12 Oct 2024, 15:50
ޔުއޭފާ ނޭޝަންސް ލީގު ބީގެ ގްރޫޕް ހަތަރެއްގައި ތުރުކީޔޭ އާއި މޮންޓެނީގްރޯ ބައްދަލު ކުރި މެޗު ތުރުކީޔޭއިން ކާމިޔާބުކޮށްފިއެވެ.
ތުރުކީޔޭގައި ކުޅުނު މި މެޗު އެ ޓީމުން ކާމިޔާބު ކޮށްފައިވަނީ އެއް ލަނޑު ސުން ލަނޑުންނެވެ.
ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މި މެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ތުރުކީޔޭއިންނެވެ. ނަމަވެސް މިއާއެކުވެސް މި މެޗުގެ ފުރަތަމަ ހާފުގައި ދެ ޓީމުން ކުރެ އެއްވެސް ޓީމަކަށް ލަނޑެއް ކާމިޔާބު ކުރެވޭގޮތެއް ނުވިއެވެ.
މި މެޗުގައި ތުރުކީޔޭއިން ކާމިޔާބު ކުރި ހަމައެކަނި ލަނޑު މެޗުގެ 69 ވަނަ މިނެޓުގައި ކާމިޔާބު ކޮށްދިނީ އިރްފާން ކަހްވެޖީއެވެ. މި މެޗުގައި މީގެ އިތުރުންވެސް ލަނޑު ޖަހާނެ ރަނގަޅު ފުރުސަތު ދެޓީމަށް ވެސް ލިބިގެންދިޔަ ނަމަވެސް އެއިން އެއްވެސް ފުރުސަތެއްގެ ބޭނުން ހިފޭގޮތެއް ނުވިއެވެ.
މި ކާމިޔާބީއާއެކު ތުރުކީޔޭ މިހާރު އުޅެނީ ކުޅުނު ތިން މެޗުން ލިބިފައިވާ ހަތް ޕޮއިންޓާއެކު ގްރޫޕް ހަތަރެއްގެ އެއްވަނައިގައެވެ. އަދި މޮންޓެނީގްރޯ އުޅެނީ އެއްވެސް ޕޮއިންޓެއް ނުލިބި ގްރޫޕްގެ އެންމެ ފުލުގައެވެ.
މި ގްރޫޕްގައި ދެން ހިމެނޭ ދެ ޓީމް ކަމަށްވާ ވޭލްސް އާއި އައިސްލޭންޑް ބައްދަލުކުރި މެޗު ދެ ލަނޑު ދެ ލަނޑުން ދެޓީމު ވީ އެއްވަރެވެ. މި މެޗުގެ ފުރަތަމަ ހާފުގައި ވޭލްސްގެ ފަރާތުން މޮޅު ކުޅުމެއް ފެނިގެންދިޔައިރު ދެވަނަ ހާފުގައި ފެނިގެންދިޔައީ އައިސްލޭންޑުން އެ ޓީމުގެ މޮޅު ކުޅުން ދައްކާލި ތަނެވެ.
މި މެޗުގެ ފުރަތަމަ ހާފުގައި ވޭލްސްއިން ވަނީ ރަށުން ބޭރުގައި ކުޅެ ދެ ލަނޑުގެ ލީޑެއް ނަގައިފައެވެ. މި ދެ ލަނޑު އެ ޓީމަށް ކާމިޔާބު ކޮށްދިނީ 11 ވަނަ މިނެޓާއި 29 ވަނަ މިނެޓުގައި ބްރެނަން ޖޯންސަން އާއި ހެރީ ވިލްސަންއެވެ.
މި ދެލަނޑައެކު ފުރަތަމަ ހާފު ވޭލްސް ވަރަށް ހަމަޖެހިލައިގެން ނިންމާލި ނަމަވެސް ދެވަނަ ހާފު އެ ޓީމަށް ވެގެންދިޔައީ ވަރަށް ހާސްކަން ބޮޑު ހާފަކަށެވެ. މިގޮތުން މި ހާފަށް އައިސްލޭންޑުން ނިކުތީ ފުރަތަމަ ހާފުގައި ހެދުނު ގޯސްތައް ރަނގަޅުކޮށް މެޗުން ނަތީޖާއެއް ނެރުމުގެ ބޭނުމުގައެވެ. މި މެޗުގައި އައިސްލަންޑުން ކާމިޔާބު ކުރި ފުރަތަމަ ލަނޑު މެޗުގެ 69 ވަނަ މިނެޓުގައި އެ ޓީމަށް ކާމިޔާބު ކޮށްދިނީ ލޯގީ ޓޮމާސަން އެވެ. އަދި އޭގެ ތިން މިނެޓް ފަހުން އައިސްލޭންޑުން ވަނީ މެޗުގެ ނަތީޖާ ހަމަހަމަ ކޮށްފައެވެ. ނަމަވެސް މި ލަނޑަކީ ވޭލްސްގެ ޑެނީ ވާޑް އަތުން ބައިކޮޅަށް ވަން ލަނޑެކެވެ.
މި މެޗު އެއްވަރު ވުމުން ވޭލްސް މިހާރު އުޅެނީ ތިން މެޗުން ލިބިފައިވާ ފަސް ޕޮއިންޓާއެކު ގްރޫޕްގެ ދެވަނައިގައެވެ. އަދ އައިސްލަންޑް އުޅެނީ ހަތަރު ޕޮއިންޓާއެކު ތިން ވަނައިގައެވެ.