12 Oct 2024, 15:37
ޔުއޭފާ ނޭޝަންސް ލީގު އޭގެ ގްރޫޕް ތިނެއްގައި ނެދަލަންޑްސް އާއި ހަންގޭރީ ބައްދަލުކުރި މެޗު އެއްވަރު ވެގެން ނިމިއްޖެއެވެ.
ހަންގޭރީގައި ކުޅުނު މިމެޗު ނިމުނީ އެއް ލަނޑު އެއް ލަނޑުން ދެޓީމު އެއް ވަރު ވެގެންނެވެ.
ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މި މެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ނެދަލަންޑްސްއިންނެވެ. މި މެޗުގައި ބޮޑަށް ފެނިގެންދިޔައީ ނެދަލަންޑްސްއިން ހަމަލާއަށް އިސްކަން ދީގެން ކުޅުނުއިރު ހަންގޭރީއިން ދިފާއަށް އިސްކަންދީ ލިބޭ ފުރުސަތުތަކުގައި ހަމަލާ އުފެއްދޭތޯ މަސައްކަތް ކުރަމުންދިޔަ ތަނެވެ.
މި ގޮތުން މެޗުގެ 32 ވަނަ މިނެޓުގައި އުފެއްދި ހަމަލާއެއްގައި ހަންގޭރީއިން ވަނީ މި މެޗުގެ ލީޑު ނަގާ ނެދަލަންޑްސްއަށް ސިހުން ގެނުވާފައެވެ. މި ލަނޑު އެ ޓީމަށް ކާމިޔާބު ކޮށްދިނީ ރޯލަންޑް ސަލާއީއެވެ. ފުރަތަމަ ހާފުގައި އިތުރު ލަނޑެއް ފެނިގެން ނުދިޔަ ނަމަވެސް ލަނޑު ޖަހާނެ ރަނގަޅު ފުރުސަތު މިހާފުގައި ނެދަލަންޑްސްއަށް ލިބިގެންދިޔައެވެ.
މި މެޗުގެ ދެވަނަ ހާފުގައި ވެސް ފެނިގެންދިޔައީ ފުރަތަމަ ހާފެކޭ އެއްގޮތް ކުޅުމެކެވެ. މިގޮތުން ނެދަލަންޑްސްއިން ދިޔައީ ހަމަލާ އަކަށްފަހު ހަމަލާއެއް އުފައްދާ ލަނޑެއް ކާމިޔާބު ކުރެވޭތޯ މަސައްކަތް ކުރަމުންނެވެ. ނަމަވެސް ހަންގޭރީއިން ދިޔައީ އެ ހަމަލާތައް ދިފާއު ކުރަމުންނެވެ.
މި މެޗުގެ ދެވަނަ ހާފުގައި ނެދަލަންޑްސްގެ ކެޕްޓަން ވާޖިލް ވެން ޑައިކަށްވަނީ މެޗުގެ 79 ވަނަ މިނެޓުގައި ދެވަނަ ރީނދޫ ކާޑާއެކު ރަތް ކާޑު ދައްކާފައެވެ. އޭނާއަށް މި މެޗުގައި ދެ ރީނދޫ ކާޑު ދައްކާފައިވަނީ ތިން މިނެޓްގެ ވަގުތު ކޮޅެއްގެ ތެރޭގައެވެ. މިއީ އޭނާ ޤައުމީ ޓީމަށް ކުޅުނު 77 މެޗުގައި ހޯދި ފުރަތަމަ ރަތް ކާޑެވެ.
މި ކާޑާއެކު ހަންގޭރީއަށް މި މެޗު ކާމިޔާބު ކުރުމުގެ ފުރުސަތު އިތުރު ވެގެންދާނެކަމަށް ބެލެވުނު ނަމަވެސް މެޗުގެ 83 ވަނަ މިނެޓްގައި ޑެންޒެލް ޑަމްފްރީސް ވަނީ ލަނޑެއް ޖަހާ މި މެޗުން ނެދަލަންޑްސް ބަލިނުވެ ސަލާމަތް ކޮށްދީފައެވެ.
މި ނަތީޖާއާއެކު ނެދަލަންޑްސް މިހާރު އުޅެނީ ކުޅުނު ތިން މެޗުން ލިބިފައިވާ ފަސް ޕޮއިންޓާއެކު ގްރޫޕްގެ ދެވަނައިގައެވެ. އަދި ހަންގޭރީ އުޅެނީ ދެ ޕޮއިންޓާއެކު ތިންވަނައިގައެވެ.