07 Oct 2024, 11:37
މިދިޔަ މަހުގެ 12 ވަނަ ދުވަހުން ފެށިގެން 30 ވަނަ ދުވަހުގެ ނިޔަލަށް ހުޅުމާލެއިން 6،693 އުޅަނދު މަޑުކުރުވާ، ބަލައި ފާސްކޮށްފައިވާ ކަމަށް ދިވެހި ފުލުހުންގެ ޚިދުމަތުން މިއަދު ބުނެފިއެވެ.
ފުލުހުން މިކަން ހާމަކޮށްފައިވަނީ އެކްސްގައި ކޮށްފައިވާ ޕޯސްޓެއްގައެވެ. އެ ޕޯސްޓުގައި ފުލުހުން ވަނީ މަގުމަތީގެ ސަލާމަތާއި ރައްކާތެރިކަން ކަށަވަރުކުރުމަށް ފުލުހުން ކުރަމުންދާ މަސައްކަތުގެ މަަސައްކަތުގެ މައްޗަށް އަލިއަޅުވައިލާފައެވެ.
ފުލުހުންގެ ތަފާސްހިސާބުން ދައްކާގޮތުގައި ސެޕްޓެމްބަރު މަހުގެ 12 ވަނަ ދުވަހުން ފެށިގެން 30 ވަނަ ދުވަހުގެ ނިޔަލަށް ވަނީ ދެ ފުރޮޅުލީ 5،427 އުޅަނދާއި ހަތަރު ފުރޮޅުލީ 1،266 އުޅަނދެއް ބަލައި ފާސްކޮށްފައެވެ.
އޭގެ ތެރެއިން ފިޔަވަޅު އެޅި އުޅަނދުގެ ތެރޭގައި ހިމެނެނީ:
ހަތަރުފުރޮޅުލީ 88 ވެހިކަލް
- ދެ ފުރޮޅުލީ 394 ވެހިކަލް
- ޖުމްލަ 482 ވެހިކަލް
ބަލައި ފާސްކުރި އުޅަނދުތަކުގެ ތެރޭގައި:
ލައިސެންސް ނެތި ދުއްވި 112 އުޅަނދެއް ފާހަގަކުރެވިފައިވޭ
- އޭގެ ތެރެއިން 20 އުޅަނދެއް ޓޯކުރެވިފައިވޭ
ފުލުހުން ބުނި ގޮތުގައި ގަވާއިދާ ޚިލާފަށް ދުއްވުމުގެ ސަބަބުން 515 އުޅަނދެއް މަޑުކުރުވައި އުޅަނދު ދުއްވި ފަރާތަށް ވަނީ ނަސޭހަތްތެރިވެފައެވެ. އޭގެ ތެރޭގައި ހިމެނެނީ ނުރައްކާތެރިކޮށް ދުއްވި 43 އުޅަނދަކާއި ޓްރެފިކް ގަވާއިދުތަކާ ހިލާފުވެގެން ހިފެހެއްޓި 182 އުޅަނދެއް ކަމަށް ވެސް ފުލުހުން ވަނީ ފާހަގަކޮށްފައެވެ.
މާލޭ ސަރަހައްދުގައި އެކްސިޑެންޓުތައް އިތުރުވާތީ، ކޮންމެ ފަސް މިނެޓަކުން ފުލުހަކާ ބައްދަލުވާ ގޮތަށް ފުލުހުންގެ ޕޮލިސީއަށް ބަދަލު ގެނެސް، އެއަށް އަމަލުކުރަން ފަށަން މަސައްކަތްކުރަމުން އަންނަ ކަމަށް ވެސް މީގެ ކުރީން ފުލުހުން ވަނީ ބުނެފައެވެ.
އޭގެ މަގުސަދަކީ ސީނިއާ ފުލުހުން ހިމެނޭ ގޮތަށް، ފްރަންޓް ލައިންގައި ހަރަކާތްތެރިވާ ފުލުހުން އިތުރުކުރުން ކަމަށް ފުލުހުން ވަނީ ބުނެފައެވެ. ބްރިޖުމަތީ ހިނގާ އެކްސިޑެންޓުތައް މަދުކުރުމަށްޓަކައި ފުލުހުން ވަނީ ސައިކަލު ބޭނުންކޮށްގެން ބްރިޖް ޕެޓްރޯލްކުރަން ވެސް ފަށައިފައެވެ.
ދާދި ފަހުން ވަނީ ކައިރި ކައިރީގައި މާލެއާއި ހުޅުމާލޭގައި ވެސް ނުރައްކާތެރި އެކްސިޑެންޓްތަކެއް ހިނގައި ބައެއްގެ ފުރާނަ ގޮސްފައެވެ.