ ޓީމުން މި މެޗު ފެށީ ވަރަަށް ފޯރީގައެވެ. ނަތީޖާއަކަށް ވެގެންދިޔައީ މެޗުގެ ތިން ވަނަ މިނެޓުގައި ޗެކް ރިޕަބްލިކްއިން މިމެޗުގެ ލީޑު ނެގުމެވެ. މި ލަނޑު އެ ޓީމަށް ކާމިޔާބު ކޮށްދިނީ ޓޮމާޒް ޗޯރީއެވެ. މި މެޗުގެ ފުރަތަމަ ހާފުގައި އިތުރު ލަނޑެއް ފެނިގެން ނުދިޔަ ނަމަވެސް ނަމަވެސް ލަނޑު ޖަހާނެ ރަނގަޅު ފުރުސަތު ލިބިގެންދިޔަކަން ފާހަގަ ވެގެންދިޔައެވެ.
މި މެޗުގައި ޗެކުން ކާމިޔާބު ކުރި ދެވަނަ ލަނޑު މެޗުގެ 63 ވަނަ މިނެޓުގައި ޖަހައިދިނީވެސް ފުރަތަމަ ލަނޑު ޖަހައިދިން ޗޯރީއެވެ. މި ކާމިޔާބީއާއެކު ޗެކް ރިޕަބްލިކްއިން މި ވަނީ ގްރޫޕް އެކެއްގެ އެއްވަނައިގާ އޮތް ޖޯޖިއާ އާއި ޕޮއިންޓްގެ ގޮތުން އަރާ ހަމަކޮށްފައެވެ. އެއީ ތިން މެޗުން ލިބިފައިވާ ހަ ޕޮއިންޓާއެކުއެވެ. އަދި އަލްބޭނިއާ އުޅެނީ ތިން ޕޮއިންޓާއެކު ތިން ވަނައިގައެވެ.
މި ގުރޫޕްގައި ދެން ހިމެނޭ ދެ ޓީމު ކަމަށްވާ ގްރޫޕްގެ އެއްވަނައިގައި އޮތް ޖޯޖިއާ އާއި ޔޫކްރެއިން ބައްދަލުކުރި މެޗު އެއް ލަނޑު ސުން ލަނޑުން ކާމިޔާބު ކޮށްފައިވަނީ ޔޫކްރެއިންއެވެ. މި މެޗުގައި ޔޫކްރެއިން އިން ކާމިޔާބު ކުރި ހަމައެކަނި ލަނޑު މެޗުގެ 35 ވަނަ މިނެޓުގައި އެ ޓީމަށް ކާމިޔާބު ކޮށްދިނީ މިހައިލޯ މުޑްރިކްއެވެ.
މި މެޗުން ޔޫކްރެއިން މޮޅުވި ނަމަވެސް ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ޖޯޖިއާއެވެ. އަދި ލަނޑު ޖަހާނެ ރަނގަޅު ފުރުސަތު މީގެ އިތުރުން ވެސް ދެ ޓީމަށް ލިބިގެންދިޔައެވެ.
މި މެޗުން ލިބުނު ތިން ޕޮއިންޓާއެކު ޔޫކްރެއިން އުޅެނީ މި ގްރޫޕްގެ ހަތަރު ވަނައިގައެވެ. އަދި ޖޯޖިއާ ގްރޫޕްގެ އެއްވަނައިގައި އުޅެނީ ފައިދާ ގޯލަށް ބަލާއިރުއެވެ.
މީގެ އިތުރުން ލީގު ސީގެ ގްރޫޕް އެކެއްގައި ސްވިޑްން އާއި ސްލޮވާކިއާ ބައްދަލުކުރި މެޗު ދެ ލަނޑު ދެ ލަނޑުން ދެ ޓީމު ވީ އެއްވަރެވެ. ސްލޮވާކިއާގައި ކުޅުނު މި މެޗުގައި ފުރަތަމަ ދެ ލަނޑު ޖަހާފައިވަނީ ސްވިޑްންއިންނެވެ. މި ދެ ލަނޑު އެ ޓީމަށް ކާމިޔާބު ކޮށްދިނީ ޔާސިން އަޔާރީ އާއި ކެން ސޭމާއެވެ. މި މެޗުގައި ސްލޮވާކިއާއިން ކާމިޔާބު ކުރި ދެ ލަނޑު އެ ޓީމަށް ކާމިޔާބު ކޮށްދިނީ ޑޭވިޑް ސްޓްރެލެކްއެވެ.