12 Oct 2024, 11:13
ޔުއޭފާ ނޭޝަންސް ލީގު އޭގެ ގްރޫޕް ތިނެއްގައި ޖަރުމަނުވިލާތާއި ބޮސްނިއާ ހާޒެގޮވީނާ ބައްދަލުކުރި މެޗު ޖަރުމަނުން ކާމިޔާބު ކޮށްފިއެވެ.
ބޮސްނިއާގައި ކުޅުނު މި މެޗު ޖަރުމަނުން ކާމިޔާބު ކޮށްފައިވަނީ ދެ ލަނޑު އެއް ލަނޑުންނެވެ.
ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ޖަރުމަނުންނެވެ. މި މެޗުގެ ފުރަތަމަ ލަނޑު މެޗުގެ 30 ވަނަ މިނެޓުގައި ޖަހާ މެޗުގެ ލީޑު ނަގައިފައިވަނީ ޖަރުމަނު ޓީމުންނެވެ.
މި ލަނޑު އެ ޓީމަށް ކާމިޔާބު ކޮށްދިނީ ފްލޯރިއަން ވާޓްޒް ތަނަވަސްކޮށްދިން ފުރުސަތެއްގައި ޑެނީޒް އުންޑާވްއެވެ. މި ލަނޑު ޖެހިތާ ކުޑައިރު ކޮޅެއްގެ ތެރޭގައި ޖަރުމަނަށް ދެވަނަ ލަނޑެއް ކާމިޔާބު ކުރެވުނު ކަމަށް ހީވި ނަމަވެސް ޖަރުމަނު ޓީމަށް މުޅިން އަލަށް ކުޅެމުންދިޔަ ޓިމް ކްލެއިންޑިއެންސްޓް ޖެހި ލަނޑު ވަނީ އޮފް ސައިޑް ކަމަށް ދައްކާފައެވެ.
އަދި ހަމައެއާއެކު ބޮސްނިއާގެ އެރްމަޑީން ޑެމިރޯވިޗްއަށް މެޗުގެ ނަތީޖާ ހަމަހަމަ ކޮށްލުމަށް ލިބިގެންދިޔަ ފުރުސަތުގައި ފޮނުވާލި ހަމަލާ އަމާޒުވީ ޖަރުމަނު ގޯލުގެ ދަނޑިއަށެވެ. އަދި ނަތީޖާ އަކަށް ވެގެންދިޔައީ މެޗުގެ 36 ވަނަ މިނެޓުގައި އުންޑާވް މި މެޗުގައި ކާމިޔާބުކުރި ދެވަނަ ލަނޑާއެކު ޖަރުމަނުން އެ ޓީމުގެ ލީޑު ފުޅާކުރުމެވެ. މިއީ އޭނާ ޖަރުމަނަށް ކުޅުނު ފަސް ވަނަ މެޗުގައި ކާމިޔާބު ކޮށްދިން ތިން ވަނަ ލަނޑެވެ.
މި މެޗުގައި އުންޑާވްއަށް ހެޓްރިކެއް ހެދުނު ކަމަށް ހީވެގެންދިޔައިރު ސާޖީ ގިނެބްރީއަށްވެސް ލަނޑެއް ކާމިޔާބު ކުރެވުނު ކަމަށް ބެލެވުނެވެ. ނަމަވެސް މި ދެ ލަނޑުވެސް ވަނީ އޮފް ސައިޑް ވުމުގެ ސަބަބުން ބަލައިނުގެންފައެވެ.
މި މެޗުގައި ބޮސްނިއާއިން ކާމިޔާބު ކުރި ހަމައެކަނި ލަނޑު މެޗުގެ 70 ވަނަ މިނެޓުގައި އެ ޓީމަށް ކާމިޔާބު ކޮށްދިނީ ކެޕްޓަން އެޑިން ޖެކޯއެވެ. މި ލަނޑާއެކު މެޗުގެ ފަހު ވަގުތު ކޮޅު ފޯރިގަދަވެގެންދިޔަ ނަމަވެސް ބޮސްނިއާއަށް މެޗުގެ ނަތީޖާ ހަމަހަމަ ކުރެވޭގޮތެއް ނުވިއެވެ.
މި ކާމިޔާބީއާއެކު ޖަރުމަނު މިހާރު އުޅެނީ ގްރޫޕް ތިނެއްގައި ކުޅުނު ތިން މެޗުން ލިބިފައިވާ ހަތް ޕޮއިންޓާއެކު ތާވަލްގެ އެއްވަނައިގައެވެ. އަދި ބޮސްނިއާ އުޅެނީ އެއް ޕޮއިންޓާއެކު ހަތަރު ޓީމު ހިމެނޭ މިގްރޫޕްގެ އެންމެ ފުލުގައެވެ.