06 Oct 2024, 15:30
ފޭސްބުކްގެ މައި ކުންފުނި މެޓާއިން "މޫވީ ޖެން"ގެ ނަމުގައި އަޑާ އެކު ވީޑިއޯ އުފެއްދޭ އާ އޭއައި މޮޑެލެއް ތައާރަފުކޮށްފިއެވެ.
މި މޮޑެލްއަކީ ރިއަލިސްޓިކް ވީޑިއޯ އަދި އޯޑިއޯ ކްލިޕްތައް އުފެއްދޭ ޓެކްނޮލޮޖީއެކެވެ.
މެޓާގެ "މޫވީ ޖެން"އިން އުފައްދާފައިވާ ނަމޫނާ ވީޑިއޯތަކުގައި ޖަނަވާރުތައް ފެތުމާއި ރާޅާއަޅާ މަންޒަރުތައް ހިމެނެއެވެ. އަދި، މީހުންގެ އަސްލު ފޮޓޯތައް ބޭނުންކޮށްގެން، އެ މީހުން ކުރެހުން ފަދަ ޙަރަކާތްތައް ކުރާ މަންޒަރުތައް ވެސް ހިމެނެއެވެ.
މީގެ އިތުރުން، "މޫވީ ޖެން"އަށް ވީޑިއޯގެ ކޮންޓެންޓާ ގުޅޭ ބެކްގްރައުންޑް މިއުޒިކާއި ސައުންޑް އިފެކްޓްތައް އުފެއްދޭނެ ކަމަށާއި، މިހާރު ހުރި ވީޑިއޯތައް އެޑިޓްކުރުމަށް ވެސް މި ޓޫލް ބޭނުންކުރެވޭނެ ކަމަށް މެޓާއިން ބުނެފައިވެއެވެ. މިގޮތުން، ހަރަކާތްތެރިވާ އިންސާނުންގެ ސިފަތަކަށް ބަދަލު ގެނައުމާއި، މާހައުލަށް ބަދަލުތައް ގެނައުމުގެ ގާބިލުކަން މި ޓެކްނޮލޮޖީއަށް ލިބިގެންވެއެވެ.
މެޓާއިން ބުނާ ގޮތުގައި "މޫވީ ޖެން"އިން އުފައްދާ ވީޑިއޯތައް 16 ސިކުންތާ ހަމައަށް ދިގުވާނެއެވެ. އަދި، އޯޑިއޯ 45 ސިކުންތާ ހަމައަށް ދިގުވާނެއެވެ.
މެޓާއިން ބުނެފައިވަނީ "މޫވީ ޖެން" ޑިވެލޮޕަރުންނަށް ހުޅުވާލުމުގެ ފުރުޞަތު ކުޑަ ކަމަށެވެ. އޭގެ ބަދަލުގައި، މި އާ ޓެކްނޮލޮޖީ މެޓާގެ އަމިއްލަ ޕްރޮޑަކްޓްތަކުގައި ބޭނުންކުރަން ރާވާފައިވާ ކަމަށާއި، އެކަން ވާނީ އަންނަ އަހަރު ކަމަށް ބުނެފައިވެއެވެ.
މި އާ ޓެކްނޮލޮޖީ ތަޢާރަފުކުރުމާ އެކު، ހޮލީވުޑްގައި އޭއައި ވީޑިއޯ ޓެކްނޮލޮޖީ ބޭނުންކުރުމާ މެދު ޚިޔާލު ތަފާތުވުންތަކެއް އުފެދިފައިވެއެވެ.
އެއް ބަޔަކު މިފަދަ ޓެކްނޮލޮޖީތައް ފިލްމު އުފެއްދުމުގައި ބޭނުންކުރަން ބޭނުންވާއިރު، އަނެއް ބަޔަކު ކޮޕީރައިޓް އޮންނަ މަސައްކަތްތައް ހުއްދަ ނެތި ބޭނުންކޮށްގެން ތަމުރީނުކޮށްފައިވާ ސިސްޓަމްތަކެއް ބޭނުންކުރުމާ މެދު ކަންބޮޑުވުން ފާޅުކުރެއެވެ. އަދި، ސިޔާސީ އިންތިޚާބުތަކުގައި އޭއައި ބޭނުންކޮށްގެން ފޭކް ވީޑިއޯ އުފައްދާނެކަމުގެ ބިރު ވެސް ބައެއް މީހުން ފާހަގަކުރެއެވެ.