11 Oct 2024, 17:39
މާވެޔޮމަގު ކައުންޓްލައިން ފިހާރަ ސަރަހައްދުގައި ހުރި ބޮޑު ގަހެއް ވެއްޓި އެ ސަރަހައްދުގައި ޕާކުކޮށްފައިހުރި ބައެއް އުޅަނދުތަކަށް ގެއްލުން ވެއްޖެއެވެ.
ކައުންޓްލައިން ސަރަހައްދުގައި ހުރި ބޮޑު ގަސް ވެއްޓި، މަގު ބަންދުވެފައިވާ މަންޒަރު ފެންނަ ވީޑިއޯއެއް ވެސް ސޯޝަލް މީޑިއާގައި ވަނީ އާންމުވެފައެވެ.
އެ ވީޑިއޯއިން ފެންނަނީ މަގުގެ ހުރަހަށް އެ ބޮޑު ގަސް ވެއްޓިފައިވާ މަންޒަރެވެ. އަދި އެ ސަރަހައްދުގައި ޕާކްކޮށްފައިހުރި ބައެއް ސައިކަލުތަކަށް ވެސް ގެއްލުންވެފައިވާ މަންޒަރު ވީޑިއޯއިން ފެނެއެވެ.
ވައިގަދަވުމުގެ ސަބަބުން ހުޅުމާލޭގެ ބައެއް މަގުތަކުގައި ހުރި ގަސްތައް ވެސް ވަނީ ވެއްޓިފައެވެ. އެހެންވެ އެ ތަންތަން ސާފުކުރެވެންދެން މަގުތައްވަނީ ބަންދުކޮށްފައެވެ.
މިހާރު ކުރަމުން އަންނަ ވިއްސާރައިގައި ވައި ގަދަވާނެތީ، ބުރިޖާއި ހައިވޭ މަތިން ސައިކަލު ދުއްވާއިރު ސަމާލުވާން ފުލުހުން ފުލުހުން ވެސް ވަނީ މިއަދު އިލްތިމާސްކޮށްފައެވެ.
މޫސުމާ ބެހޭ ގައުމީ އިދާރާ މެޓް އޮފީހުން ވަނީ ރ.އަތޮޅުން ފެށިގެން ވ. އަތޮޅަށް މިއަދުގެ 15:00 އިން ފެށިގެން 19:00 އަށް ރީނދޫ ސަމާލު ވެސް ނެރެފައެވެ.
މި ސަރަހައްދަށް ގަޑިއަކު 28 މޭލާއި 35 މޭލު ބާރުމިނުގައި ވައި ޖެހޭނެ ކަމަށާއި ވިލާގަނޑަކުގައި ގަޑިއަކު 55 މޭލަށް ވައި ގަދަވާނެ ކަމަށް އެ އިދާރާއިން ވަނީ ލަފާކޮށްފައެވެ.
ކުރިއަށް އޮތް 24 ގަޑީރުގައި ރާއްޖޭގެެ އެކި ސަރަހައްދުތަކަށް ގުގުރުމާއެކު ބޯކޮށް ވާރޭ ވެހޭނެ ކަމަށާއި ކަނޑުތައް ވަރަށް ގަދަވާނެ ކަމަށް އެ އިދާރާއިން ވަނީ ލަފާކޮށްފައެވެ.
އެހެންކަމުން ހުރިހާ ފަރާތްތަކުން އަދި ވަކިން ހާއްސަކޮށް ކަނޑު ދަތުރުކުރައްވާ ފަރާތްތަކުން މޫސުމަށް ސަމާލުވުމަށް މޫސުމާ ބެހޭ ގައުމީ އިދާރާއިން ވަނީ އިލްތިމާސް ކޮށްފައެވެ.